Go Back

2 Athamaki Chapter 6

• 1. Nao andũ a thiritũ ya ariũ a anabii makĩĩra Elisha ũũ: Handũ haha tũikarĩte mbere yaku nĩhatũnyihĩire mũno.
• 2. Twagũthaitha ũreke tũthiĩ Jorodani tũgatue o mũndũ mũtĩ kuo, tũcoke twĩyakĩre handũ ha gũtũũra kuo. Nake agĩgĩcokia atĩrĩ, Thiĩi.
• 3. Nake mũndũ ũmwe agĩkiuga atĩrĩ, Ndagũthaitha wĩtĩkĩre gũtwarana na ithuĩ, ndungata ciaku. Agĩgĩcokia atĩrĩ, Ĩĩ, nĩngũthiĩ.
• 4. Tondũ ũcio agĩgĩthiĩ nao. Nao maakinya Jorodani, magĩgĩtema mĩtĩ.
• 5. No rĩrĩa mũndũ ũmwe aatemaga mũtĩ, ithanwa rĩake rĩkĩrũka, rĩkĩgũa maĩ-inĩ thĩinĩ; nake agĩkaya, akiuga atĩrĩ, Wũi, mwathi wakwa-ĩ! Riuma rĩa kũgwatanio.
• 6. Nake mũndũ ũcio wa Ngai agĩkĩũria atĩrĩ, Rĩagũa ha? Agĩkĩmuonia harĩa ho, nake agĩtua gathanju, agĩgaikia hau maĩ thĩinĩ, narĩo ithanwa rĩu rĩkĩrera;
• 7. agĩkĩmwĩra atĩrĩ, Kĩrĩĩyoere agĩgĩtambũrũkia guoko, akĩrĩoya.
• 8. Na rĩrĩ, mũthamaki wa Suriata aahũranire mbaara na Isiraeli; nake hĩndĩ ĩrĩa aaciranĩire na ndungata ciake, atĩ Handũ hana na hana nĩho ngaamba hema ciakwa-rĩ,
• 9. mũndũ ũcio wa Ngai akarekeria mũthamaki wa Isiraeli mũndũ, akamwĩra atĩrĩ, Wĩmenyerere ndũkahĩtũkĩre hana, nĩ ũndũ Asuriata nĩho megũikũrũkĩra.
• 10. Nake mũthamaki wa Isiraeli akarekia andũ mathiĩ handũ hau mũndũ ũcio wa Ngai aamwĩrĩte emenyerere ũhoro waho, naho hau mũthamaki wa Isiraeli akehonokia, na ti ihinda rĩmwe, kana merĩ.
• 11. Nayo ngoro ya mũthamaki ũcio wa Suriata ĩkĩnyarirĩka mũno nĩ ũndũ wa ũhoro ũcio; nake agĩgĩĩta ndungata ciake, agĩciũria atĩrĩ, Kaĩ mũtangĩkĩnyonia mũndũ witũ ũrĩa wĩ mwena wa mũthamaki wa Isiraeli?
• 12. Nake mũndũ ũmwe wa ndungata ciake akiuga atĩrĩ, Aca, ti ũguo, mũthamaki ũyũ, mwathi wakwa no rĩrĩ, Elisha, mũnabii ũrĩa ũrĩ kũu Isiraeli, nĩwe wĩraga mũthamaki wa Isiraeli mohoro marĩa waragia wĩ kanyũmba gaku ga toro.
• 13. Nake agĩkiuga atĩrĩ, Ta thiĩi mũgatuĩrie harĩa arĩ, nĩ getha ndekanie agĩĩrũo. Agĩkĩheo ũhoro, akĩĩrũo ũũ: Atĩrĩrĩ, arĩ o Dothani.
• 14. Tondũ ũcio agĩgĩtwarithia mbarathi kuo, o na ngari cia ita, na mbũtũ nene ya ita; na igĩthiĩ ũtukũ, igĩthiũrũrũkĩria itũũra rĩu.
• 15. Na rĩrĩ, hĩndĩ ĩrĩa ndungata ya mũndũ ũcio wa Ngai yarokire gũũkĩra rũcinĩ tene ĩkiuma nja-rĩ, ĩgĩkĩona mbũtũ ya ita ĩĩ na mbarathi, o na ngari cia ita, ĩthiũrũrũkĩirie itũũra. Nayo ndungata ĩo yake ĩgĩkĩmũũria atĩrĩ, Wũi! Tũgũgĩĩka atĩa, mwathi wakwa?
• 16. Nake agĩcokia atĩrĩ, Ta tiga gwĩtigĩra; nĩ gũkorũo arĩa marĩ mwena witũ nĩ aingĩ gũkĩra arĩa marĩ mwena wao.
• 17. Nake Elisha akĩhoya Ngai, akiuga atĩrĩ, Jehova, ndagũthaitha ũmũhingũre maitho, nĩguo one. Nake Jehova agĩkĩhingũra maitho ma mwanake ũcio, akĩona wega, na ti-itherũ kĩrĩma-inĩ gĩothe gwakorirũo kũiyũrĩte mbarathi o na ngari cia mwaki irigicĩirie Elisha.
• 18. Na rĩrĩ, hĩndĩ ĩrĩa mbũtũ ĩo yaikũrũkire ĩgĩthiĩ harĩ we-rĩ, Elisha akĩhoya Jehova akiuga atĩrĩ, Ndagũthaitha ũhũre andũ aya na ũtumumu. Nake agĩkĩmahũra na ũtumumu, o ta ũrĩa uuge wa Elisha watariĩ.
• 19. Nake Elisha akĩmera atĩrĩ, Ĩno tiyo njĩra, o na itũũra ti rĩrĩ; nũmĩrĩrai, na nĩngũmũtwara kwĩ mũndũ ũrĩa mũgũcaria. Nake agĩkĩmatongoria akĩmatwara Samaria.
• 20. Na gũgĩkinya atĩrĩ, atĩ hĩndĩ ĩrĩa maakinyire Samaria, Elisha akiuga atĩrĩ, Jehova, hingũra andũ aya maitho nĩ getha mone. Nake Jehova agĩkĩmahingũra maitho, makĩona; na atĩrĩrĩ, magĩkorũo marĩ o Samaria gatagatĩ.
• 21. Nake mũthamaki wa Isiraeli aamona, akĩũria Elisha atĩrĩ, Baba-ĩ, ndĩmahũre? Nĩ wega ndĩmahũre?
• 22. Nake agĩcokia atĩrĩ, Ndũkũmahũra; andũ arĩa ũkoragwo ũrĩkĩtie gũtaha na rũhiũ rũaku rũa njora, o na ũta waku-rĩ, kaĩ ũgĩcokaga kũmahũra? Nĩmaigĩrũo irio na maĩ, nĩguo marĩe na manyue, nao macoke mainũke kwĩ mwathi wao.
• 23. Nake mũthamaki ũcio agĩkĩmathondekithiria irio nyingĩ; nao maarĩkia kũrĩa na kũnyua, akĩmarekia methiĩre, magĩcoka he mũthamaki wao. Nacio mbũtũ cia ita cia Suriata itiacokire gũthiĩ bũrũri wa Isiraeli.
• 24. Na gũgĩkinya atĩrĩ, atĩ thutha wa maũndũ macio, Beni-hadadi, mũthamaki wa Suriata, agĩcokanĩrĩria mbũtũ ciake ciothe cia ita, akĩambata akĩrigicĩria Samaria arĩtunyane.
• 25. Nakuo gũkĩgĩa ng’aragu nene mũno kũu Samaria; na atĩrĩrĩ, magĩgĩikara marĩrigicĩirie o nginya mũtwe wa ndigiri ũkĩya kwendio cekeri mĩrongo ĩnana, o nakĩo kĩbaba kĩmwe kĩa mai ma ndutura gĩkendĩo cekeri ithano.
• 26. Na rĩrĩ, rĩrĩa mũthamaki wa Isiraeli aahĩtũkaga o ro ũguo arĩ rũthingo igũrũ, agĩkaĩrũo nĩ mũndũ-wa-nja ũmwe, akĩmwĩra atĩrĩ, Mũthamaki ũyũ, mwathi wakwa, ndeithia.
• 27. Nake akiuga atĩrĩ, Jehova angĩaga gũgũteithia-rĩ, niĩ ndagũteithia na kĩ? Ndĩkĩrĩ na kĩndũ kiumĩte kĩhuhĩro-inĩ kĩa ngano, kana kĩhihĩro-inĩ kĩa ndibei?
• 28. Ningĩ mũthamaki akĩmũũria atĩrĩ, Ũnyarirĩtwo nĩ kĩ? Nake agĩcokia atĩrĩ, Nĩ mũndũ-wa-nja ũyũ ũranjĩrire atĩrĩ, Ũmũthĩ-rĩ, ruta mũrũguo, tũmũrĩe, naruo rũciũ tũkarĩa wakwa.
• 29. Tondũ ũcio tũrakĩruga mũrũ wakwa, tũramũrĩa; naguo mũthenya ũyũ ũngĩ ndĩramwĩra atĩrĩ, Ruta mũrũguo, tũmũrĩe; no arakĩhitha mũrũwe.
• 30. Na gũgĩkinya atĩrĩ, atĩ hĩndĩ ĩrĩa mũthamaki aaiguire ũhoro wa mũndũ-wa-nja ũcio, agĩtembũranga nguo ciake; (na rĩrĩ, hĩndĩ ĩo nĩ kwĩhĩtũkĩra ehĩtũkagĩra o ro ũguo arĩ rũthingo igũrũ;) nao andũ magĩcũthĩrĩria, makĩona nĩ tama wa ikũnia ehumbĩte thĩinĩ.
• 31. Nake agĩkiuga atĩrĩ, Ngai aro’thũũra, o na akĩrĩrĩrie gũ’thũũra, mũtwe wa Elisha wa Shafatu ũngĩtinda ũgwataine na mwĩrĩ wake ũmũthĩ.
• 32. No rĩrĩ, Elisha eikarĩire o gwake mũciĩ, na nĩkwarĩ athuri amwe maaikarĩte nake; nake mũthamaki akĩrekia mũndũ ũmwe wa acio maarĩ mbere yake; no rĩrĩ, o mbere mũndũ ũcio wareketio atanakinya harĩ we-rĩ, Elisha akĩĩra athuri acio atĩrĩ, Ta rorai muone ũrĩa mũndũ ũyũ, mũrũ wa mũũragani, arekanĩtie atĩ ndinio mũtwe. Atĩrĩrĩ, mũndũ ũcio ũreketio oka-rĩ, mũhingĩrei mũrango, mũũnyite mũũrũmĩtĩe, mũmũhingĩrĩrie; githĩ mũkinyo wa makinya ma mwathi wake tiguo wĩ thutha wake?
• 33. Na rĩrĩ, hĩndĩ ĩrĩa aaragia nao, atĩrĩrĩ, mũndũ ũcio wareketio agĩikũrũka agĩkinya harĩ we, akiuga ũũ: Atĩrĩrĩ, ũũru ũyũ wonekete nĩ ũndũ wa Jehova kaĩ ngũgĩcoka gweterera Jehova makĩria nĩ ũndũ kĩ?

Home