Go Back

2 Athamaki Chapter 8

• 1. Na rĩrĩ, Elisha nĩaarĩtie na mũtumia ũrĩa aariũkĩtie mũrũwe, akamwĩra atĩrĩ, Ũkĩra ũthiĩ, mwĩ na andũ othe a nyũmba yaku, ũgaikare wĩ mũgeni o kũndũ kũrĩa guothe ũngĩenda gũikara, nĩ ũndũ Jehova nĩetĩte ng’aragu; na nĩĩgũũka bũrũri ũyũ, inine mĩaka mũgwanja.
• 2. Nake mũtumia ũcio agĩũkĩra, agĩĩka o ta ũrĩa uuge wa mũndũ ũcio wa Ngai watariĩ; nake agĩthiĩ na andũ othe a nyũmba yake, agĩtũũra e mũgeni bũrũri wa Afilisiti mĩaka mũgwanja.
• 3. Na gũgĩkinya atĩrĩ, atĩ mĩaka ĩo mũgwanja yathira, mũtumia ũcio akĩhũndũka, akiuma bũrũri wa Afilisiti; nake akiumagara, agĩthiĩ gũkaĩra mũthamaki nĩ ũndũ wa nyũmba yake, o na ũndũ wa gĩthaka gĩake.
• 4. Na rĩrĩ, mũthamaki agĩgĩkorũo nĩ kwaria aaragia na Gehazi, ndungata ya mũndũ ũcio wa Ngai, akamwĩra atĩrĩ, Ndagũthaitha ’he ũhoro wa maũndũ mothe marĩa manene Elisha aaneka.
• 5. Na gũgĩkinya atĩrĩ, atĩ o hĩndĩ ĩrĩa aaheaga mũthamaki ũhoro wa ũrĩa aariũkirie mũndũ ũrĩa wakuĩte-rĩ, mũtumia ũcio wariũkĩirio mũrũwe agĩkaĩra mũthamaki nĩ ũndũ wa nyũmba yake, o na ũndũ wa gĩthaka gĩake. Nake Gehazi akinga ũũ: Hĩ! Atĩrĩrĩ, mũthamaki ũyũ, mwathi wakwa, ũyũ nĩwe mũtumia ũcio, nake mũrũwe ũrĩa wariũkirio nĩ Elisha nĩwe ũyũ.
• 6. Nake mũthamaki aahoya mũtumia ũhoro ũcio, akĩmũhe. Na tondũ ũcio mũthamaki agĩkĩmuonereria mũndũ ũmwe wa arĩa mehokeirũo wĩra wa nyũmba yake, akĩmwĩra atĩrĩ, Cokithĩria mũtumia ũyũ kĩrĩa gĩothe kĩarĩ gĩake, o na maciaro mothe ma mĩgũnda yake, gwata o hĩndĩ ĩrĩa aathiire akiuma bũrũri ũyũ nginya ũmũthĩ.
• 7. Na rĩrĩ, Eliaha agĩgĩthiĩ Dameski; nake Beni-hadadi, mũthamaki wa Suriata, agĩkorũo arĩ mũrũaru; nake agĩkĩheo ũhoro akĩĩrũo atĩrĩ, Mũndũ ũrĩa wa Ngai nĩ mũũku gũkũ.
• 8. Nake mũthamaki akĩĩra Hazaeli atĩrĩ, Thiĩ ũkuuĩte kĩheo na guoko gwaku, ũtũngane na mũndũ ũcio wa Ngai, ũtuĩrie ũhoro harĩ Jehova na ũndũ wake, ũmũũrie atĩrĩ, Ĩ hihi nĩngũhona ndũari ĩno, kana aca?
• 9. Tondũ ũcio Hazaeli agĩgĩthiĩ gũtũngana nake akuuĩte kĩheo kĩa indo iria ciothe njega cia Dameski, cia mĩrigo mĩrongo ĩna ya ngamĩra, akĩrũgama harĩ we, akiuga atĩrĩ, Mũrũguo Beni-hadadi, mũthamaki wa Suriata, nĩaandekia harĩ wee, aakũũria atĩrĩ, Ĩ hihi nĩngũhona ndũari ĩno, kana aca?
• 10. Nake Elisha agĩkĩmwĩra atĩrĩ, Thiĩ ũkamwĩre ũũ: Ti-itherũ nĩũkũhona; no rĩrĩ, Ngai nĩanyonetie atĩ ndarĩ hingo ategũkua.
• 11. Nake Elisha agĩgĩikara amũcũthĩrĩirie amũroretie ũthiũ amũkũũrĩire maitho, o nginya agĩconoka. Nake mũndũ ũcio wa Ngai agĩkĩrĩra.
• 12. Nake Hazaeli agĩkĩmũũria atĩrĩ, Ĩ mwathi wakwa, warĩrio nĩ kĩ? Nake agĩcokia atĩrĩ, Nĩ kũmenya ũũru ũrĩa ũgeka ciana cia Isiraeli; ihingo ciacio iria nũmu nĩũgaciikia mwaki, nao aanake ao nĩũkamoraga na rũhiũ rũa njora, o nao andũ ao arĩa anyinyi nĩũkamabacania na thĩ, nao andũ-a-nja ao arĩa marĩ na mahu nĩũkamatathũra.
• 13. Nake Hazaeli akiuga atĩrĩ, No rĩrĩ, niĩ ndungata yaku, ĩrĩa ĩtariĩ ta ngui, ndĩ mũndũ wa kĩ, atĩ nĩguo ingĩhota gwĩka ũndũ ũcio mũnene? Nake Elisha akĩmũcokeria atĩrĩ, Jehova nĩanyonetie atĩ nĩũgatuĩka mũthamaki wa Suriata.
• 14. Hĩndĩ ĩo agĩgĩthiĩ akiuma harĩ Elisha, agĩkinya he mwathi wake; nake mwathi wake akĩmũũria atĩrĩ, Elisha aagĩkwĩra atĩa? Agĩkĩmũcokeria ũũ: Aanjĩra atĩ ti-itherũ nĩũkũhona.
• 15. Na gũgĩkinya atĩrĩ, atĩ rũciũ rũrũ rũngĩ akĩroka kuoya tama ũrĩa waragwo ũrĩrĩ igũrũ, agiũtobokia maĩ-inĩ, agĩcoka akĩũigĩrĩra ũthiũ wake, o nginya agĩkua; nake Hazaeli agĩgĩthamaka ithenya rĩake.
• 16. Na rĩrĩ, rĩrĩa Joramu, mũrũ wa Ahabu, mũthamaki wa Isiraeli aakorirũo athamakĩte mĩaka ĩtano-rĩ, nake Jehoshafatu hĩndĩ ĩo agĩkorũo arĩ o mũthamaki wa Juda, Jehoramu nake, mũrũ wa Jehoshafatu ũcio, akĩambĩrĩria gũthamaka kũu Juda.
• 17. Na rĩrĩ, hĩndĩ ĩo aambĩrĩirie gũthamaka-rĩ, aarĩ wa mĩaka mĩrongo ĩtatũ na ĩĩrĩ; nake agĩgĩthamaka mĩaka ĩnana kũu Jerusalemu.
• 18. Nake akĩrũmĩrĩra mĩthiĩre ya athamaki a Isiraeli, o ta ũrĩa nyũmba ya Ahabu yekaga, nĩ ũndũ nĩaahikĩtie mwarĩ wa Ahabu; nake agĩgĩĩka maũndũ marĩa monagwo marĩ moru nĩ Jehova.
• 19. No rĩrĩ, Jehova ndaigana kũnina Juda nĩ ũndũ wa gũconokera Daudi, ndungata yake, o ta ũrĩa aamwĩrĩire atĩ nĩegũtũũra amũheete tawa, we mwene o na ciana ciake.
• 20. Na rĩrĩ, ihinda rĩake-rĩ, nĩguo Aedomu mokĩrĩire Juda, makĩrema athamaki ao nĩguo matigacoke gwathwo nĩo, nao makĩĩigĩra mũthamaki wa kũmathamakagĩra.
• 21. Hĩndĩ ĩo Joramu akĩringa agĩthiĩ Zairu, hamwe na ngari ciake ciothe cia ita; nake agĩkĩarahũka ũtukũ, akĩhũra Aedomu arĩa maamũrigicĩirie na mĩena yothe, we mwene o na anene a ngari ciake ciothe cia ita; no andũ arĩa angĩ maarĩ hamwe nake makĩũrĩra hema-inĩ ciao.
• 22. Ũguo nĩguo Aedomu mokĩrĩire athamaki a Juda makĩmarema, magĩtiga gwathagwo nĩo o na ũmũthĩ. Namo matukũ o ro macio Alibina o nao makĩmarema.
• 23. Nacio ciĩko iria ingĩ cia Joramu, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 24. Nake Joramu agĩgĩkoma hamwe na maithe, agĩthikwo o hamwe na maithe itũũra rĩa Daudi; nake Ahazia, mũrũwe, agĩthamaka ithenya rĩake.
• 25. Na rĩrĩ, mwaka wa ikũmi na ĩĩrĩ ĩrĩa Joramu, mũrũ wa Ahabu, aakorirũo athamakĩte-rĩ, nĩguo Ahazia, mũrũ wa Jehoramu mũthamaki wa Juda, aambĩrĩirie gũthamaka.
• 26. Nake Ahazia aarĩ wa mĩaka mĩrongo ĩĩrĩ na ĩĩrĩ rĩrĩa aambĩrĩirie gũthamaka; nake agĩthamaka mwaka ũmwe kũu Jerusalemu. Nake nyina etagwo Athalia, mwarĩ wa Omuri, mũthamaki wa Isiraeli.
• 27. Nake agĩkĩrũmĩrĩra mĩthiĩre ĩrĩa nyũmba ya Ahabu yathiaga nayo, nake agĩĩka maũndũ marĩa monagwo marĩ moru nĩ Jehova, o ta ũrĩa nyũmba ya Ahabu yekaga; nĩ ũndũ aarĩ mũthoni kũu nyũmba ĩo ya Ahabu.
• 28. Nao magĩthiĩ na Joramu wa Ahabu, makahũranĩre mbaara na Hazaeli, mũthamaki wa Suriata, o kũu Ramothu-gileadi; nao Asuriata magĩkĩguraria Joramu.
• 29. Nake mũthamaki, ti Joramu, akĩhũndũka nĩguo akahonerio Jezireeli nguraro icio aagurarĩirio nĩ Asuriata o kũu Rama hĩndĩ ĩo aahũranaga mbaara na Hazaeli, mũthamaki wa Suriata. Nake Ahazia wa Jehoramu, mũthamaki wa Juda, agĩgĩikũrũka nĩguo akarore Joramu wa Ahabu, o kũu Jezireeli, nĩ ũndũ aarĩ mũrũaru.

Home