Go Back

1 Maũndũ ma Matukũ ma Tene Chapter 19

• 1. Na gũgĩkinya atĩrĩ, atĩ thutha wa maũndũ macio, Nahashu, mũthamaki wa ciana cia Amoni, agĩkua, nake mũrũwe agĩthamaka ithenya rĩake.
• 2. Nake Daudi akiuga atĩrĩ, Nĩngwĩka Hanuni, mũrũ wa Nahashu, maũndũ mega ma ũtugi, nĩ ũndũ ithe nake nĩaanjĩkire maũndũ mega ma ũtugi. Na tondũ ũcio Daudi akĩrekia andũ makamũkirie maithori nĩ ũndũ wa gĩkuũ gĩa ithe. Nacio ndungata icio cia Daudi igĩgĩthiĩ, igĩkinya bũrũri wa ciana cia Amoni kwĩ Hanuni ikamũkirie maithori.
• 3. No rĩrĩ, anene a ciana cia Amoni makĩũria Hanuni atĩrĩ, Anga ũgwĩciria atĩ Daudi nĩ gũtĩa atĩĩte thoguo mũno ma, atĩ nĩkĩo akũrekeirie andũ a gũgũkiria maithori? Githĩ ndungata ciake ti gũũka ciũkĩte gũtuĩria maũndũ, o na ing’aũranie bũrũri nĩ ũndũ wa kũũthigana?
• 4. Tondũ ũcio Hanuni akĩnyitithia ndungata icio cia Daudi, agĩcienjithia nderu, o nacio nguo ciacio agĩcitinanĩria na gatagatĩ itina-inĩ, agĩcirekia ciĩthiĩre.
• 5. Hagĩgĩthiĩ andũ makĩhe Daudi ũhoro wa ũrĩa andũ acio mekĩtwo. Nake akĩrekia andũ makamatũnge; nĩ ũndũ andũ acio nĩmaaconorithĩtio mũno mũno. Nake mũthamaki agĩkiuga atĩrĩ, Ikarai o kũu Jeriko o nginya nderu cianyu imere, na hĩndĩ ĩo mũgagĩcoka gũkũ.
• 6. Na rĩrĩ, hĩndĩ ĩrĩa ciana cia Amoni cionire atĩ nĩciĩtuĩte o ta kĩndũ gĩthũũrĩtwo mũno nĩ Daudi-rĩ, Hanuni, o na ciana cia Amoni, magĩtwarithia taranda ngiri cia betha cia ihaki, nĩguo mateithio na ngari cia ita, o na andũ arĩa mathiaga mahaicĩte mbarathi, moimĩte Mesopotamia, o na Aramu-maaka, o na Zoba.
• 7. Magĩkĩhakana magĩteithio na ngari cia ita ngiri mĩrongo ĩtatũ na igĩrĩ, hamwe na mũthamaki wa Maaka, o na andũ ake; nao magĩthiĩ makĩamba hema ciao Medeba. Nacio ciana cia Amoni igĩĩcokanĩrĩria ciumĩte matũũra-inĩ ma cio, igĩgĩthiĩ kũhũrana mbaara.
• 8. Na rĩrĩ, Daudi aaigua ũhoro ũcio, akĩrekia Joabu, o na ita yothe ya andũ arĩa njamba.
• 9. Nacio ciana cia Amoni ikiumagara, ikĩarania ita yacio kĩhingo-inĩ gĩa itũũra; nao athamaki arĩa maathiĩte kũu mbaara-inĩ magĩkorũo marĩ oiki handũ werũ-inĩ.
• 10. Na rĩrĩ, hĩndĩ ĩrĩa Joabu onire atĩ ita nĩyaranĩtio na mbere yake o na thutha wake-rĩ, agĩcokanĩrĩria andũ amwe a Isiraeli, njamba iria thure, akĩmaarania nĩguo mahũrane na Asuriata;
• 11. nao andũ arĩa angĩ akĩmekĩra moko-inĩ ma Abishai, mũrũ wa ithe, o nao akĩmaarania nĩguo mahũrane na ciana cia Amoni.
• 12. Nake agĩkĩĩra Abishai atĩrĩ, Asuriata maangĩria hinya-rĩ, ũkĩndeithie; no ciana cia Amoni ciagũkĩria hinya, nĩngũgũteithia.
• 13. Ũmĩrĩria mũno, tũhũrane ta arũme ki, nĩ ũndũ wa andũ aitũ, o na ũndũ wa matũũra marĩa ma Ngai witũ; nake Jehova aroeka o ta ũrĩa ekuona kwagĩrĩire.
• 14. Tondũ ũcio Joabu, o na arĩa maarĩ hamwe nake, magĩthengerera ita-inĩ, makahũrane na Asuriata; nao Asuriata magĩkĩmũũrĩra.
• 15. Na rĩrĩ, hĩndĩ ĩrĩa ciana cia Amoni cionire atĩ Asuriata mekũũra-rĩ, o nacio ikĩũrĩra Abishai, mũrũ wa ithe, igĩtonya itũũra rĩacio. Hĩndĩ ĩo Joabu agĩthiĩ Jerusalemu.
• 16. Na rĩrĩ, hĩndĩ ĩrĩa Asuriata monire atĩ megũtorio nĩ Isiraeli-rĩ, makĩrekia andũ, makĩgĩrithia Asuriata arĩa maarĩ mũrĩmo ũrĩa ũngĩ wa Rũũĩ rũa Farati, me na Shofaku, mũnene wa ita cia Hadarezeri, amatongoretie.
• 17. Naguo ũndũ ũcio ũkĩĩrũo Daudi; nake agĩgĩcokanĩrĩria Isiraeli othe, nao makĩringa Jorodani, makĩmakorerera makĩarania ita yao mahũrane nao. Na tondũ ũcio hĩndĩ ĩrĩa Daudi aaranirie ita yake okĩrĩre Asuriata-rĩ, magĩkĩhũrana nao.
• 18. Nao Asuriata acio makĩũrĩra Isiraeli; nake Daudi agĩkĩũraga Asuriata a makari ma ita ngiri mũgwanja, o na arĩa maathiaga na magũrũ ngiri mĩrongo ĩna, na akĩũraga Shofaku, mũnene wa ita yao.
• 19. Nacio ndungata cia Hadarezeri ciona atĩ igũtorio nĩ Isiraeli, ikĩara ũhoro na Daudi wa atĩ kũgĩe thayũ; igĩgĩcoka kũmũtungatĩra. Nao Asuriata matiigana gũcoka gwĩtĩkĩra gũteithia ciana cia Amoni o na atĩa.

Home