Go Back

2 Maũndũ ma Matukũ ma Tene Chapter 23

• 1. Na rĩrĩ, mwaka wa mũgwanja-rĩ, Jehoiada agĩkĩĩĩkĩra hinya, akĩoya anene a athigari igana, nao nĩ Azaria wa Jerohamu, na Ishumaeli wa Jehohanani, na Azaria wa Obedi, na Maaseia wa Adaia, na Elishafati wa Zikiri, akĩrĩkanĩra kĩrĩkanĩro nao.
• 2. Nao magĩgĩthiĩ kũndũ guothe kũu Juda, makĩũngania Alawii matũũra-inĩ mothe ma Juda, o na anene a nyũmba cia maithe ma andũ a Isiraeli, magĩcoka magĩkinya Jerusalemu.
• 3. Nakĩo kĩrĩndĩ kĩu gĩothe kĩa andũ gĩkĩrĩkanĩra kĩrĩkanĩro na mũthamaki kũu nyũmba ya Ngai thĩinĩ. Nake Jehoiada akĩmera ũũ: Atĩrĩrĩ, mũrũ wa mũthamaki nĩwe ũyũ; na nĩwe ũgũthamaka, o ta ũrĩa Jehova aarĩtie ũhoro ũkoniĩ ariũ a Daudi.
• 4. Ũndũ ũrĩa mũgũgĩĩka nĩ ũyũ, atĩ gĩcunjĩ gĩa gatatũ gĩa athĩnjĩri-Ngai o na Alawii arĩa marĩtonya gũkũ mũthenya wa thabatũ kĩrangĩre mũromo;
• 5. nakĩo gĩcunjĩ kĩrĩa kĩngĩ gĩa gatatũ kĩrangĩre nyũmba ya mũthamaki; nakĩo gĩcunjĩ kĩrĩa kĩngĩ gĩa gatatũ o ro ũguo, kĩrangĩre kĩhingo-inĩ gĩa gĩtina; nao andũ arĩa angĩ othe maikare o kũu nja cia nyũmba ya Jehova.
• 6. No mũtikanareke mũndũ atonye nyũmba ya Jehova tiga o athĩnjĩri-Ngai, na Alawii arĩa megũtangata kuo; acio nĩmatonye nĩ ũndũ nĩ aamũre; no rĩrĩ, andũ arĩa angĩ othe nĩmaikare o makĩrangagĩra nĩ ũndũ wa Jehova.
• 7. Nao Alawii marigicĩrie mũthamaki na mĩena yothe, o mũndũ anyitĩte indo ciake cia mbaara na guoko, na mũndũ ũngĩ o na ũrĩkũ ũrĩa ũrĩtonya nyũmba nĩoragwo; na mũikarie mũthamaki agĩtonya nyũmba thĩinĩ, o na akiuma nja.
• 8. Nao Alawii o na Ajuda othe magĩĩka kũringana na maũndũ mothe marĩa Jehoiada mũthĩnjĩri-Ngai amaathĩte, nao o mũndũ agĩkĩoya andũ ake, arĩa maarĩ a kwambĩrĩria wĩra wao kũu mũthenya ũcio wa thabatũ, hamwe na arĩa maarĩ a kũinũka mũthenya ũcio wa thabatũ; nĩ gũkorũo Jehoiada ndetĩkĩririe acio maaninĩte ituanĩra rĩao methiĩre.
• 9. Nake Jehoiada ũcio mũthĩnjĩri-Ngai agĩkĩrutĩra anene arĩa maathaga athigari igana matimũ, na tũko, o na ngo nene iria ciarĩ cia mũthamaki Daudi, o iria ciaigĩtwo kũu nyũmba ya Ngai.
• 10. Nake agĩkĩarania andũ othe wega, o mũndũ anyitĩte indo ciake cia mbaara na guoko, kuuma o mwena wa ũrĩo wa nyũmba ĩo, o nginya mwena wa ũmotho wayo, megiritanĩtie na kĩgongona, o na nyũmba ĩo, o na marĩ hakuhĩ na mũthamaki mamũrigicĩirie.
• 11. Hĩndĩ ĩo magĩkĩruta mũrũ wa mũthamaki, makĩmũigĩrĩra tanji mũtwe, na makĩmũnengera ibuku rĩa ũira, nao makĩmũtua mũthamaki; nake Jehoiada na ariũ ake makĩmũitĩrĩria maguta, makiuga atĩrĩ, Ngai arotũũria mũthamaki witũ!
• 12. Nake Athalia aaigua inegene rĩa andũ magĩteng’era makĩgoocaga mũthamaki-rĩ, agĩgĩtonya harĩ andũ acio kũu nyũmba ya Jehova thĩinĩ,
• 13. agĩcũthĩrĩria, akĩona atĩ mũthamaki nĩ kũrũgama aarũgamĩte handũ hatũũgĩru igũrũ hau itonyero-inĩ rĩa nyũmba, nao anene a athigari o na ahuhi macoro magakuhĩhĩria mũthamaki, nao andũ othe a bũrũri ũcio magagĩkena, makĩhuhaga tũrumbeta, o nao aini magatongoria andũ arĩa maainaga nyĩmbo cia kũgooca Jehova makĩhũraga inanda. Hĩndĩ ĩo Athalia agĩgĩtembũranga nguo ciake, akĩanĩrĩra na mũgambo mũnene, akiuga atĩrĩ, Ĩno nĩ ndundu ya njikanĩrĩrio! Hĩ! Nĩ ndundu ya njikanĩrĩrio!
• 14. Nake Jehoiada, mũthĩnjĩri-Ngai, agĩgĩĩtithia anene a athigari igana igana, arĩa maaigĩtwo marorage mbũtũ cia ita, akĩmera atĩrĩ, Nĩagerio gatagatĩ ka mĩhari ya andũ, na mũndũ o wothe ũrĩa ũrĩmũrũmĩrĩra nĩoragwo na rũhiũ rũa njora; nĩ ũndũ mũthĩnjĩri-Ngai oigire atĩrĩ, Menyai mũmũũragĩre gũkũ nyũmba ya Jehova.
• 15. Tondũ ũcio magĩkĩmweherera nake agĩkinya itonyero-inĩ rĩa kĩhingo kĩa mbarathi o kũu nyũmba ya mũthamaki; nao makĩmũũragĩra ho.
• 16. Nake Jehoiada agĩkĩrĩkanĩra na andũ othe, o na mũthamaki, atĩ nĩmegũtuĩka andũ a Jehova.
• 17. Nao andũ othe magĩgĩthiĩ nyũmba ya Baali, makĩmĩtharia, o na makiunanga igongona ciayo, o na mĩhianano yayo; o nake Matani, mũthĩnjĩri-Baali makĩmũũragĩra o hau mbere ya igongona ciayo.
• 18. Nake Jehoiada agĩcoka agĩtua andũ amwe anene matuĩke arori a nyũmba ya Jehova, nao maroragwo nĩ athĩnjĩri-Ngai arĩa Alawii, o arĩa Daudi aagayũkanĩirie kũu nyũmba ya Jehova, nĩguo marutagĩre Jehova mahaki ma njino, o ta ũrĩa kwandĩkĩtwo watho-inĩ wa Musa, o makĩinaga na magĩkenaga, o ta ũrĩa ũtabarĩri wa Daudi watariĩ.
• 19. Ningĩ akĩiga andũ a gũikaria mĩrango ya nyũmba ya Jehova, nĩ getha gũtigatonye mũndũ o na ũrĩkũ wĩ thahu uumanĩte na ũndũ o na ũrĩkũ.
• 20. Nake agĩkĩoya anene a andũ igana, o na aathani, o na abarũthi ao, o na andũ othe a bũrũri ũcio, nao magĩikũrũkia mũthamaki mamũrutĩte nyũmba ya Jehova; nao magĩkĩgera kĩhingo-inĩ kĩa mwena wa igũrũ, magĩkinya nyũmba ya mũthamaki, magĩikarĩria mũthamaki gĩtĩ gĩa ũthamaki.
• 21. Tondũ ũcio andũ othe a bũrũri magĩgĩkena, narĩo itũũra rĩgĩikara rĩtarĩ na ngũĩ; nao makĩũraga Athalia na rũhiũ rũa njora.

Home