Go Back

1 Maũndũ ma Matukũ ma Tene Chapter 18

• 1. Na gũgĩkinya atĩrĩ, atĩ thutha wa maũndũ macio, Daudi akĩhũra Afilisiti, akĩmatoria biũ; agĩtunyana Gathu hamwe na matũũra marĩo, akĩrĩruta moko-inĩ ma Afilisiti.
• 2. Ningĩ akĩhũra Amoabi; nao Amoabi magĩtuĩka ndungata cia Daudi makamũhothagĩra mũhothi.
• 3. Ningĩ Daudi akĩhũra Hadarezeri, mũthamaki wa Zoba, akĩmũkinyia Hamathu, e ithiĩro rĩa gũtũma ũthamaki wake ũrũme wega o kũu gũkuhĩ na Rũũĩ rũa Farati.
• 4. Nake Daudi agĩkĩmũtunya ngari cia ita ngiri ĩmwe, o na andũ ngiri mũgwanja arĩa maathiaga mahaicĩte mbarathi, na andũ arĩa metwaraga na magũrũ ngiri mĩrongo ĩĩrĩ; nacio mbarathi ciothe cia ngari agĩcitemenga magũrũ agĩcithuithia, no nĩaatigirie imwe cia kũigana gũkururia ngari igana rĩmwe.
• 5. Na rĩrĩa Asuriata a Dameski maathiire gũteithia Hadarezeri, mũthamaki wa Zoba, Daudi akĩũraga Asuriata ngiri mĩrongo ĩĩrĩ na igĩrĩ thĩinĩ wao.
• 6. Thutha wa ũguo Daudi akĩiga athigari a kũrangĩra kũndũ o kũndũ kũu Suriata ya Dameski; nao Asuriata magĩgĩtuĩka ndungata cia Daudi, makamũhothagĩra mũhothi. Nake Jehova agĩgĩtũma Daudi ahootane kũndũ guothe kũrĩa aathiaga.
• 7. Nake Daudi akĩoya ngo cia thahabu iria ndungata cia Hadarezeri ciarĩ nacio, agĩcitwara Jerusalemu.
• 8. Ningĩ Daudi akĩruta icango nyingĩ mũno Tibihathu, na Kuni, matũũra marĩa ma Hadarezeri, nacio nĩcio Suleimani aathondekire itangi rĩrĩa rĩĩtagwo karia ga gĩcango nacio, o na itugĩ, o na indo iria ingĩ cia gĩcango.
• 9. Na rĩrĩ, hĩndĩ ĩrĩa Tou, mũthamaki wa Hamathu, aaiguire atĩ Daudi nĩaahũrĩte ita yothe ya Hadarezeri, mũthamaki wa Zoba,
• 10. akĩrekia Hadoramu, mũrũwe, he mũthamaki Daudi, akamũgeithie, o na akamũrathimithie, nĩ ũndũ wa ũrĩa maarũite na Hadarezeri akamũhũra biũ; nĩ gũkorũo Hadarezeri na Tou nĩmaagĩaga na mbaara kaingĩ. Nake agĩgĩthiĩ akuuĩte indo cia mĩthemba yothe cia thahabu, o na betha, o na icango.
• 11. O nacio indo icio Daudi agĩciamũrĩra Jehova, hamwe na indo iria ingĩ cia betha, o na cia thahabu, iria aakuuĩte akaruta ndũrĩrĩ-inĩ ciothe; nacio indo icio cioimĩte Edomu, o na Moabi, o na gwa ciana cia Amoni, o na kwa Afilisiti, o na kwa Amaleki.
• 12. O na ningĩ, Abishai, mũrũ wa Zeruia, akĩũragĩra andũ ngiri ikũmi na inyanya a Aedomu o kũu Gĩtuamba gĩa Cumbĩ.
• 13. Nake agĩkĩiga athigari a kũrangĩra kũu Edomu; nao Aedomu othe magĩtuĩka ndungata cia Daudi. Nake Jehova agĩtũma Daudi ahootane kũndũ guothe kũrĩa aathiaga.
• 14. Daudi agĩgĩthamaka bũrũri wothe wa Isiraeli, o na agatuithanagia andũ ake othe macira, namo macira macio akamatuithanagia na kĩhooto.
• 15. Nake Joabu, mũrũ wa Zeruia, nĩwe warĩ mũnene wa mbũtũ cia ita; o nake Jehoshafatu, mũrũ wa Ahiludu, nĩwe warĩ mwandĩki maũndũ ma ihinda rĩu;
• 16. o nake Zadoku, mũrũ wa Ahitubu, na Ahimeleku, mũrũ wa Abiatharu, nĩo maarĩ athĩnjĩri-Ngai; o nake Shavisha nĩwe warĩ mwandĩki-marũa;
• 17. nake Benaia, mũrũ wa Jehoiada, nĩwe warĩ mũrori wa Akerethi na Apelethi; nao ariũ a Daudi nĩo maarĩ anene a gũikarania na mũthamaki.

Home