Go Back

2 Maũndũ ma Matukũ ma Tene Chapter 24

• 1. Na rĩrĩ, Joashu aarĩ wa mĩaka mũgwanja hĩndĩ ĩrĩa aambĩrĩirie gũthamaka; nake agĩthamaka mĩaka mĩrongo ĩna kũu Jerusalemu; nake nyina etagwo Zibia, wa kũu Biri-shiba.
• 2. Nake Joashu agĩgĩĩka maũndũ marĩa monagwo marĩ mega nĩ Jehova ihinda rĩrĩa rĩothe Jehoiada, mũthĩnjĩri-Ngai, aarĩ muoyo.
• 3. Nake Jehoiada akĩmũhikithĩria airĩtu erĩ matuĩke atumia ake; nake agĩgĩciara ihĩĩ na airĩtu.
• 4. Na gũgĩkinya atĩrĩ, atĩ thutha wa maũndũ macio, Joashu akĩigua ta ekwenda gũcokereria nyũmba ya Jehova kũrĩa yathũkangĩte.
• 5. Nake agĩkĩũngania athĩnjĩri-Ngai o na Alawii, akĩmera atĩrĩ, Thiĩi matũũra ma Juda, mũkahothithie mbia harĩ Aisiraeli othe cia gũcokagĩrĩria nyũmba ya Ngai wanyu mwaka o mwaka, naguo ũndũ ũcio mũũhĩke. No rĩrĩ, Alawii matiigana kũũhĩka.
• 6. Nake mũthamaki agĩgĩĩta Jehoiada mũnene ũcio, akĩmũũria atĩrĩ, Nĩ kĩ kĩanagiria wĩtie Alawii mũhothi, ũhothwo Juda na Jerusalemu, ũrĩa Musa, ndungata ya Jehova, o na kĩrĩndĩ gĩa Isiraeli, moigire ũhothagwo nĩ ũndũ wa hema ya ũira?
• 7. Nĩ gũkorũo ariũ a Athalia, mũka ũcio mwaganu, nĩmaatharĩkĩire nyũmba ya Ngai magĩthiĩ na indo iria ciarĩ kuo, nacio iria ciothe ciaamũrĩirũo nyũmba ya Jehova magĩcitua cia Mabaali.
• 8. Tondũ ũcio mũthamaki agĩgĩatha andũ, nao magĩthondeka ithandũkũ, makĩrĩiga nja mũromo-inĩ wa nyũmba ya Jehova.
• 9. Nao makĩhunjanĩria ũhoro kũu Juda na Jerusalemu guothe, wa atĩ mũhothi wa Jehova ũrehwo, ũcio Musa, ndungata ya Jehova, oigire arĩ werũ-inĩ atĩ ũhothagwo nĩ Isiraeli.
• 10. Nao anene othe, o na andũ othe, magĩgĩkena: nao makĩũtwara, makĩwĩkĩra ithandũkũ-inĩ, o nginya hĩndĩ ĩrĩa maaũrĩkirie.
• 11. Na gũgĩtuĩka atĩrĩ, atĩ ihinda rĩa gũtwara ithandũkũ rĩu harĩ anene a mũthamaki rĩakinya, rĩgĩkuuo nĩ Alawii, nao anene acio mona atĩ rĩĩ na mbia nyingĩ thĩinĩ, mwandĩki-marũa wa mũthamaki, o na mũnene ũrĩa watungatagĩra mũthĩnjĩri-Ngai, magĩciruta ciothe ithandũkũ-inĩ rĩu, magĩthiĩ kũiga, narĩo ithandũkũ makĩrĩcokia handũ harĩo. Ũguo nĩguo maagĩĩkaga mũthenya o mũthenya, gũgĩkĩhothithio mbia nyingĩ mũno.
• 12. Nake mũthamaki me na Jehoiada magĩcinengera arĩa mehokeirũo wĩra ũcio wa nyũmba ya Jehova; nao magĩkĩandĩka aaki na mahiga, na atharamara, nĩguo macokererie nyũmba ĩo ya Jehova. O na makĩandĩka aturi a igera o na a icango, nĩ getha o nao macokererie nyũmba ĩo ya Jehova.
• 13. Tondũ ũcio aruti acio a wĩra magĩkĩũruta, naguo wĩra ũcio wa gũcokereria nyũmba ĩo ũkĩrĩkio biũ nĩo; magĩaka nyũmba ĩo ya Ngai ĩgĩtuĩka o ta ũrĩa yatariĩ tene, makĩmĩaka nũmu mũno.
• 14. Na rĩrĩ, maarĩkia wĩra ũcio-rĩ, magĩgĩtwara mbia iria ciatigarire he mũthamaki o na Jehoiada, nacio igĩcoka gũthondekwo ituĩke indo cia nyũmba ya Jehova, naguo ũguo nĩ ta kuuga indo cia kũrutagwo wĩra nacio, na cia wĩra wa magongona, na iciko, o na indo ingĩ cia thahabu na betha. Nao magĩgĩtũũra marutagĩra mahaki ma njino kũu nyũmba ya Jehova hĩndĩ ciothe matukũ mothe marĩa Jehoiada aarĩ muoyo.
• 15. No rĩrĩ, Jehoiada nĩaakũrire mũno akĩnina matukũ maingĩ, agĩkua; nake aakuire arĩ wa mĩaka igana rĩa mĩrongo ĩtatũ.
• 16. Nao andũ makĩmũthika kũu itũũra rĩa Daudi hamwe na athamaki, nĩ ũndũ nĩekĩte Isiraeli maũndũ mega o na agatabarĩra maũndũ ma Ngai, o na ma nyũmba yake.
• 17. Na rĩrĩ, Jehoiada aarĩkia gũkua, anene a Juda magĩthiĩ, makĩinamĩrĩra mũthamaki makĩmwĩnyihĩria. Nake mũthamaki agĩkĩmaigua.
• 18. Nao magĩgĩte nyũmba ya Jehova, Ngai wa maithe mao, magĩcoka gũtungatĩra Maashera, o na mĩhianano ĩngĩ; namo marakara ma Jehova magĩgĩkinyĩra Juda na Jerusalemu nĩ ũndũ wa wĩhia ũcio wao.
• 19. No rĩrĩ, o na gwatuĩka ũguo, Jehova nĩaamarekeirie anabii, nĩ getha mamacokie harĩ we; nao makĩmakaania, no nĩmaaregire kũmaigua.
• 20. Nake Roho wa Ngai agĩkora Zekaria, mũrũ wa Jehoiada, mũthĩnjĩri-Ngai; nake agĩkĩrũgama mbere ya andũ handũ hokĩrĩirie, akĩmera atĩrĩ, Ngai oigĩte ũũ: Atĩrĩrĩ, nĩ kĩ gĩtũmĩte mwagarare maathani ma Jehova, mũkaaga kũgaacĩra? Na rĩrĩ, tondũ nĩmũtigĩte Jehova, o nake nĩamũtigĩte.
• 21. Nao magĩkĩgĩa ndundu mamũũkĩrĩre, nao maathwo nĩ mũthamaki, makĩmũhũrĩra na mahiga nyuguto o hau nja ya nyũmba ya Jehova.
• 22. Ũguo nĩguo Joashu, ũcio mũthamaki, ataaririkanire maũndũ mega ma tha marĩa ekĩtwo nĩ Jehoiada, ithe wa Zekaria, no nĩ kũũraga oragire mũrũwe. Nake hĩndĩ ĩo aakuaga, akiuga atĩrĩ, Jehova nĩarore ũndũ ũyũ, na aũũrie!
• 23. Na gũgĩkinya atĩrĩ, atĩ mwaka ũcio wathira, mbũtũ ya ita ya Asuriata ĩkĩambata ĩkahũrane na Joashu; ĩgĩkinya Juda na Jerusalemu, ĩkĩnina anene othe a andũ; nacio indo ciothe iria yatahire, ĩgĩcitwarĩra mũthamaki wa Dameski.
• 24. Nĩ ũndũ mbũtũ ĩo ya ita ya Asuriata yathiĩte kũu ĩĩ gĩkundi kĩnyinyi kĩa andũ, nake Jehova agĩkĩrekereria mbũtũ nene mũno ya ita akĩmĩneana moko-inĩ mayo; nĩ ũndũ andũ acio nĩmaatiganĩte na Jehova, Ngai wa maithe mao. Ũguo nĩguo maaherithirie Joashu.
• 25. Na rĩrĩa mbũtũ ĩo yacokire kũinũka ĩkĩmweherera, (nĩ ũndũ nĩyamũtigire e mũrũaru mĩrimũ mĩnene mũno-rĩ,) ndungata ciake we mwene ikĩgĩa ndundu ya kũmũũkĩrĩra nĩ ũndũ wa thakame ya mũrũ wa Jehoiada, mũthĩnjĩri-Ngai, igĩkĩmũũragĩra o kũu ũrĩrĩ-inĩ wake, nake agĩkua; nacio ikĩmũthika o kũu itũũra rĩa Daudi, no itiamũthikire mbĩrĩra-inĩ cia athamaki.
• 26. Nao arĩa maagĩire ndundu ya kũmũũkĩrĩra nĩ aya; nĩ Zabadi, mũrũ wa Shimeathu mũndũ-wa-nja Mũamoni, na Jehozabadu, mũrũ wa Shimurithu mũndũ-wa-nja Mũmoabi.
• 27. Na rĩrĩ, ha ũhoro ũkoniĩ ariũ ake, o na wa maũndũ marĩa manene maaheanirũo ma kũmũkaania, o na wa ũrĩa aacokereirie nyũmba ya Ngai, akĩmĩaka-rĩ, atĩrĩrĩ, maũndũ macio nĩmaandĩkĩtwo ibuku-inĩ rĩa ũtaũranĩri wa maũndũ ma athamaki. Nake Amazia mũrũwe agĩthamaka ithenya rĩake.

Home