Go Back

2 Athamaki Chapter 9

• 1. Na rĩrĩ, Elisha, mũnabii, agĩgĩĩta mũndũ ũmwe wa thiritũ ya ariũ a anabii, akĩmwĩra atĩrĩ, Wĩhotore, ũthiĩ ũnyitĩte kĩnandũ gĩkĩ kĩa maguta na guoko, ũkinye Ramothu-gileadi.
• 2. Na wakinya kuo ũcarie Jehu, mũrũ wa Jehoshafatu wa Nimushi, ũtonye harĩa arĩ, ũmweherie harĩ ariũ a ithe, ũmũtonyie kanyũmba ga thĩinĩ wa iria ingĩ.
• 3. Ũcoke woe kĩnandũ kĩu kĩa maguta, ũmũitĩrĩrie maguta macio mũtwe, ũmwĩre atĩrĩ, Jehova oiga ũũ: Atĩrĩrĩ, ndagũitĩrĩria maguta, ũtuĩke mũthamaki wa Isiraeli. Nawe ũgĩcoke ũhingũre mũrango wĩyũrĩre, na ndũgaikare.
• 4. Tondũ ũcio mwanake ũcio, o ũcio mũnabii, agĩgĩthiĩ Ramothu-gileadi.
• 5. Na rĩrĩa aakinyire kuo, anene a mbũtũ cia ita magĩkorũo maikarĩte thĩ; nake akiuga ũũ: Atĩrĩrĩ, wee mũnene ũyũ wa ita, ndĩ na ũhoro ndeketio ngwĩre. Nake Jehu akĩũria atĩrĩ, Ithuothe nĩ ũrĩkũ witũ? Nake akiuga atĩrĩ, Nĩwe, mũnene ũyũ wa ita.
• 6. Nake agĩgĩũkĩra agĩtonya nyũmba; nake mũndũ ũcio akĩmũitĩrĩria maguta mũtwe, akĩmwĩra atĩrĩ, Jehova Ngai wa Isiraeli oigĩte ũũ: Ndagũitĩrĩria maguta, ũtuĩke mũthamaki wa andũ a Jehova, o acio Aisiraeli.
• 7. Nawe-rĩ, nĩũkahũra nyũmba ya mwathi waku, Ahabu, nĩguo ndĩĩrĩhĩrie thakame ĩrĩa yaitirũo ya anabii ndungata ciakwa, o na thakame ya ndungata cia Jehova ciothe, ĩrĩa yaitirũo nĩ Jezebeli.
• 8. Nĩ ũndũ-rĩ, nyũmba yothe ya Ahabu nĩngũmĩnina biũ; na nĩngũũraga njehererie Ahabu mwana o wothe wa kahĩĩ, ũrĩa ngombo, o na ũrĩa ũtarĩ ngombo, kũu Isiraeli.
• 9. Nayo nyũmba ya Ahabu ndĩmĩtue o ta nyũmba ya Jeroboamu wa Nebati, o na ta nyũmba ya Baasha wa Ahija.
• 10. Nacio ngui ĩkarĩĩra Jezebeli o kũu gĩcigo-inĩ gĩa gĩthaka kĩa Jezireeli, na gũtikoneka mũndũ o na ũmwe wa kũmũthika. Nake agĩkĩhingũra mũrango akĩũra.
• 11. Hĩndĩ ĩo Jehu agĩkiuma, agĩcoka he ndungata cia mwathi wake; na ĩmwe yacio ĩkĩmũũria atĩrĩ, Gwĩ thayũ? Nĩ kĩ mũgũrũki ũcio ekũiyĩrĩte harĩ we? Nake akĩmera atĩrĩ, Inyuĩ mũtikiũĩ mũndũ ũcio, na mũkamenya ndeto ciake?
• 12. Nao makiuga atĩrĩ, Nĩ maheni; twĩre wega. Nake akiuga atĩrĩ, Oigire ũna na ũna, aanjĩra ũũ: Jehova oigĩte atĩrĩ, Ndagũitĩrĩria maguta ũtuĩke mũthamaki wa Isiraeli.
• 13. Hĩndĩ ĩo mũndũ o mũndũ wao akĩhiũha kuoya nguo yake ya igũrũ, magĩciara thĩ o hau rĩambatĩro-inĩ rĩa nyũmba acikinye, nao magĩkĩhuha coro, makiuga atĩrĩ, Jehu nĩwe mũthamaki.
• 14. Ũguo nĩguo Jehu, mũrũ wa Jehoahafatu wa Nimushi, aagĩire ndundu ya gũũkĩrĩra Joramu. (Na rĩrĩ, Joramu nĩ gũikaria aaikarĩtie Ramothu-gileadi, we mwene, o na Aisiraeli othe, akarĩrangithĩria nĩ ũndũ wa Hazaeli, mũthamaki wa Suriata;
• 15. no rĩrĩ, Joramu mũthamaki nĩaacokete Jezireeli agathondekerũo kuo harĩa aagurarĩtio nĩ Asuriata, hĩndĩ ĩrĩa aahũranaga na Hazaeli, mũthamaki wa Suriata.) Nake Jehu agĩkiuga atĩrĩ, Akorũo nĩmwetĩkĩra ũguo ndoiga-rĩ, menyai mũreke mũndũ o na ũmwe oime itũũra rĩrĩ, atĩ nĩguo akaheane ũhoro warĩo o kũu Jezireeli.
• 16. Nake Jehu agĩkĩhaica ngari agĩthiĩ Jezireeli, nĩ ũndũ nĩkuo Joramu aakomete. Na hĩndĩ ĩo Ahazia, mũthamaki wa Juda, agĩkorũo nĩaaikũrũkĩte agathiĩ kũrora Joramu.
• 17. Na rĩrĩ, marĩ o njĩra magĩũka-rĩ, mũrangĩri wa itũũra agĩkorũo arũngiĩ igũrũ, mũthiringo-inĩ wa nyũmba ndaya na igũrũ ya arangĩri a kũu Jezireeli, nake akĩona gĩkundi kĩa andũ a Jehu gĩgĩũka, akiuga atĩrĩ, Ndĩ kuona andũ gĩkundi. Nake Joramu akiuga atĩrĩ, Oya mũndũ ũmwe wa arĩa mathiaga mahaicĩte mbarathi ũmũrekie athiĩ akamatũnge, nake amorie atĩrĩ, Gwĩ thayũ?
• 18. Tondũ ũcio hagĩgĩthiĩ mũndũ ũmwe ahaicĩte mbarathi agacemanie nake, nake akiuga atĩrĩ, Mũthamaki oiga ũũ: Atĩrĩrĩ, gwĩ thayũ? Nake Jehu agĩcokia atĩrĩ, Wĩ na ũhoro ũrĩkũ na thayũ wee? Coka na thutha wakwa ũnũmĩrĩre. Nake mũrangĩri ũcio akĩheana ũhoro, akiuga atĩrĩ, Mũndũ ũrĩa ũrekirio nĩakinyire harĩ o, no ndaracoka na gũkũ.
• 19. Hĩndĩ ĩo agĩcoka akĩrekia mũndũ ũngĩ wa kerĩ ahaicĩte mbarathi, nake mũndũ ũcio agĩkinya harĩ o, akiuga atĩrĩ, Mũthamaki oiga ũũ: Atĩrĩrĩ, gwĩ thayũ? Nake Jehu agĩcokia atĩrĩ, Wĩ na ũhoro ũrĩkũ na thayũ wee? Coka na thutha wakwa ũnũmĩrĩre.
• 20. Ningĩ mũrangĩri ũcio akĩheana ũhoro, akiuga atĩrĩ, O nake nĩakinyire harĩ o, no ndaracoka na gũkũ; naguo mũtwarĩre wa ngari ya ita ũtariĩ ta wa Jehu wa Nimushi; nĩ ũndũ atwaraga ngari na ihenya mũno.
• 21. Nake Joramu akiuga atĩrĩ, Ta ohererai mbarathi ngari-inĩ. Nao magĩcioherera. Nake Joramu, mũthamaki wa Isiraeli, na Ahazia, mũthamaki wa Juda, makiumagara, o mũndũ arĩ ngari-inĩ yake, magĩgĩthiĩ gũtũnga Jehu, makĩmũkora mũgũnda-inĩ wa Nabothu, Mũjezireeli.
• 22. Na gũgĩkinya atĩrĩ, atĩ Joramu ona Jehu, agĩkĩmũũria atĩrĩ, Gwĩ thayũ, Jehu? Nake agĩcokia atĩrĩ, Thayũ wa kĩ, ũmaraya wa nyũkwa Jezebeli, o na ũrogi wake, ciingĩhĩte ũũ?
• 23. Nake Joramu akĩgarũrithia ngari yake, akĩũra, agĩcoka akĩĩra Ahazia ũũ: Atĩrĩrĩ, Ahazia, he njikanĩrĩrio.
• 24. Nake Jehu akĩgeta ũta wake na hinya wake wothe akĩratha Joramu gatagatĩ ga ciande, naguo mũguĩ ũkiumanĩra na ngoro, agĩtungumana o hau aarĩ ngari-inĩ yake.
• 25. Hĩndĩ ĩo Jehu akĩĩra Bidikari, mũkaburũ wake, atĩrĩ, Muoithie aikio mũgũnda ũcio wagairũo nĩ Nabothu, Mũjezireeli; nĩ ũndũ-rĩ, ta ririkana ũhoro mũritũ ũrĩa waaririo nĩ Jehova ũmũkoniĩ hĩndĩ ĩrĩa twahaicĩte mbarathi ciitũ, niĩ nawe, tũrũmĩrĩre ithe, Ahabu, gũkĩĩrũo atĩrĩ,
• 26. Jehova oiga ũũ: Ti-itherũ ira nĩ kuona ndĩronire thakame ya Nabothu, o na ya ariũ ake; niĩ o na niĩ-rĩ, ngakũrĩhĩria ũndũ ũcio, o gũkũ mũgũnda ũyũ; ũguo nĩguo Jehova oiga. Tondũ ũcio muoithie rĩu aikio mũgũnda ũcio, o ta ũrĩa uuge wa Jehova watariĩ.
• 27. No rĩrĩ, hĩndĩ ĩrĩa Ahazia, mũthamaki wa Juda, onire maũndũ macio, akĩũra arorete na njĩra ya nyũmba ya mũgũnda-inĩ. Nake Jehu akĩmũrũmĩrĩra, akiuga atĩrĩ, O nake mũũragĩrei ngari-inĩ yake; nao magĩkĩmũgurarĩria o ihaicĩro-inĩ rĩa Guri, rĩrĩa rĩrĩ gũkuhĩ na Ibileamu. Nake agĩkĩrĩrĩria kũũra, agĩkinya Megido, agĩkuĩra kuo.
• 28. Nacio ndungata ciake ikĩmũkuua na ngari ikĩmũkinyia Jerusalemu, ikĩmũthika mbĩrĩra-inĩ yake hamwe na maithe, o kũu itũũra rĩa Daudi.
• 29. Na rĩrĩ, mwaka wa ikũmi na ũmwe ĩrĩa Joramu, mũrũ wa Ahabu, aakorirũo athamikĩte, nĩguo Ahazia aambĩrĩirie gũthamakĩra Juda.
• 30. Na rĩrĩ, Jehu aakinya Jezireeli-rĩ, Jezebeli agĩkĩigua ũhoro ũcio; nake akĩĩhaka rangi maitho, akĩĩgemia mũtwe, agĩcũthĩrĩria na ndirica.
• 31. Na rĩrĩ, hĩndĩ ĩrĩa Jehu aatonyaga kĩhingo-inĩ, akĩũria atĩrĩ, Gwĩ thayũ, Zimuri, wee mũũragi wa mwathi waku?
• 32. Nake agĩgĩtiira ũthiũ agĩcũthĩrĩria ndirica-inĩ hau aarĩ, akiuga atĩrĩ, Nũ wĩ mwena-inĩ wakwa? Nũ? Nake agĩcũthĩrĩrio na ndirica ĩo nĩ andũ erĩ kana atatũ mehokeirũo wĩra wa nyũmba ĩo ya mũthamaki.
• 33. Nake agĩkĩmera atĩrĩ, Mũikiei agũe thĩ. Tondũ ũcio makĩmũikia akĩgũa thĩ; nayo thakame ĩmwe yake ĩkĩminjũkĩra rũthingo, o na mbarathi; nake Jehu agĩtũma arangĩrĩrio thĩ na magũrũ ma cio.
• 34. Nake aarĩkia gũtonya nyũmba thĩinĩ, akĩrĩa, o na akĩnyua; na thutha wa ũguo agĩcoka akiuga atĩrĩ, Ta thiĩi mũrore ũhoro wa mũndũ mũka ũcio wĩ na kĩrumi mũmũthike; nĩ ũndũ nĩ mwarĩ wa mũthamaki.
• 35. Nao andũ ake magĩgĩthiĩ kũmũthika; no matiakorire kĩĩga o na kĩmwe kĩa mwĩrĩ wake tiga o kĩongo giiki, na magũrũ, o na hĩ cia moko make.
• 36. Tondũ ũcio magĩgĩcoka harĩ we, makĩmũhe ũhoro ũcio. Nake akiuga atĩrĩ, Ũcio nĩ uuge wa Jehova ũrĩa aaririe na kanua ka ndungata yake, Elija, Mũtishibi, akiuga ũũ: Mũgũnda wa Jezireeli nĩkuo ngui ikarĩĩra mwĩrĩ wa Jezebeli;
• 37. o nakĩo kĩimba kĩa Jezebeli gĩgatuĩka o ta rũrua rũaraganĩte kũu mũgũnda ũcio wa Jezireeli; nĩguo andũ matikanoige atĩrĩ, Ũyũ nĩ Jezebeli.

Home