Go Back

2 Maũndũ ma Matukũ ma Tene Chapter 12

• 1. Na gũgĩkinya atĩrĩ, atĩ hĩndĩ ĩrĩa ũthamaki wa Rehoboamu wehandire ũkĩrũma wega, o na akĩgĩa na hinya-rĩ, agĩgĩtiga kũrũmĩrĩra watho wa Jehova, nao Aisiraeli othe magĩkorũo me hamwe nake ũhoro-inĩ ũcio.
• 2. Gũgĩgĩkinya atĩrĩ, atĩ mwaka wa ĩtano ĩrĩa Rehoboamu aakorirũo athamaikĩte, Shishaka, mũthamaki wa Misiri, akĩambata akahũrane na Jerusalemu,
• 3. e na ngari cia ita magana ikũmi na merĩ, o na andũ ngiri mĩrongo ĩtandatũ arĩa maathiaga mahaicĩte mbarathi; nĩ ũndũ andũ akuo nĩmaagararĩte watho wa Jehova; nao andũ arĩa maatwaranire nake moimĩte Misiri, Alubi, o na Asukii, o na Akushi, matiatarĩkaga.
• 4. Nake agĩgĩtunyana matũũra maairigĩtwo marĩa maarĩ ma Juda, agĩcoka agĩkinya Jerusalemu.
• 5. Na rĩrĩ, Shemaia ũrĩa mũnabii agĩthiĩ he Rehoboamu, o na harĩ anene a Juda arĩa monganĩte Jerusalemu nĩ ũndũ wa Shishaka, akĩmera atĩrĩ, Jehova oigĩte ũũ: Atĩrĩrĩ, nĩmũtiganĩte na niĩ, na tondũ ũcio niĩ o na niĩ nĩndĩmũtigĩte mũhũrũo nĩ Shishaka.
• 6. Hĩndĩ ĩo anene a Isiraeli, o na mũthamaki, magĩkĩĩnyihia; nao makiuga atĩrĩ, Jehova nĩwe mũthingu.
• 7. Na rĩrĩ, hĩndĩ ĩrĩa Jehova onire atĩ nĩmenyihĩtie-rĩ, ndũmĩrĩri ya Jehova ĩgĩgĩkinyĩra Shemaia, akĩĩrũo atĩrĩ, Nĩmenyihĩtie; ndimanina, no nĩngwĩtĩkĩra kũmahonokia matukũ manyinyi maathira, namo marakara makwa matiitwo Jerusalemu na ũndũ wa guoko gwa Shishaka.
• 8. No rĩrĩ, nĩmegũtuĩka ndungata ciake; nĩ getha mone harĩa ngũũrani ĩrĩ ya kũndungatĩra niĩ, na gũtungatĩra athamaki a mabũrũri.
• 9. Tondũ ũcio Shishaka, mũthamaki wa Misiri, akĩambata akĩhũrana na Jerusalemu, agĩtunyana mũthithũ wa indo cia bata iria ciaigĩtwo nyũmba ya Jehova, o na mũthithũ-inĩ wa nyũmba ya mũthamaki; indo icio ciothe-rĩ, agĩgĩthiĩ nacio, o na agĩthiĩ na ngo ciothe cia thahabu iria Suleimani aathondekithĩtie.
• 10. Nake Rehoboamu, mũthamaki, agĩgĩthondekithia ngo ingĩ cia gĩcango ithenya rĩa icio cia mbere, agĩcinengera anene a andũ arĩa maarangaga mũrango-inĩ wa nyũmba ya mũthamaki.
• 11. Na gũgĩtuĩka atĩrĩ, atĩ mathiĩ mothe marĩa mũthamaki aathiaga gũtonya nyũmba ya Jehova, arangĩri acio magathiĩ kuo magacikuua, na thutha wa ũguo magacicokia kanyũmba karĩa gaatũũragwo nĩ arangĩri acio.
• 12. Na hĩndĩ ĩrĩa enyihirie-rĩ, marakara ma Jehova magĩtiga kũmũkora, nĩguo ndakamũnine; o na ningĩ nĩkwarĩ maũndũ mamwe mega monekaga kũu Juda.
• 13. Tondũ ũcio mũthamaki Rehoboamu agĩkĩĩĩkĩra hinya kũu Jerusalemu, agĩthamaka kuo; nĩ gũkorũo Rehoboamu aarĩ wa mĩaka mĩrongo ĩna na ũmwe hĩndĩ ĩrĩa aambĩrĩirie gũthamaka, nake agĩthamaka mĩaka ikũmi na mũgwanja kũu Jerusalemu, itũũra rĩrĩa Jehova aathurĩte mĩhĩrĩga-inĩ yothe ya Isiraeli nĩguo rĩĩtwa rĩake rĩikarage kuo nake nyina etagwo Naama, Mũamoni.
• 14. Nake nĩekaga maũndũ moru, nĩ ũndũ ndaigana kũroria ngoro yake ũhoro-inĩ wa kũrongoria Jehova.
• 15. Na rĩrĩ, ciĩko cia Rehoboamu, cia mbere o na cia kũrigĩrĩria-rĩ, anga itiandĩkĩtwo ũhoro-inĩ wa maũndũ ma njiarũa cia matukũ macio marĩa maandĩkirũo nĩ Shemaia ũrĩa mũnabii, o na Ido ũrĩa muoni maũndũ? Na rĩrĩ, Rehoboamu na Jeroboamu maatũire mahũranaga mbaara hĩndĩ ciothe.
• 16. Nake Rehoboamu agĩkoma hamwe na maithe, agĩthikwo itũũra rĩa Daudi; nake Abija, mũrũwe, agĩthamaka ithenya rĩake.

Home