Go Back

2 Maũndũ ma Matukũ ma Tene Chapter 15

• 1. Na rĩrĩ, roho wa Ngai nĩwakorire Azaria wa Odedi, ũgĩkĩgĩa nake.
• 2. Nake agĩkiumagara agatũnge Asa, akĩmwĩra ũũ: Atĩrĩrĩ, Asa, o na inyuĩ Ajuda inyuothe, o na Abenjamini, ta ’thikĩrĩriai; Jehova arĩikaraga hamwe na inyuĩ hĩndĩ ĩrĩa o na inyuĩ mũikarĩte hamwe nake; na mũngĩmũrongoria, nĩmũrĩmuonaga; no mũngĩtigana nake-rĩ, o nake nĩekũmũtiga.
• 3. Kwĩ ihinda iraya rĩathirire Aisiraeli maikarĩte matarĩ na Ngai ũrĩa wa ma, na matarĩ na mũthĩnjĩri-Ngai wa kũmaruta maũndũ, na matarĩ na watho wa kũrũmĩrĩrũo;
• 4. no rĩrĩ, hĩndĩ ĩrĩa maacokereire Jehova, Ngai wa Isiraeli, nĩ ũndũ wa mathĩna marĩa maamakorire, nĩonekire nĩo.
• 5. Namo mahinda macio gũtiarĩ thayũ harĩ mũndũ ũrĩa ũkuumagara, o na kana ũrĩa ũkũinũka na mũciĩ, no rĩri, andũ othe arĩa maatũũraga bũrũri ũyũ nĩmaakoragwo nĩ maũndũ maingĩ ma kũmanyarira.
• 6. Nao magĩgĩikara o ta mahehenjangĩtwo biũ, o rũrĩrĩ rũgokĩrĩra rũrĩa rũngĩ, na itũũra rĩgokĩrĩra rĩrĩa rĩngĩ nĩ ũndũ Ngai nĩaamanyaririthĩtie na mĩnyarirĩko ya mĩthemba yothe.
• 7. No rĩrĩ, inyuĩ gĩai na hinya, na mũtikareke moko manyu magũũtare; nĩ gũkorũo wĩra wanyu nĩũkaheanĩrũo mũcara waguo.
• 8. Na rĩrĩ, hĩndĩ ĩrĩa Asa aaiguire ciugo icio, o cia ũrathi wa Odedi ũcio mũnabii, akĩĩũmĩrĩria, akĩeheria maũndũ marĩa me thahu kũu bũrũri wothe wa Juda na Benjamini, o na matũũra mothe marĩa aatunyanĩte ma bũrũri ũrĩa wĩ irĩma nyingĩ wa Efiraimu; nake agĩgĩcokereria kĩgongona kĩa Jehova kĩrĩa kĩarĩ mbere ya gĩthaku kĩa Jehova agĩkĩerũhia.
• 9. Nake agĩkĩũnganithia andũ othe a Juda na Benjamini, o na andũ arĩa maatũũranĩtie nao moimĩte mabũrũri ma Efiraimu na Manase, o na bũrũri wa Simeoni; nĩ gũkorũo andũ arĩa metwarire kũrĩ we moimĩte kũu Isiraeli nĩmaaingĩhire mũno mona atĩ Jehova Ngai wake e hamwe nake.
• 10. Tondũ ũcio magĩkĩũngana kũu Jerusalemu mweri wa ĩtatũ wa mwaka wa ikũmi na ĩtano ĩrĩa Asa aakorirũo athamakĩte.
• 11. Naguo mũthenya ũcio makĩrutĩra Jehova igongona rĩa ndegwa magana mũgwanja, o na mbũri ngiri mũgwanja thĩinĩ wa indo iria maatahĩte.
• 12. Nao magĩkĩrĩkanĩra kĩrĩkanĩro gĩa atĩ nĩmegũtũũra marongoragia Jehova, Ngai wa maithe mao, na ngoro ciao ciothe, o na mĩoyo yao yothe;
• 13. ningĩ magĩtua atĩ mũndũ o wothe ũrĩa ũkaaga kũrongoria Jehova, Ngai wa Isiraeli, nĩ kũũragwo akoragwo, o na angĩkorũo arĩ mũnyinyi kana mũnene, o na kana arĩ mũndũ mũrũme, kana mũndũ-wa-nja.
• 14. Nao makĩĩhĩtĩra mwĩhĩtwa o hau harĩ Jehova na mĩgambo mĩnene, o na makĩanĩrĩra mũno, o na makĩhuha tũrumbeta, o na macoro.
• 15. Nao andũ othe a Juda magĩkenera mwĩhĩtwa ũcio mehĩtire, nĩ gũkorũo nĩmehĩtĩte na ngoro ciao ciothe, o na makĩmũrongoria mendete mũno gwĩka ũguo; nake agĩkioneka nĩo; nake Jehova agĩkĩmahe ũhurũko na mĩena yothe.
• 16. Nake Asa, ũcio mũthamaki, agĩthengia nyina, Maaka, atige gũcoka gũtuĩka mũthamaki mũndũ-wa-nja, nĩ ũndũ nĩaathondekithĩtie mũhianano wĩ thahu wa gũtuwo Ashera; nake Asa agĩtemenga mũhianano ũcio aahandĩte, akĩũgũithia thĩ, akĩũhehenja ũgĩtuĩka rũkũngũ, akĩũcinĩra karũũĩ-inĩ karĩa getagwo Kidironi.
• 17. No rĩrĩ, matĩri ma kũndũ gũtũũgĩru matiathengirio kũu Isiraeli; no o na gwatuĩka nĩ ũguo-rĩ, ngoro ya Asa yarĩ nginyanĩru matukũ make mothe.
• 18. Nacio indo iria ithe aamũrĩire Ngai, agĩcitwara nyũmba ya Ngai thĩinĩ, hamwe na indo iria aamũrĩire Jehova we mwene, nacio ciarĩ betha, na thahabu, o na indo ingĩ.
• 19. Na rĩrĩ, kũu gũtiigana gũcoka kũgĩa mbaara nginya o mwaka wa mĩrongo itatũ na ĩtano ĩrĩa Asa aathamakire.

Home