Go Back

1 Maũndũ ma Matukũ ma Tene Chapter 16

• 1. Nao magĩgĩtonyia ithandũkũ rĩa Ngai, makĩrĩiga o gatagatĩ ka hema ĩrĩa Daudi aambĩte nĩ ũndũ warĩo; makĩrutĩra magongona ma gũcinwo o na ma ũiguano kũu mbere ya Ngai.
• 2. Na rĩrĩ, Daudi aarĩkia kũruta mahaki macio ma njino, o na magongona ma ũiguano, akĩrathima andũ acio rĩĩtwa-inĩ rĩa Jehova.
• 3. Nao andũ a Isiraeli othe, arũme o na andũ-a-nja, mũndũ o mũndũ akĩmahe mũgate ũmwe na gĩcunjĩ kĩa nyama, o na gĩkũmba gĩa thabibu nyũmũ.
• 4. Nake agĩgĩtua Alawii amwe aruti wĩra kũu ithandũkũ rĩa Jehova rĩarĩ, nĩguo maririkanagie andũ maũndũ, o na macokagĩrie Jehova Ngai wa Isiraeli ngatho, o na mamũgoocage;
• 5. nake Asafu nĩwe warĩ mũnene wao, na thutha wake nĩ Zekaria, na Jeieli, na Shemiramothu, na Jehieli, na Matithia, na Eliabu, na Benaia, na Obedi-edomu, na Jeieli, nao maarĩ na inanda cia kĩnubi, o na inanda nene cia mũgeto; nake Asafu aarĩ na thani iria ihũrithanagio ikagamba mũno;
• 6. nao Benaia, na Jahazieli, athĩnjĩri-Ngai, maarĩ na macoro ma kũhuhaga hĩndĩ ciothe, marũgamĩte kũu mbere ya ithandũkũ rĩa Ngai rĩa kĩrĩkanĩro.
• 7. Mũthenya ũcio-rĩ, nĩguo Daudi aambĩrĩirie gũtua ũhoro wa atĩ Jehova acokagĩrio ngatho nĩ Asafu na ariũ acio a ithe gũkĩinagwo nyĩmbo.
• 8. Ĩ gĩcokeriei Jehova ngatho, anĩrĩrai ngumo ya rĩĩtwa rĩake; Ũhoro wa ciĩko ciake ũmenyithiei irĩndĩ ciothe cia thĩ;
• 9. Mũinĩrei, mũmũkumie na nyĩmbo; Kĩheanei ũhoro wa maũndũ mothe ma kũgegania marĩa aaneka.
• 10. Wĩrahei nĩ ũndũ wa rĩĩtwa rĩu rĩake rĩamũre; Ngoro cia arĩa marongoragia Jehova-rĩ, ta nĩikene.
• 11. Rongoragiai Jehova, o naguo hinya wake; Rongoragiai ũthiũ wake o hingo ciothe.
• 12. Ririkanagai maũndũ ma kũgegania marĩa aaneka, Mũkĩririkane morirũ make, o na matuĩro ma kanua gake,
• 13. Inyuĩ mbeũ ya Isiraeli, ndungata yake, O inyuĩ ciana cia Jakubu, inyuĩ andũ ake athure.
• 14. Ũcio nĩwe Jehova, Ngai witũ; Matuĩro make makinyaga gũkũ thĩ guothe.
• 15. Tũũrai mũririkaine kĩrĩkanĩro gĩake tene na tene, O ũhoro ũcio aathanire ũrũmagĩrĩrũo nginya njiaro ngiri,
• 16. O kĩrĩkanĩro kĩu aarĩkanĩire na Iburahimu, O na mwĩhĩtwa o ũrĩa ehĩtire harĩ Isaaka,
• 17. Agĩcoka agĩkĩrũmĩria Jakubu gĩtuĩke watho wa kũrũmagĩrĩrũo, Na gĩtuĩke kĩrĩkanĩro gĩa tene na tene harĩ Isiraeli;
• 18. Akiuga atĩrĩ, Wee nĩwe ngahe bũrũri wa Kanaani, Ũtuĩke igai rĩaku rĩrĩa wathĩrĩirio;
• 19. Na no hĩndĩ ĩrĩa mwarĩ andũ anyinyi mũgĩtarũo; Ĩĩ-ni, anyinyi mũno, o na mũrĩ ageni kuo;
• 20. Na no gũthama maathamangaga makoima rũrĩrĩ-inĩ rũmwe magathiĩ rũrĩrĩ-inĩ rũngĩ, Magakiuma kwa mũthamaki ũyũ magathiĩ rũrĩrĩ-inĩ rũngĩ.
• 21. Ndaarekaga mũndũ o na ũmwe amanyarire, Ĩĩ, ti-itherũ nĩaarũithirie athamaki nĩ ũndũ wao,
• 22. Akiuga atĩrĩ, Menyai mũhutie andũ akwa aya njitĩrĩirie maguta; Anabii aya akwa-rĩ, menyai mũmeke ũũru.
• 23. Inĩrai Jehova, inyuĩ andũ othe a thĩ, Mũhunjagie ũhoro wa kũhonokania gwake mũthenya o mũthenya.
• 24. Mũganage ũhoro wa riri wake ndũrĩrĩ-inĩ, Mawĩko make ma kũgegania mũkĩmaganĩre iruka ciothe,
• 25. Nĩ gũkorũo Jehova nĩ mũnene, na nĩ wa kũgoocwo mũno, We nĩ wa gwĩtigĩrũo gũkĩra ngai ciothe.
• 26. Thima-rĩ, ngai icio ciothe cia irĩndĩ no indo itarĩ kĩene, No Jehova nĩwe wombire igũrũ.
• 27. Mbere-inĩ yake hatũũraga ũtĩĩku o na ũkaru, Kũu gwake gũgagĩtũũra hinya o na gĩkeno.
• 28. Kumiai Jehova, inyuĩ mĩhĩrĩga ya iruka ciothe, Mũkumie Jehova nĩ ũndũ nĩwe wĩ riri na e na hinya.
• 29. Ĩkĩrĩrai Jehova nĩ kũgwetaga rĩĩtwa rĩake rĩĩ riri; Ũkai na ihaki, mũthengerere mbere yake. Inamĩrĩrai Jehova mũmũhoe, mwĩgemetie ũgemu ũrĩa wa ũtheru,
• 30. Inainai mwĩ mbere yake, inyuĩ andũ othe a thĩ. Thĩ nĩ kũrũmia amĩrũmĩtie, o ũndũ ĩtangĩenyenyeka.
• 31. Igũrũ ta nĩrĩkene, thĩ nayo nĩĩcanjamũke; Rekei kuugwo ndũrĩrĩ-inĩ atĩrĩ, Nĩ hĩndĩ Jehova agwatĩte gũthamaka.
• 32. Iria rĩrĩa inene nĩrĩrurume, o na kĩrĩa gĩothe kĩrĩiyũire; Werũ naguo nĩũkenũrũrũke, o na indo ciothe iria irĩ kuo;
• 33. Hĩndĩ ĩo o nayo mĩtĩ ya mũtitũ no ĩkũngũĩre mbere ya Jehova nĩ gũkena, Nĩ ũndũ nĩegũũka gũthamaka thĩ.
• 34. Ĩ gĩcokeriei Jehova ngatho, tondũ nĩ mwega, Tondũ ũtugi wake nĩ wa tene na tene.
• 35. Inyuĩ na inyuĩ ugai atĩrĩ, Tũhonokie, wee Ngai wa ũhonokio witũ, Ũtũcokanĩrĩrie ũtũhonokie harĩ ndũrĩrĩ, Nĩ getha rĩĩtwa rĩaku rĩamũre tũrĩcokagĩrie ngatho, Tũgĩtũũre twĩrahaga nĩ ũndũ wa ũkumio waku.
• 36. Jehova arogathagwo, o we Ngai wa Isiraeli, Kuuma o tene wa tene nginya o tene na tene. Nao andũ othe magĩkiuga, Amen, na makĩgooca Jehova.
• 37. Nake Daudi agĩgĩtiga Asafu, na ariũ a ithe, o hau mbere ya ithandũkũ rĩa Jehova rĩa kĩrĩkanĩro, nĩ getha matũũre matungataga marĩ o kũu ithandũkũ rĩu rĩarĩ, o ta ũrĩa ũtungati wa mũthenya o mũthenya watariĩ;
• 38. o nake Obedi-edomu akĩmũtiga hau, hamwe na ariũ a ithe, andũ mĩrongo ĩtandatũ na anana; nao aa Obedi-edomu ũcio ũngĩ, mũrũ wa Jeduthuni, o na Hosa, acio nĩo maatuĩkire aikaria mũromo;
• 39. nake Zadoku, mũthĩnjĩri-Ngai, o na ariũ a ithe arĩa athĩnjĩri-Ngai, akĩmatiga maikarage mbere ya gĩikaro kĩa Jehova itĩri-inĩ rĩa kũndũ gũtũũgĩru rĩa kũu Gibeoni,
• 40. nĩguo marutagĩre Jehova mahaki ma njino igũrũ rĩa kĩgongona kĩa mahaki macio ma njino hĩndĩ ciothe rũcinĩ na hwaĩ-inĩ, o ta ũrĩa maũndũ mothe maatariĩ marĩa maandĩkĩtwo watho-inĩ wa Jehova, ũrĩa aathire Isiraeli.
• 41. Nao maarĩ hamwe na Hemani, na Jeduthuni, o na arĩa angĩ arĩa maathurirũo makĩgwetwo marĩĩtwa mao, nĩ getha magathage Jehova nĩ ũndũ wa ũrĩa tha ciake itũũraga tene na tene.
• 42. Nao aa Hemini na Jeduthuni maarĩ na macoro o na thani iria ihũrithanagio ikagamba cia kũheo andũ arĩa maacigambagia, o na inyamũ ingĩ cia kũinĩra Ngai nacio; na ariũ a Jeduthuni nĩo maaikaragia mũromo.
• 43. Nao andũ othe magĩĩthiĩra, mũndũ o mũndũ akĩinũka gwake mũciĩ; nake Daudi akĩhũndũka nĩguo akarathime nyũmba yake.

Home