Go Back

2 Maũndũ ma Matukũ ma Tene Chapter 35

• 1. Nake Josia agĩkĩrĩĩra Bathaka ya Jehova o kũu Jerusalemu; nao andũ magĩthĩnja Bathaka ĩo mũthenya wa ikũmi na ĩna wa mweri wa mbere.
• 2. Nake akĩiga athĩnjĩri-Ngai mawĩra-inĩ mao, o na gĩtũma magĩe na kĩyo gĩa gũtungatĩra Jehova nyũmba-inĩ yake.
• 3. Nao Alawii arĩa maarutaga Aisiraeli othe maũndũ, o acio maamũrĩirũo Jehova, akĩmera ũũ: Atĩrĩrĩ, ithandũkũ rĩa Ngai rĩrĩa itheru rĩtwarei nyũmba ĩrĩa yaakirũo nĩ Suleimani, mũrũ wa Daudi, mũthamaki wa Isiraeli, mũrĩige kuo; rĩtigacoka gũkuuwo nĩ inyuĩ na ciande o na rĩ; rĩu tungatĩrai Jehova Ngai wanyu, o na andũ ake Isiraeli.
• 4. Na mwĩhaarĩrie o ta ũrĩa mbarĩ cia maithe manyu itariĩ, o na ta ũrĩa matuanĩra ma wĩra wanyu matariĩ, ningĩ o ta ũrĩa Daudi, mũthamaki wa Isiraeli, aandĩkire, o na ta ũrĩa Suleimani mũrũwe aandĩkire.
• 5. Na mũrũgamage handũ harĩa haamũre o ta ũrĩa mbarĩ cia maithe ma ariũ a ithe wanyu, ciana cia andũ arĩa matarĩ Alawii, igayũkanĩte; na mũreke kũgĩe andũ amwe a mbarĩ ĩmwe ya Alawii nĩ ũndũ wa mbarĩ o mbarĩ ciao.
• 6. Mũgĩcoke mũthĩnje Bathaka, o na mwĩamũre mwĩtherie, na mũthondeke ũhoro nĩguo ariũ a ithe wanyu mekage o ta ũrĩa uuge wa Jehova, ũrĩa waheanirũo nĩ Musa, ũtariĩ.
• 7. Nake Josia agĩkĩhe ciana cia andũ acio mataarĩ Alawii tũtũrũme, na tũũri tũrutĩtwo rũũru-inĩ rũa mbũri, natuo tuothe twarĩ twa kũrutwo igongona rĩa Bathaka, agĩkĩhe andũ othe arĩa maarĩ ho, nao maarĩ andũ ngiri mĩrongo ĩtatũ magĩtarũo; na akĩmahe ndegwa ngiri ithatũ, nacio icio cioimĩte indo-inĩ cia mũthamaki.
• 8. Nao anene ake makĩruta indo cia magongona na kwĩendera na ngoro ciao, magĩcihe athĩnjĩri-Ngai na Alawii, o na andũ arĩa angĩ. Nao Hilikia, na Zekaria, na Jehieli, arĩa maarĩ aathani a nyũmba ya Ngai, makĩhe athĩnjĩri-Ngai mbũri ngiri igĩrĩ na magana matandatũ cia kũrutwo igongona rĩa Bathaka, o na ndegwa magana matatũ.
• 9. Nao anene amwe a Alawii, nao nĩo Konania, me na Shemaia na Nethaneli, ariũ a ithe, o na Hashabia, na Jeieli, na Jozabadi, makĩhe Alawii mbũri ngiri ithano cia igongona rĩa Bathaka, o na ndegwa magana matano.
• 10. Ũguo nĩguo wĩra ũcio watabarĩirũo, nao athĩnjĩri-Ngai makĩrũgama o handũ hao, o nao Alawii magĩikara o ta ũrĩa ituanĩra rĩa wĩra wao rĩatariĩ, o ta ũrĩa gwathanĩtwo nĩ mũthamaki.
• 11. Nayo Bathaka ĩgĩgĩthĩnjwo, nao athĩnjĩri-Ngai makĩminjaminja thakame ĩrĩa maamũkĩrĩte na moko; nao Alawii nĩo maathĩnjire ũhiũ ũcio.
• 12. Nao makĩeheria nyama iria cia mahaki ma njino, nĩ getha igayanĩrio andũ a nyũmba cia maithe ma ciana cia andũ arĩa matarĩ Alawii, o ta ũrĩa ciagayũkanĩte, nĩguo Jehova arutĩrũo igongona, o ta ũrĩa kwandĩkĩtwo ibuku-inĩ rĩa Musa. Naguo ũguo noguo mekire ũhoro-inĩ wa ndegwa.
• 13. Nao makĩhĩhia nyama cia Bathaka na mwaki o ta ũrĩa mũtugo wa kũrũmĩrĩrũo watuĩtwo; nacio nyama iria nyamũrĩre igongona magĩciruga na nyũngũ, o na iteng’ũ, o na nyũngũ cia igera, magĩcitwarĩra ciana ciothe cia andũ arĩa matarĩ Alawii o narua.
• 14. Thutha wa ũguo magĩgĩĩthondekera o ene, o na athĩnjĩri-Ngai; nĩ gũkorũo athĩnjĩri-Ngai, ariũ a Haruni, maarĩ na mĩhang’o ya kũruta mahaki ma njino, o na maguta, nginya o ũtukũ; kĩu nĩkĩo gĩtũmi kĩa Alawii methondekere o ene, o na mathondekere athĩnjĩri-Ngai, acio ariũ a Haruni.
• 15. Nao aini nyĩmbo arĩa ariũ a Asafu maaikarĩte o handũ hao, o ta ũrĩa gwathanĩtwo nĩ Daudi, na Asafu, na Hemani, o na Jeduthuni, ũrĩa wonagĩra mũthamaki maũndũ; o nao andũ arĩa maaikaragia mĩrango maarĩ o kũu mĩrango-inĩ ĩo yothe; nao matiarĩ na bata wa gũtiga wĩra wao, nĩ gũkorũo Alawii acio ariũ a ithe wao nĩmaamathondekeire indo ciao cia Bathaka.
• 16. Ũguo nĩguo wĩra ũcio wothe wa Jehova wa kũrĩa Bathaka wathondekirũo mũthenya o ro ũcio, o na ũrĩa wa kũrutĩra Jehova mahaki ma njino kĩgongona-inĩ gĩake, o ta ũrĩa gwaathanĩtwo nĩ mũthamaki Josia.
• 17. Nacio ciana cia Isiraeli iria ciakĩrĩ ho ikĩrĩa Bathaka hĩndĩ ĩo o na gĩathĩ kĩa mĩgate ĩtarĩ mĩimbie matukũ mũgwanja.
• 18. Na rĩrĩ, gwata matukũ ma Samueli, ũrĩa warĩ mũnabii, gũtiarĩĩtwo Bathaka ĩngĩ ta ĩo kũu Isiraeli, o na kana mũthamaki o na ũrĩkũ wa athamaki a Isiraeli akĩrĩa Bathaka ta ĩo yarĩirũo nĩ Josia, me hamwe na athĩnjĩri-Ngai o na Alawii, o na Ajuda na Aisiraeli othe arĩa maarĩ ho, o na andũ arĩa maatũũraga Jerusalemu.
• 19. Nakĩo gĩathĩ kĩu kĩa Bathaka kĩarĩirũo mwaka wa ikũmi na ĩnana ĩrĩa Josia aakorirũo athamakĩte.
• 20. Na rĩrĩ, maũndũ macio mothe maathira, o hĩndĩ ĩrĩa Josia aakorirũo athondekete maũndũ ma hekarũ-rĩ, Neko, mũthamaki wa Misiri, akĩambata akahũranĩre na Karikemishi, gũkuhĩ na Rũũĩ rũa Farati; nake Josia agĩkiumagara akahũrane nake.
• 21. No rĩrĩ, Neko akĩmũrekeria arekio, makamũũrie ũũ: Ndĩ na ũhoro ũrĩkũ nawe, wee mũthamaki wa Juda? Rĩu ndiũkĩte kũhũrana nawe, no rĩrĩ, njũkĩte kũhũrana na nyũmba ĩrĩa ndĩ na mbaara nayo, na Ngai nĩanjathĩte njĩke ũndũ ũcio narua; tiga kwĩĩkĩra ũhoro-inĩ ũcio wa Ngai ũrĩa wĩ hamwe na niĩ ndagakũnine.
• 22. No rĩrĩ, Josia nĩaaregire kũmũhutatĩria ũthiũ amweherere, no nĩegarũrire ndakamenyeke nĩguo akahũrane nake, na ndaigana kũigua ũhoro wa Neko, ũcio waarĩtio nĩ Ngai; nake agĩgĩthiĩ kũhũranĩra mbaara nake gĩtuamba kĩa Megido.
• 23. Nao andũ arĩa maarathanaga na mĩguĩ makĩratha mũthamaki Josia nayo; nake mũthamaki ũcio agĩkĩĩra ndungata ciake atĩrĩ, Njeheriai haha; nĩ ũndũ ndĩ mũguraru mũno ma.
• 24. Tondũ ũcio ndungata ciake igĩkĩmũruta ngari-inĩ yake ya ita, ikĩmwĩkĩra ngari-inĩ yake ya kerĩ ĩrĩa aarĩ nayo, ĩkĩmũtwara Jerusalemu; nake agĩkua, agĩthikwo mbĩrĩra-inĩ cia maithe. Nao andũ a Juda othe, o na Jerusalemu, makĩrĩrĩra Josia.
• 25. O nake Jeremia akĩrĩrĩra Josia; nao arũme othe o na andũ-a-nja arĩa maainaga nyĩmbo makĩgweta ũhoro wa Josia kĩrĩro-inĩ kĩao, na no mamũgwetaga o na ũmũthĩ; nao andũ magĩathana atĩ ũhoro ũcio ũtuĩke mũtugo wa kũrũmĩrĩrũo kũu Isiraeli, na atĩrĩrĩ, ciugo ciaguo ciandĩkĩtwo ibuku-inĩ rĩa macakaya.
• 26. Na rĩrĩ, ciĩko iria ingĩ cia Josia, o na maũndũ mega marĩa ekire o ta ũrĩa kwandĩkĩtwo watho-inĩ wa Jehova,
• 27. o na ciĩko ciake cia mbere o na cia kũrigĩrĩria-rĩ, atĩrĩrĩ, nĩciandĩkĩtwo ibuku-inĩ rĩa athamaki a Isiraeli na Juda.

Home