Go Back

2 Maũndũ ma Matukũ ma Tene Chapter 26

• 1. Nao andũ othe a Juda magĩkĩoya Uzia, e wa mĩaka ikũmi na ĩtandatũ, makĩmũtua mũthamaki ithenya rĩa ithe, Amazia.
• 2. Nĩwe waakithirie Elothu, akĩrĩcokeria Juda, thutha wa mũthamaki ti Amazia aakoma hamwe na maithe.
• 3. Hĩndĩ ĩo Uzia aambĩrĩirie gũthamaka-rĩ, aakorirũo e wa mĩaka ikũmi na ĩtandatũ, nake agĩthamaka mĩaka mĩrongo ĩtano na ĩĩrĩ kũu Jerusalemu; nake nyina etagwo Jekilia, wa kũu Jerusalemu.
• 4. Nake agĩgĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe maatariĩ marĩa ithe, Amazia, ekĩte.
• 5. Nake agĩkĩgwata kũrongoria Ngai matukũ ma Zekaria, ũrĩa warĩ mũtaarani mũũgĩ maũndũ-inĩ ma cioneki cia Ngai; narĩo ihinda rĩrĩa rĩothe aarongoririe Jehova, Ngai agĩtũma maũndũ make magaacĩre.
• 6. Nake agĩthiĩ kũhũrana mbaara na Afilisiti, agĩtharia rũthingo rũa Gathu, o na rũa Jabine, o na rũa Ashidodu; agĩcoka agĩaka matũũra bũrũri wa Ashidodu, kũu kwa Afilisiti.
• 7. Nake Ngai akĩmũteithia akĩhũrana na Afilisiti, o na Aarabu arĩa maatũire Guri-baali, o na Ameuni.
• 8. Nao Aamoni makĩhe Uzia iheo; narĩo rĩĩtwa rĩake rĩgĩkĩgĩa igweta mũno rĩkĩya gũkinya o itonyero-inĩ rĩa Misiri; nĩ gũkorũo nĩaagĩire na hinya mũno mũno.
• 9. Ningĩ Uzia agĩaka mĩthiringo ya nyũmba ndaya na igũrũ kũu Jerusalemu kĩhingo-inĩ gĩa koine-inĩ, o na kĩhingo-inĩ kĩrĩa kĩrorete Kĩanda, o na rĩĩthiorero-inĩ rĩa rũthingo, agĩciĩkĩra hinya mũno.
• 10. O na agĩaka mĩthiringo ya nyũmba ndaya na igũrũ werũ-inĩ, o na akĩenja marima maingĩ ma maĩ, nĩ ũndũ aarĩ na ũhiũ mũingĩ mũno warĩithagio bũrũri ũrĩa mũgũu, o na werũ wa irĩma-inĩ, ningĩ aarĩ na arĩmi, o na acehi mĩthabibu, maarutaga wĩra irĩma-inĩ, o na mĩgũnda-inĩ ĩrĩa mĩnoru, nĩ ũndũ aarĩ mwendi ũrĩmi mũno.
• 11. O na ningĩ-rĩ, Uzia aarĩ na mbũtũ cia ita cia andũ a kũrũa, nao moimagaraga magathiĩ ita me itungati cia andũ arĩa athure, na magakorũo marĩ atare nĩ Jeieli, ũrĩa mwandĩki-marũa, na Maaseia ũrĩa warĩ mwene wathani; nake mũmatongoria nĩ Hanania, mũnene ũmwe wa ita cia mũthamaki.
• 12. Na rĩrĩ, andũ arĩa maarĩ anene a nyũmba cia maithe mao magĩtarũo othe hamwe, naguo ũguo nĩ ta kuuga andũ arĩa maarĩ njamba ciacio-rĩ, maarĩ ngiri igĩrĩ na magana matandatũ.
• 13. Nao acio nĩo maathaga mbũtũ cia ita cia andũ ngiri magana matatũ na mũgwanja na magana matano, arĩa maarutĩtwo kũrũa mbaara, nao nĩo maateithagia mũthamaki akĩrũa na thũ ciake.
• 14. Nake Uzia agĩthondekithĩria andũ acio othe a ita ngo, na matimũ, na ngũbia cia igera, o na nguo cia igera, o na mota, o na tũhiga twa gũikio na igũtha.
• 15. Ningĩ agĩthondekithia kũu Jerusalemu mĩnyamũ ihaana ta igũtha mĩnene mũno, ĩthugundĩtwo nĩ andũ arĩa ohĩgĩrĩru ũthondeki wayo, nĩguo ĩigagwo igũrũ rĩa mĩthiringo-inĩ ya nyũmba iria ndaya na igũrũ, o na igũrũ rĩa tuune-inĩ twa thingo, nĩ getha mĩguĩ ĩikagio nayo, o na mahiga manene. Nake akĩgĩa igweta inene rĩkĩhunja kũraya, nĩ ũndũ nĩaateithirio mũno mũno, o nginya akĩgĩa na hinya.
• 16. No rĩrĩ, hĩndĩ ĩrĩa aagĩire na hinya, nĩetũũgĩririe ngoro-inĩ, agĩĩka maũndũ moru, akĩagarara watho wa Jehova Ngai wake; nĩ ũndũ nĩaatonyire hekarũ ya Jehova, agacinĩre ũbumba igũrũ rĩa kĩgongona kĩa ũbumba.
• 17. Nake Azaria, mũthĩnjĩri-Ngai, agĩtonya kuo amuumĩte thutha, na agĩkorũo e hamwe na athĩnjĩri-Ngai a Jehova andũ mĩrongo ĩnana arĩa maarĩ njamba;
• 18. nao makĩgiria Uzia ũcio mũthamaki eke ũndũ ũcio, makĩmwĩra atĩrĩ, Ũyũ ti ũhoro waku, wee Uzia, gũcinĩra Jehova ũbumba, no nĩ wa athĩnjĩri-Ngai arĩa ariũ a Haruni, o acio maamũrĩtwo magatherio nĩguo macinage ũbumba; uma handũ haha haamũre, nĩ ũndũ nĩwagararĩte watho, o na ningĩ ũhoro ũcio ndũngĩgũtĩithia he Jehova Ngai.
• 19. Nake Uzia agĩkĩrakara; na agĩkorũo arĩ na rũgĩo rũa gũcinĩra ũbumba aanyitĩte na guoko; na rĩrĩ, hĩndĩ ĩo aakorirũo arakarĩtio nĩ athĩnjĩri-Ngai acio, akiumĩrĩrũo nĩ mangũ thiithi mbere ya athĩnjĩri-Ngai o kũu nyũmba ya Jehova thĩinĩ, mwena-inĩ wa kĩgongona kĩa ũbumba.
• 20. Nake Azaria, mũthĩnjĩri-Ngai ũrĩa mũnene, o na athĩnjĩri-Ngai arĩa angĩ othe, makĩmũrora, makĩona atĩ nĩ mangũ e namo thiithi, nao magĩkĩmũikia na nja narua ehere hau; o nake we mwene akĩhiũha kuuma nja, nĩ gũkorũo Jehova nĩaamũhũrĩte.
• 21. Nake Uzia, ũcio mũthamaki, agĩtũũra e mũrũaru mangũ o nginya hĩndĩ ĩrĩa aakuire, na agĩgĩtũũra nyũmba ĩrĩ iiki e mũndũ wa mangũ, na e mũgirie ndagacoke gũtonya nyũmba ya Jehova; nake Jothamu, mũrũwe, agĩtuĩka mũrori wa maũndũ mothe ma nyũmba ya mũthamaki, agatuithanagia andũ a bũrũri macira mao.
• 22. Na rĩrĩ, ciĩko iria ingĩ cia Uzia, cia mbere o na cia kũrigĩrĩria-rĩ, nĩciandĩkirũo nĩ Isaia, ũrĩa mũnabii, mũrũ wa Amozu.
• 23. Nake Uzia agĩgĩkoma hamwe na maithe; nao andũ makĩmũthika hamwe na maithe gĩthaka-inĩ kũrĩa kwarĩ mbĩrĩra cia athamaki; nĩ gũkorũo moigire atĩrĩ, Nĩ mũndũ wa mangũ; nake Jothamu, mũrũwe, agĩthamaka ithenya rĩake.

Home