Go Back

1 Maũndũ ma Matukũ ma Tene Chapter 28

• 1. Nake Daudi agĩkĩũnganithia anene othe a Isiraeli, nao nĩo anene a mĩhĩrĩga, o na anene a matuanĩra ma andũ arĩa maatungatagĩra mũthamaki, o na anene a andũ ngiri o ngiri, o na anene a andũ igana o igana, o na arori arĩa maaroraga indo ciothe, o na mahiũ mothe, ma mũthamaki na ma ariũ ake, o na anene arĩa mehokeirũo maũndũ ma nyũmba yake, o na njamba, naguo ũguo nĩ ta kuuga njamba ciothe iria irĩ hinya, mathiĩ kũrĩ we o kũu Jerusalemu.
• 2. Hĩndĩ ĩo mũthamaki Daudi akĩarahũka akĩrũgama, akiuga atĩrĩ, Ta ’thikĩrĩriai, inyuĩ ariũ a ithe witũ, o na andũ akwa; ha ũhoro wakwa-rĩ, ngoro yakwa nĩĩrendete gwaka nyũmba ya kũhurũkia ithandũkũ rĩa kĩrĩkanĩro kĩa Jehova, o na ya gũtuĩka gaturũa ka magũrũ ma Ngai witũ, na ndĩraigithia indo nĩ ũndũ wa gwaka nyũmba ĩo.
• 3. No rĩrĩ, Ngai nĩaanjĩrire atĩrĩ, Wee tiwe ũgaaka nyũmba ĩĩtanĩtio na rĩĩtwa rĩakwa, nĩ gũkorũo wee wĩ mũndũ wa ita, na nĩũitĩte thakame.
• 4. No rĩrĩ, Jehova, Ngai wa Isiraeli, nĩ niĩ aathurire thĩinĩ wa nyũmba yothe ya baba, nduĩke mũthamaki wa gũthamakagĩra Isiraeli tene na tene; nĩ gũkorũo athurĩte Juda atuĩke mũtongoria; ningĩ thĩinĩ wa nyũmba ĩo ya Juda agathura nyũmba ya baba; o na ningĩ thĩinĩ wa ariũ a baba-rĩ, nĩ niĩ aakenirio nĩ niĩ nĩ getha andue mũthamaki wa gũthamakĩra Isiraeli othe;
• 5. na rĩrĩ, thĩinĩ wa ariũ akwa othe, (tondũ Jehova nĩa’heete ihĩĩ nyingĩ-rĩ,) Suleimani mũrũ wakwa nĩwe athurĩte aikarĩre gĩtĩ gĩa ũthamaki wa Jehova athamakĩre Isiraeli.
• 6. Nake agĩkĩnjĩra atĩrĩ, Suleimani, mũrũguo, nĩwe ũgaaka nyũmba yakwa o na nja ciakwa ciayo; nĩ gũkorũo nĩndĩmũthurĩte atuĩke mũrũ wakwa, na niĩ nduĩke ithe.
• 7. Na rĩrĩ, angĩkorũo nĩegũtũũra arũmĩtie maathani makwa, o na matuĩro makwa ma cira, o ta ũrĩa gũtariĩ ũmũthĩ-rĩ, nĩngatũma ũthamaki wake ũikare ũrũmĩte wega tene na tene.
• 8. Na rĩu tondũ wa ũhoro ũcio, menyagĩrĩrai na mũrongoragie maathani mothe ma Jehova Ngai wanyu, Aisiraeli othe me ho makĩĩonagĩra maũndũ macio na maitho mao, o andũ othe a kĩrĩndĩ kĩa Jehova, o na mũkĩiguagwo nĩ Ngai witũ; nĩ getha mũtũũre mwĩgwatĩire bũrũri ũyũ mwega, na mũkaũtigĩra ciana cianyu iria igoka thutha wanyu, ũtuĩke igai rĩacio tene na tene.
• 9. Na rĩrĩ, wee Suleimani, mũrũ wakwa, tũũra ũmenyete Ngai wa thoguo, na ũmũtungatagĩre na ngoro yaku yothe, wĩ na meciria ma kwenda gwathĩka nĩwe; nĩ gũkorũo Jehova atuĩragia maũndũ ma ngoro cia andũ othe, akamenya metarania mothe ma meciria mao. Ũngĩkorũo nĩũrĩmũrongoragia-rĩ, nĩarĩkwĩonithagia; no rĩrĩ, watigana nake, o nake nĩagagũte ũtũũre wĩ mũte tene na tene.
• 10. Gĩĩcirie rĩu, nĩ gũkorũo Jehova nĩagũthurĩte nĩguo wake nyũmba ĩtuĩke handũ hake haamũre; wĩĩkĩre hinya, wĩke ũndũ ucio.
• 11. Hĩndĩ ĩo Daudi agĩkĩnengera Suleimani, mũrũwe, mũhianĩre wa ũrĩa gĩthaku kĩa hekarũ gĩgaakwo, hamwe na nyũmba cia hekarũ, o na wa kũndũ kwayo gwa kũigwo mũthithũ wa indo cia bata, o na wa tũnyũmba twayo twa igũrũ, o na wa tũnyũmba twayo twa na thĩinĩ, o na wa handũ harĩa gĩikaro-gĩa-tha gĩkaigwo;
• 12. o na mũhianĩre wa mwako wothe ũrĩa acirĩire gwaka na ngoro yake, ũkoniĩ nja cia nyũmba ya Jehova, o na ũkoniĩ tũnyũmba tuothe tũrĩa twamĩthiũrũrũkĩirie, o na ũkoniĩ kũndũ gwa kũigwo mũthithũ wa indo cia bata cia nyũmba ya Ngai; o na ũkoniĩ kũndũ gwa kũigwo indo cia bata iria ciamũrĩtwo.
• 13. O na ningĩ akĩmũhe ũhoro wa ũrĩa matuanĩra ma athĩnjĩri-Ngai o na Alawii marĩrũmagĩrĩrũo, o na wa wĩra wothe ũrĩa ũkoniĩ nyũmba ya Jehova, o na wa indo ciothe cia kũrutwo wĩra nacio kũu nyũmba ya Jehova thĩinĩ;
• 14. o na ningĩ akĩmũnengera thahabu ĩthimĩtwo ya kũigana indo iria ingĩthondekwo cia thahabu, o indo ciothe iria ikoniĩ wĩra wa mĩthemba yothe; o na akĩmũnengera betha ĩthimĩtwo ya kũigana indo ciothe cia betha, o indo cia wĩra wa mĩthemba yothe;
• 15. o na thahabu ĩthimĩtwo ya gũthondeka mĩtĩ ya thahabu ya kũigĩrĩrũo matawa, o na matawa mayo, nayo thahabu ĩo ĩgagĩthimwo ya kũigana gũthondeka mũtĩ o mũtĩ wa kũigĩrĩrũo matawa, o na matawa maguo; o na ningĩ akĩmũnengera betha ĩthimĩtwo ya kũigana mĩtĩ ya kũigĩrĩrũo matawa ya betha, mũtĩ o mũtĩ, o na matawa mayo, o ta ũrĩa wĩra ũrĩa warutagwo na mũtĩ o mũtĩ wa kũigĩrĩrũo matawa watariĩ;
• 16. o na ningĩ akĩmũnengera thahabu ĩthimĩtwo ya kũigana metha cia mĩgate ĩrĩa ĩigagwo mbere ya Jehova, metha o metha; o na betha ya kũigana metha cia betha;
• 17. o na thahabu therie mũno ya kũigana gũthondeka njibe cia mĩthece ĩtatũ, o na tũbakũri, o na ikombe; o na ya mbakũri cia thahabu ĩthimĩtwo ya kũigana mbakũri o mbakũri; o na ya mbakũri cia betha ĩthimĩtwo ya kũigana mbakũri o mbakũri;
• 18. o na ningĩ akĩmũnengera thahabu ĩrĩa therie mũno ĩthimĩtwo ya kũigana kĩgongona gĩa gũcinĩrũo ũbumba, o na ningĩ akĩmũnengera thahabu ĩthimĩtwo ya kũigana ngari ya ita ya Jehova o ta ũrĩa mũhianĩre wayo ũtariĩ, naguo ũguo nĩ ta kuuga ya kũigana makerubi marĩa matambũrũkĩtie mathagu mamo, makahumba ithandũkũ rĩa kĩrĩkanĩro kĩa Jehova.
• 19. Nake Daudi agĩkiuga atĩrĩ, Maũndũ macio mothe, naguo ũguo nĩ ta kuuga ũhoro wothe wa mĩhianĩre ĩo-rĩ, ndamenyithirio ũrĩa ingĩmaandĩka nĩ ũndũ wa ũrĩa ndaigĩrĩirũo guoko nĩ Jehova.
• 20. Ningĩ Daudi akĩĩra mũrũwe, Suleimani, atĩrĩ, Gĩa na hinya, na ũũmĩrĩrie; o naguo wĩra ũcio ũũrute; menya wĩtigĩre o na kana ũmake; nĩ gũkorũo Jehova Ngai, o Ngai wakwa, e hamwe nawe; ndarĩ hingo agagũtigĩrĩra, o na kana atigane nawe, o nginya hĩndĩ ĩrĩa wĩra wothe ũrĩa ũkarutwo nĩ ũndũ wa nyũmba ya Jehova ũgathira.
• 21. Na atĩrĩrĩ, maya nĩmo matuanĩra ma athĩnjĩri-Ngai, o na Alawii, makoniĩ wĩra wothe wa nyũmba ya Ngai; ningĩ mũndũ o wothe ũrĩa wĩ na ũũgĩ wa kũruta wĩra wa mĩthemba yothe, ũrĩa wĩendeire wĩra ũcio na ngoro yake-rĩ, akagĩa o hamwe nawe mawĩra-inĩ macio mothe; o na ningĩ atĩrĩ, anene o na andũ arĩa angĩ othe nĩmarĩathĩkaga nĩwe maũndũ-inĩ mothe.

Home