Go Back

2 Maũndũ ma Matukũ ma Tene Chapter 34

• 1. Na rĩrĩ, Josia aarĩ wa mĩaka ĩnana hĩndĩ ĩrĩa aambĩrĩirie gũthamaka, agĩthamaka mĩaka mĩrongo ĩtatũ na ũmwe Jerusalemu.
• 2. Nake agĩĩka maũndũ marĩa monagwo nĩ Jehova marĩ mega, o na akĩrũmĩrĩra mĩthiĩre ĩrĩa yothe ithe, Daudi, aathiaga nayo, na ndaigana gũkerũra na mwena wa ũrĩo o na kana wa ũmotho.
• 3. Nĩ ũndũ mwaka wa ĩnana ĩrĩa aakorirũo athamakĩte, ihinda o rĩu aarĩ mũnyinyi, nĩguo aambĩrĩirie kũrongoria Ngai wa ithe, Daudi; naguo mwaka wa ikũmi na ĩĩrĩ akĩambĩrĩria gũtheria kũu Juda, o na Jerusalemu, agĩthengia matĩri, na Maashera, o na mĩhiianano ya gwacũhio, o na ya gũtwekio.
• 4. Nao andũ ake magĩkiunanga igongona cia Mabaali arĩ o ho akĩĩonagĩra ũndũ ũcio, o na mĩhianano ya riũa ĩrĩa yaigĩtwo igũrũ rĩacio, akĩmĩtemengithia; o na Maashera, o na mĩhianano ya gwacũhio na ya gũtwekio, akĩmiunangithia tũcunjĩ, akĩmĩhehenjithia ĩgĩtuĩka rũkũngũ, akĩrũminjithia mbĩrĩra-inĩ cia andũ arĩa maamĩrutagĩra igongona.
• 5. Namo mahĩndĩ ma athĩnjĩri-Ngai ayo akĩmacinithĩria igongona-inĩ igũrũ; agĩgĩtheria kũu Juda na Jerusalemu.
• 6. Ningĩ ũguo noguo ekire matũũra ma Manase na Efiraimu, o na ma Simeoni, o nginya Nafitali, kũu kwarĩ o maganjo.
• 7. Agĩcoka akiunangithia igongona, na akĩhũrangithia Maashera, o na mĩhianano ya gwacũhio, akĩmĩhehenjangithia ĩgĩtuĩka mũtutu, o na agĩtemengithia mĩhianano yothe ya riũa bũrũri wothe wa Isiraeli, agĩgĩcoka Jerusalemu.
• 8. Na rĩrĩ, mwaka wa ikũmi na ĩnana ĩrĩa aakorirũo athamakĩte, o hĩndĩ ĩrĩa aakorirũo atheretie bũrũri ũcio, o na nyũmba ya Ngai-rĩ, akĩrekia Shafani wa Azalia, na Maaseia, barũthi wa itũũra, na Joa wa Joahazu, mwandĩki maũndũ ma ihinda rĩu, magacokererie nyũmba ya Jehova, Ngai wake, kũrĩa yatharũkĩte.
• 9. Nao magĩkinya he Hilikia, mũthĩnjĩri-Ngai ũrĩa mũnene, makĩmũnengera mbia iria ciatwarĩtwo kũu nyũmba ya Ngai, o icio Alawii arĩa maaikaragia mũrango maahothithĩtie harĩ Amanase, o na Aefiraimu, o na harĩ matigari mothe ma andũ a Isiraeli, o na harĩ Ajuda othe na Abenjamini, o na andũ arĩa maatũũraga Jerusalemu.
• 10. Nao magĩcinengera aruti wĩra arĩa arori a nyũmba ya Jehova; nao andũ arĩa maarutaga wĩra kũu nyũmba ya Jehova thĩinĩ magĩcineana ithondekithie nyũmba ĩo, o na imĩcokererithie kũrĩa yatharũkĩte;
• 11. naguo ũguo nĩ ta kuuga magĩcinengera atharamara, o na aaki, nĩguo magũre mahiga maicũhie, o na mĩratho, o na mahaarĩrie mĩtĩ mĩtungu ya gwĩkĩrũo nyũmba iria athamaki a Juda maatharĩtie.
• 12. Nao andũ acio magĩkĩruta wĩra ũcio o wega mehokekete; nao anyabara ao a kũrutithia wĩra ũcio maarĩ Jahathu na Obadia, Alawii, ariũ a Merari; na Zekaria na Meshulamu, ariũ a Akohathu ningĩ nĩkwarĩ Alawii amwe angĩ arĩa maarĩ ogĩ na kũhũra inanda.
• 13. Ningĩ andũ acio nĩo maarĩ anyabara a arĩa maakuuaga mĩrigo, na nĩo maarutithagia andũ othe wĩra wa mĩthemba yothe ũrĩa warutagwo kũu; o na ningĩ thĩinĩ wa Alawii acio nĩkwarĩ aandĩki-marũa, o na anene a gwathana, o na aikaria mĩrango.
• 14. Na hĩndĩ ĩrĩa maarutaga mbia iria ciatwarĩtwo nyũmba ya Jehova, Hilikia, mũthĩnjĩri-Ngai, akĩona ibuku rĩa watho wa Jehova o ũrĩa waheanĩtwo nĩ Musa.
• 15. Nake Hilikia agĩgĩcokia akĩĩra Shafani, ũcio mwandĩki-marũa atĩrĩ, Nĩndona ibuku rĩa watho gũkũ nyũmba ya Jehova. Nake Hilikia agĩkĩnengera Shafani ibuku rĩu.
• 16. Nake Shafani akĩrĩtwarĩra mũthamaki, agĩcoka akĩhe mũthamaki ũhoro, akĩmwĩra atĩrĩ, Wĩra wothe ũrĩa waheirũo ndungata ciaku-rĩ, nĩiraũruta.
• 17. O nacio mbia iria cionekire nyũmba ya Jehova-rĩ, nĩmacirutĩte ciothe magacinengera anyabara, o na aruti wĩra.
• 18. Ningĩ Shafani, mwandĩki-marũa, akĩhe mũthamaki ũhoro ũyũ, akĩmwĩra atĩrĩ, Hilikia, mũthĩnjĩri-Ngai, nĩaa’nengera ibuku. Nake Shafani agĩgĩthomera maũndũ marĩa maarĩ thĩinĩ warĩo hau mbere ya mũthamaki.
• 19. Na gũgĩkinya atĩrĩ, atĩ mũthamaki aaigua ciugo cia watho ũcio, agĩtembũranga nguo ciake.
• 20. Nake mũthamaki agĩatha Hilikia, na Ahikamu wa Shafani, na Abidoni wa Mika, o na Shafani, mwandĩki-marũa, na Asaia, ndungata ya mũthamaki, akĩmera atĩrĩ,
• 21. Thiĩi mũnduĩrĩrie ũhoro he Jehova twĩ na andũ arĩa matigarĩte Isiraeli o na Juda, ũkoniĩ ciugo cia ibuku rĩrĩ rĩonetwo; nĩ gũkorũo matũkũya ma Jehova marĩa megũitwo igũrũ riitũ nĩ manene mũno, nĩ ũndũ maithe maitũ matiamenyereire ciugo cia Jehova, nĩguo mekage maũndũ mothe marĩa maandĩkĩtwo ibuku-inĩ rĩrĩ.
• 22. Tondũ ũcio Hilikia, o na andũ arĩa maathĩtwo nĩ mũthamaki, magĩthiĩ kwĩ Hulida, mũnabii mũndũ-wa-nja, mũka wa Shalumu, mũrũ wa Tokathu wa Hasara, ũrĩa waikaragia nguo cia mũthamaki; (nake mũtumia ũcio aatũũraga Jerusalemu o handũ harĩa hetagwo Gatũũra ga Kerĩ;) nao magĩkĩaranĩria nake makĩmũhe ũhoro ũcio.
• 23. Nake akĩmera atĩrĩ, Jehova, Ngai wa Isiraeli, oigĩte ũũ: Atĩrĩrĩ, ĩrai mũndũ ũrĩa ũmũrekirie harĩ niĩ ciugo ici:
• 24. Jehova oigĩte ũũ: Atĩrĩrĩ, nĩngarehithĩrie kũndũ gũkũ ũũru, o na ndĩũrehithĩrie andũ arĩa matũũraga kuo, makinyĩrũo nĩ irumi ciothe iria ciandĩkĩtwo ibuku-inĩ rĩu andũ mathomeire mbere ya mũthamaki wa Juda:
• 25. nĩ ũndũ nĩmaatiganire na niĩ, magĩcinĩra ngai ingĩ ũbumba, magĩ’thirĩkia na mawĩra mothe marĩa maarutaga na moko mao nĩguo ndakare; tondũ ũcio matũkũya makwa nĩmagaitwo handũ haha, na matikahorahora.
• 26. No rĩrĩ, ha ũhoro wa mũthamaki wa Juda, ũcio ũmũrekirie mũtuĩrie ũhoro he Jehova-rĩ, mwĩrei ũũ: Atĩrĩrĩ, Jehova, Ngai wa Isiraeli, oigĩte ũũ: Ha ũhoro wa ciugo icio ũiguĩte-rĩ,
• 27. tondũ ngoro yaku nĩyororoire, na ũkĩĩnyihia mbere ya Ngai waigua mohoro make ma ũrĩa ekwenda kũhũra kũndũ gũkũ, hamwe na andũ arĩa magũtũũraga, nawe ũkĩĩnyihia mbere yakwa, ũgĩtembũranga nguo ciaku, ũkĩrĩrĩra maithori mbere yakwa-rĩ, niĩ na niĩ nĩndaigua ũhoro waku; ũguo nĩguo Jehova oiga.
• 28. Atĩrĩrĩ, nĩngagũturanĩra na mathoguo, na nĩũgakuuwo ũtwarũo mbĩrĩra-inĩ yaku na thayũ, o namo maitho maku matikona maũndũ marĩa mothe moru ngarehe kũndũ gũkũ, o na ndehere andũ arĩa magũtũũraga. Nao magĩgĩcokeria mũthamaki ũhoro ũcio.
• 29. Hĩndĩ ĩo mũthamaki agĩkĩrekania akĩũnganithia athuri othe a Juda o na a Jerusalemu.
• 30. Agĩkĩambata agĩkinya nyũmba ya Jehova, me na andũ othe a Juda, o na arĩa maatũũraga Jerusalemu, o na athĩnjĩri-Ngai, na Alawii, o na andũ arĩa angĩ othe, arĩa anene o na arĩa anyinyi; nake akĩmathomera ciugo ciothe cia ibuku rĩu rĩa kĩrĩkanĩro, o rĩu rĩonirũo nyũmba ya Jehova thĩinĩ, nao makĩĩiguĩra na matũ mao.
• 31. Nake mũthamaki akĩrũgama handũ hake, akĩrĩkanĩra kĩrĩkanĩro na Jehova, arĩ mbere yake, gĩa atĩ nĩarĩmũrũmagĩrĩra na amenyagĩrĩre maathani make, o na maũira make, o na irĩra cia watho wake wa kũrũmĩrĩrũo, na ngoro yake yothe, o na muoyo wake wothe, o na ekage mohoro ma kĩrĩkanĩro marĩa maandĩke ibuku-inĩ rĩu.
• 32. Ningĩ agĩtũma atĩ andũ othe arĩa monekire kũu Jerusalemu na Benjamini meĩkĩre ho kĩrĩkanĩro-inĩ kĩu. Nao andũ a Jerusalemu magĩgĩtũũra mekaga maũndũ maringaine na kĩrĩkanĩro kĩu kĩarĩkanĩirũo nĩo na Ngai, o Ngai wa maithe mao.
• 33. Nake Josia agĩkĩeheria maũndũ mothe marĩa me thahu ma mabũrũri ma ciana cia Isiraeli, na agĩtũma atĩ andũ othe arĩa monekire kũu Isiraeli matungatĩre Jehova Ngai wao, o kũmũtungatĩra kũna. Namo matukũ make mothe andũ acio matiigana gũtiga kũrũmĩrĩra Jehova, Ngai wa maithe mao.

Home