Go Back

1 Maũndũ ma Matukũ ma Tene Chapter 23

• 1. Na rĩrĩ, hĩndĩ ĩo Daudi aakĩrĩ mũkũrũ, na nĩaaninĩte matukũ maingĩ; nake agĩgĩtua Suleimani, mũrũwe, mũthamaki athamakĩre Isiraeli.
• 2. Ningĩ agĩcokanĩrĩria anene othe a Isiraeli hamwe, me na athĩnjĩri-Ngai, o na Alawii.
• 3. Nao Alawii magĩgĩtarũo marutĩtio arĩa maakinyĩtie mĩaka mĩrongo ĩtatũ o na magakĩria hau; nao arĩa monekire maatarũo mĩtwe yao, mũndũ o mũndũ, maarĩ ngiri mĩrongo ĩtatũ na inyanya.
• 4. Nao andũ ngiri mĩrongo ĩĩrĩ na inya thĩinĩ wa andũ acio-rĩ, maatuirũo arori a wĩra wa nyũmba ya Jehova; nao andũ ngiri ithathatũ magĩtuwo aathani, o na aciri;
• 5. nao andũ ngiri inya maarĩ aikaria mĩromo; nao andũ angĩ ngiri inya nĩo a gũkumagia Jehova na inanda cia mĩthemba yothe iria ndathondekithirie, nĩ getha Ngai akumagio nacio. (Ciugo icio nĩ Daudi waaririe.)
• 6. Nake Daudi agĩkĩgayũkania Alawii ikundi ithatũ cia kũruta wĩra o ta ũrĩa ariũ a Lawii maatariĩ, nao nĩo Gerishoni, na Kohathu, na Merari.
• 7. Nao a Agerishoni nĩ aya, Ladani, na Shimei.
• 8. Nao ariũ a Ladani nĩ aya, Jehieli, ũrĩa warĩ mũnene wao, na Zethamu, na Joeli, nĩ atatũ.
• 9. Nao ariũ a Shimei nĩ aya, Shelomothu, na Hazieli, na Harani, nĩ atatũ. Acio nĩo anene thĩinĩ wa nyũmba cia maithe mao cia ariũ a Ladani.
• 10. Nao ariũ a Shimei nĩ aya, Jahathu, na Zina, na Jeushu, na Beria. Acio ana nĩo ariũ a Shimei.
• 11. Nake Jahathu nĩwe warĩ mũnene wao, nake Ziza nĩwe warĩ wa kerĩ; no rĩrĩ, Jeushu na Beria matiarĩ na ihĩĩ nyingĩ, na tondũ ũcio maatuĩkire ta a nyũmba ya ithe ũmwe magĩtaranĩrio hamwe.
• 12. Nao ariũ a Kohathu nĩ aya, Amuramu, na Iziharu, na Hebironi, na Uzieli, nĩ ana.
• 13. Nao ariũ a Amuramu nĩ aya, Haruni, na Musa; nake Haruni nĩaamũrirũo aamũrage indo iria theru mũno agacitheria, we mwene o na ariũ ake, tene na tene, nĩ getha macinagĩre ũbumba mbere ya Jehova o na mamũtungatagĩre, na marathimanage rĩĩtwa-inĩ rĩake, tene na tene.
• 14. No rĩrĩ, ha ũhoro wa Musa mũndũ ũcio wa Ngai-rĩ, ihĩĩ ciake ciagwetanagĩrio na mũhĩrĩga wa Lawii.
• 15. Nao ariũ a Musa nĩ aya, Gerishomu, na Eliezeri.
• 16. Naho ha ũhoro wa ariũ a Gerishomu, Shebueli nĩwe warĩ mũnene wao.
• 17. Naho ha ũhoro wa Eliezeri, Rehabia nĩwe warĩ mũnene wa nyũmba yao. Nake Eliezeri ndaarĩ na ihĩĩ ingĩ o na kĩmwe; no rĩrĩ, ariũ a Rehabia maarĩ aingĩ mũno.
• 18. Naho ha ũhoro wa ariũ a Iziharu, Shelomithu nĩwe warĩ mũnene wao.
• 19. O nao ariũ a Hebironi nĩ aya, Jeria, ũrĩa warĩ mũnene wao, nake Amaria nĩwe wa kerĩ, nake Jahazieli nĩwe wa gatatũ, nake Jekameamu nĩwe wa kana.
• 20. Nao ariũ a Uzieli nĩ aya, Mika ũrĩa warĩ mũnene wao, na Ishia wa kerĩ.
• 21. Nao ariũ a Merari nĩ aya, Mahali, na Mushi. Nao ariũ a Mahali nĩ aya, Eleazaru, na Kishu.
• 22. Nake Eleazaru agĩkua, na ndaarĩ na ihĩĩ, no airĩtu atheri, nao ariũ a ithe wao, ihĩĩ cia Kishu, ikĩmahikia, magĩtuĩka aka a cio.
• 23. Nao ariũ a Mushi nĩ aya, Mahali na Ederi, na Jeremothu, nĩ atatũ.
• 24. Acio nĩo maarĩ ariũ a Lawii o ta ũrĩa nyũmba cia maithe mao ciarũmanĩrĩire, o arĩa maarĩ anene a nyũmba cia maithe mao thĩinĩ wa arĩa maatarirũo ũhoro-inĩ ũcio wa gũtara mĩtwe yao, mũndũ o mũndũ aandĩkĩtwo rĩĩtwa rĩake nao nĩo maarĩ a kũruta wĩra wa gũtungata thĩinĩ wa nyũmba ya Jehova, o arĩa maakinyĩtie mĩaka mĩrongo ĩĩrĩ na magakĩria hau.
• 25. Nĩ gũkorũo Daudi oigire atĩrĩ, Jehova, Ngai wa Isiraeli, nĩaheete andũ ake ũhurũko; nake egũtũũra Jerusalemu tene na tene;
• 26. o na ningĩ Alawii matigacoka kũgĩa na bata wa gũkuuaga gĩikaro kĩa Jehova, o na indo cia wĩra wakĩo ciothe, o na rĩ.
• 27. Nĩ gũkorũo ariũ a Lawii arĩa maakinyĩtie mĩaka mĩrongo ĩĩrĩ o na magakĩria hau maatarirũo na ũndũ wa uuge wa Daudi wa kũrigĩrĩria.
• 28. Nĩ ũndũ wĩra wao warĩ wa kũrutagĩra ariũ a Haruni wĩra, o ũcio warutagwo wa nyũmba ya Jehova, o kũu nja yayo, o na tũnyũmba-inĩ twayo thĩinĩ, o na wa gũtheria indo ciothe iria theru, naguo ũguo nĩ ta kuuga mawĩra mothe marĩa maarutagwo nyũmba-inĩ ya Ngai;
• 29. o na ũhoro-inĩ wa mĩgate ĩrĩa yaigagwo mbere ya Ngai, o na mũtu ũrĩa mwega mũhinyu mũno, nĩ ũndũ wa igongona rĩrĩa rĩrutagwo rĩa mũtu, o na kũngĩtuĩka nĩ gũthondekwo ũthondeketwo ũtuĩke tũmĩgate tũhũthũ tũtekĩrĩtwo ndawa ya kũimbia, o na kana ũrĩa ũkarangĩtwo na rũgĩo, o na kana ũrĩa ũrindĩtwo na maĩ, o mũtu ũthondeketwo wa gũtuĩka mĩgate ya mĩthemba yothe ĩrĩa ĩgũthĩmwo na ũndũ wa ũrĩa ũnene wayo ũtariĩ, o ũrĩa ũigana.
• 30. Ningĩ marũgamage marũcinĩ mothe magĩcokeria Jehova ngatho, o na makĩmũgooca, o na mekage o ro ũguo ningĩ hwaĩ-inĩ;
• 31. o na marutĩre Jehova mahaki mothe ma njino marĩa marutagĩrũo mbere yake, mĩthenya ya thabatũ, o na hĩndĩ yothe ya karũgamo ka mweri, o na hĩndĩ ĩrĩa kũigĩtwo ciathĩ, o ta ũrĩa kĩrĩra gĩacio gĩtariĩ, na matũũre mekaga ũguo mbere ya Jehova tene na tene.
• 32. Na atĩ matũũre matuanagĩra wĩra wa hema-ya-gũtũnganwo, o na wa handũ harĩa haamũre, o na wa gũteithia ariũ a Haruni, o acio a ithe ũmwe nao, wĩra-inĩ wa gũtungata kũu nyũmba ya Jehova.

Home