Go Back

1 Maũndũ ma Matukũ ma Tene Chapter 14

• 1. Na rĩrĩ, Hiramu, mũthamaki wa Turo, akĩrekeria Daudi andũ, na akĩmũtwarithĩria mĩtarakwa, na aaki na mahiga, o na atharamara, makamwakĩre nyũmba.
• 2. Nake Daudi agĩkĩona atĩ Jehova nĩamũhandĩte atũũre e mũthamaki wa gũthamakĩra Isiraeli, nĩ gũkorũo ũthamaki wake nĩwanenehetio mũno, nĩ ũndũ wa andũ ake Isiraeli.
• 3. Nake Daudi akĩĩhikĩria aka angĩ kũu Jerusalemu; ningĩ Daudi agĩciara ihĩĩ ingĩ o na airĩtu.
• 4. Namo marĩĩtwa ma ciana iria aagĩire nacio kũu Jerusalemu nĩmo maya: nĩ Shamua, na Shobabu, na Nathani, na Suleimani,
• 5. na Ibiharu, na Elishua, na Elipeleti,
• 6. na Noga, na Nefegu, na Jafia,
• 7. na Elishama, na Beeliada, na Elifeleti.
• 8. Na rĩrĩ, hĩndĩ ĩrĩa Afilisiti maaiguire atĩ Daudi nĩaitĩrĩirio maguta atuĩke mũthamaki wa Aisiraeli othe-rĩ, Afilisiti acio othe magĩkĩambata magacarie Daudi; nake Daudi akĩigua ũhoru ũcio, akiumagara akahũrane nao.
• 9. Nao Afilisiti magĩkorũo mathiĩte gũtharĩka gĩtuamba kĩa Refaimu.
• 10. Nake Daudi agĩgĩtuĩria ũhoro he Ngai, akĩũria atĩrĩ, Nĩngwambata ’thiĩ ngahũrane na Afilisiti? Ningĩ-rĩ, nĩũkũmarekereria ũmaneane moko-inĩ makwa hihi? Nake Jehova akĩmwĩra atĩrĩ, Ambata, nĩ ũndũ nĩngũmarekereria ndĩmaneane moko-inĩ maku.
• 11. Tondũ ũcio magĩkĩambata magĩkinya Baali-perazimu, nake Daudi akĩmahũrĩra kuo; ningĩ Daudi akiuga atĩrĩ, Ngai nĩoinangĩte thũ ciakwa na guoko gwakwa o ta ũrĩa maĩ matathũragĩra handũ makoina. Na tondũ ũcio magĩĩta handũ hau Baali-perazimu.
• 12. Nao magĩgĩtiga ngai ciao hau; nake Daudi agĩathana, nao andũ magĩcicina na mwaki.
• 13. Ningĩ Afilisiti magĩtharĩka gĩtuamba kĩu o rĩngĩ.
• 14. Nake Daudi agĩcoka agĩtuĩria ũhoro he Ngai rĩngĩ; Ngai agĩkĩmwĩra atĩrĩ, Tiga kwambata atĩ nĩguo ũkamakore, no garũrũka ũtigane nao, ũmarutie na kũrĩa kũng’etheire mĩkũngũgũ-inĩ.
• 15. Na gũgatuĩka atĩrĩ, atĩ rĩrĩa ũrĩigua ta kũrĩ andũ megũthiĩ makĩrumagia thĩ mĩkũngũgũ-inĩ ĩo igũrũ-rĩ, ũkĩarahũke ũthiĩ ũkarũe mbaara, nĩ gũkorũo Ngai nĩoimagarĩte akũgĩe mbere nĩguo akahũre ita ya Afilisiti.
• 16. Nake Daudi agĩgĩĩka o ta ũguo Ngai aamwathire; nao makĩhũra mbũtũ ĩo ya ita ya Afilisiti mamĩrutĩtie Gibeoni o nginya Gezeri.
• 17. Nayo ngumo ya Daudi ĩkĩiyũra mabũrũri mothe, nake Jehova agĩgĩtũma etigĩrũo nĩ ndũrĩrĩ ciothe.

Home