Go Back

2 Maũndũ ma Matukũ ma Tene Chapter 28

• 1. Na rĩrĩ, Ahazu aarĩ wa mĩaka mĩrongo ĩĩrĩ hĩndĩ ĩrĩa aambĩrĩirie gũthamaka; agĩthamaka mĩaka ikũmi na ĩtandatũ Jerusalemu; nake ndaigana gwĩka maũndũ marĩa monagwo marĩ mega nĩ Jehova, ta ithe Daudi;
• 2. no rĩrĩ, aarũmĩrĩire mĩthiĩre ya athamaki a Isiraeli, o na akĩĩthondekithĩria mĩhianano ya gũtwekio ya kũhoya Mabaali.
• 3. O na ningĩ agĩcinĩra ũbumba gĩtuamba-inĩ kĩa mũrũ wa Hinomu; o na agĩcina ciana ciake na mwaki, o ta ũrĩa maũndũ marĩa me thahu maatariĩ marĩa mekagwo nĩ ndũrĩrĩ icio Jehova aaingatire biũ ciehere mbere ya ciana cia Isiraeli.
• 4. Ningĩ nĩaakĩrutagĩra magongona, o na agacinĩra ũbumba, matĩri-inĩ mothe ma kũndũ gũtũũgĩru, o na irĩma-inĩ, o na mũtĩ-inĩ ũrĩa wothe mũruru.
• 5. Tondũ ũcio Jehova Ngai wake agĩkĩmũrekereria akĩmũneana moko-inĩ ma mũthamaki wa Suriata; nao makĩmũhũra, o na magĩtaha andũ ake kĩrĩndĩ kĩingĩ, magĩthiĩ nakĩo kĩgwatĩtwo mĩgwate, magĩgĩtwara Dameski. O na ningĩ Ahazu akĩrekererio akĩneanwo moko-inĩ ma mũthamaki wa Isiraeli, o nake akĩmũhũra akĩũraga andũ ake aingĩ mũno.
• 6. Nĩ gũkorũo Peka, mũrũ wa Remalia, oragĩire andũ ngiri igana rĩmwe rĩa mĩrongo ĩĩrĩ o kũu Juda mũthenya o ro ũmwe, nao othe maarĩ njamba theri, nĩ ũndũ nĩmaatiganire na Jehova, Ngai wa maithe mao.
• 7. Nake Zikiri, mũndũ warĩ njamba wa Efiraimu, akĩũraga Maaseia, mũrũ wa mũthamaki, o na Azirikamu, mwathi wa maũndũ ma nyũmba ya mũthamaki, o na Elikana ũrĩa warĩ wa kerĩ thutha wa mũthamaki.
• 8. Nacio ciana cia Isiraeli igĩkĩgwata andũ ngiri magana merĩ thĩinĩ wa ariũ a ithe wao mĩgwate, naho haarĩ andũ-a-nja, na ihĩĩ, o na airĩtu; o na makĩmataha indo nyingĩ; narĩo itaha rĩu maatahire makĩrĩtwara Samaria.
• 9. No rĩrĩ, nĩkwarĩ mũnabii wa Jehova kũu wetagwo Odedi, nake akiumagara agatũnge mbũtũ ya ita ĩrĩa yokĩte Samaria, agĩkĩmĩĩra ũũ: Atĩrĩrĩ, tondũ Jehova Ngai wa maithe manyu nĩaarakaririo nĩ Juda-rĩ, nĩkĩo aamarekereirie akĩmaneana moko-inĩ manyu; na inyuĩ nĩmũmoragĩte na marakara manene, namo magakinya o igũrũ matu-inĩ.
• 10. Na rĩu inyuĩ na inyuĩ mũcirĩire gũtua ciana cia Juda na Jerusalemu ngombo cianyu cia arũme, o na cia andũ-a-nja; githĩ o na inyuĩ mũtikĩrĩ na mahĩtia mũhĩtĩtie Jehova Ngai wanyu?
• 11. Tondũ ũcio thikĩrĩriai ũhoro ũyũ ngũmũhe, mũcokie andũ acio mũgwatĩte mĩgwate a ariũ a ithe wanyu kwao; nĩ gũkorũo matũkũya ma wĩĩ wa Jehova nĩmamũkorete.
• 12. Hĩndĩ ĩo anene amwe a ciana cia Efiraimu, nao nĩo Azaria wa Johanani, na Berekia wa Meshilemothu, na Jehizikia wa Shalumu, na Amasa wa Hadilai, makĩrũgama makaanie andũ acio moimĩte ita-inĩ,
• 13. nao makĩmera atĩrĩ, Andũ aya matahĩtwo mũtikũmatonyia gũkũ; nĩ ũndũ mũcirĩire gwĩka ũndũ wa gũtũma tuonwo tũrĩ ehia nĩ Jehova, naguo ũndũ ũcio wongerere mehia maitũ, o na mahĩtia maitũ; nĩ gũkorũo mahĩtia maitũ nĩ manene, na nĩkũrĩ matũkũya ma wĩĩ wa Ngai megũkora Isiraeli.
• 14. Tondũ ũcio andũ acio meohete indo cia mbaara magĩgĩtiga andũ acio maagwatĩtwo mĩgwate, o na indo iria ciatahĩtwo nĩo, hau mbere ya anene, o na kĩrĩndĩ kĩu gĩothe.
• 15. Nao andũ acio magwetetwo marĩĩtwa mao makĩarahũka makĩnyita andũ acio maagwatĩtwo mĩgwate, nao arĩa othe maarĩ njaga thĩinĩ wao makĩmahumba nguo iria ciatahĩtwo, makĩmekĩra mathaga o na makĩmekĩra iratũ, o na makĩmahe irio cia kũrĩa, o na gĩa kũnyua, na makĩmahaka maguta, o nao arĩa othe ahinyaru thĩinĩ wao makĩmahaicithia ndigiri igũrũ; magĩkĩmatwara Jeriko, itũũra rĩa mĩkĩndũ, kũrĩ ariũ a ithe wao; nao magĩcoka Samaria.
• 16. Na rĩrĩ, ihinda rĩu, Ahazu ũcio mũthamaki agĩkĩrekeria athamaki a Ashuri andũ nĩguo moke mamũteithie.
• 17. Nĩ ũndũ Aedomu nĩmaacokete gũũka kũhũra Juda, na makagwata andũ amwe mĩgwate.
• 18. O nao Afilisiti nĩmaatharikĩte matũũra ma bũrũri ũrĩa mũgũu, o na ma mwena wa Gũthini wa Juda, na nĩmaatunyanĩte Bethi-shemeshu, na Aijaloni, na Gederothu, o na Soko hamwe na tũtũũra twakuo, na Timina hamwe na tũtũũra twakuo, o na Gimizo hamwe na tũtũũra twakuo; nao magatũũra kuo.
• 19. Nĩ ũndũ Jehova nĩaagithirie Juda gĩtĩo nĩ ũndũ wa Ahazu, mũthamaki wa Isiraeli; nĩ gũkorũo nĩaatũmĩte maũndũ ma waganu moneke kũu Juda, o na akĩagarara watho wa Jehova mũno.
• 20. Na rĩrĩ, Tiligathu-pilineseru, mũthamaki wa Ashuri, agĩgĩũka harĩ we, akĩmũnyarira mũno; no rĩrĩ, ndaigana kũmwĩkĩra hinya.
• 21. Nĩ ũndũ Ahazu nĩaakuuire indo imwe cia goro cia nyũmba ya Jehova, o na cia nyũmba ya mũthamaki, o na cia anene ake, agĩcinengera mũthamaki wa Ashuri; no rĩrĩ, gwĩka ũguo gũtiigana kũmũteithia.
• 22. Ningĩ mũthamaki ũcio ti Ahazu, hĩndĩ ĩo aarĩ na thĩna nĩguo aakĩrĩrĩirie kwagarara watho wa Jehova.
• 23. Nĩ ũndũ nĩaarutĩire ngai cia Dameski igongona, o icio ciamũhũrire, akiugaga ũũ: Tondũ ngai cia athamaki a Suriata nĩciamateithirie-rĩ, niĩ o na niĩ ningũcirutĩra igongona, nĩguo indeithie. No rĩrĩ, icio nĩcio ciamũteire o kũmũte biũ, e hamwe na Isiraeli othe.
• 24. Nake Ahazu agĩcokereria indo cia nyũmba ya Ngai, nacio indo icio cia nyũmba ya Ngai agĩcitinangia tũcunjĩ, o na akĩhinga mĩrango ya nyũmba ya Jehova; ningĩ akĩĩthondekera igongona tuune-inĩ tuothe twa Jerusalemu.
• 25. O na matũũra-inĩ mothe ma Juda, itũũra o itũũra, agĩaka matĩri ma kũndũ gũtũũgĩru nĩguo acinagĩre ngai itarĩ cia ma ũbũmba kuo; nake agĩgĩthirĩkia Jehova, Ngai wa maithe, agĩtũma arakare.
• 26. Na rĩrĩ, ciĩko ciake iria ingĩ, o na mĩthiĩre yake yothe, ya mbere o na ya kũrigĩrĩria-rĩ, atĩrĩrĩ, maũndũ macio nĩmaandĩkĩtwo ibuku-inĩ rĩa athamaki a Juda na Isiraeli.
• 27. Nake Ahazu agĩgĩkoma hamwe na maithe, nao andũ makĩmũthika itũũra-inĩ o rĩu rĩa Jerusalemu; nĩ ũndũ matiamũtwarire mbĩrĩra-inĩ cia athamaki a Isiraeli nake Hezekia, mũrũwe, agĩthamaka ithenya rĩake.

Home