Go Back

2 Athamaki Chapter 5

• 1. Na rĩrĩ, Naamani, mũnene wa mbũtũ cia ita cia mũthamaki wa Suriata, nĩonagwo arĩ mũnene mũno nĩ mwathi wake, na agatĩĩka mũno, nĩ gũkorũo Jehova nĩaaheete Asuriata hinya wa kũhootana na ũndũ wake; na aarĩ njamba ĩrĩ hinya; no rĩrĩ, nĩaarũarĩte mangũ.
• 2. Nao Asuriata nĩmoimagarĩte magathiĩ kũhũrana marĩ mbũtũ cia gũtahana, nao magĩtaha mũirĩtu ũmwe ũtarĩ mũkũrũ, makĩmũruta bũrũri wa Isiraeli; nake agĩtuĩka ndungata ya mũtumia wa Naamani.
• 3. Nake agĩkĩĩra mũtumia ũcio wamwathaga atĩrĩ, Na arĩ korũo mwathi wakwa onana na mũnabii ũrĩa ũtũũraga Samaria! Ũcio nĩwe ũngĩmũhonia mangũ maya make.
• 4. Hagĩgĩtonya mũndũ nyũmba, akĩhe mwathi wake ũhoro ũcio, akiuga ũũ: Atĩrĩrĩ, mũirĩtu ũrĩa wa bũrũri wa Isiraeli oiga ũna na ũna.
• 5. Nake mũthamaki wa Suriata akiuga atĩrĩ, Gĩthiĩ ũkinye kuo, na nĩngũtwarithia marũa he mũthamaki wa Isiraeli. Nake agĩkiuma kũu agĩthiĩ akuuĩte taranda ikũmi cia betha, o na cekeri cia thahabu ngiri ithathatũ, o na nguo cia magarũrĩra ikũmi.
• 6. Agĩtwarithia marũa he mũthamaki wa Isiraeli ma kũmwĩra ũũ, Marũa maya maagũkinyĩra-rĩ, atĩrĩrĩ, nĩ Naamani ndungata yakwa ndakũrekeria ũmũhonie mangũ make.
• 7. Na gũgĩkinya atĩrĩ, atĩ hĩndĩ ĩrĩa mũthamaki wa Isiraeli aathomire marũa macio, agĩtembũranga nguo ciake, akiuga atĩrĩ, Hĩ! Kaĩ ndĩ Ngai ũrĩa ũũraganaga, o na agatũma gũtũũrũo muoyo atĩ nĩkĩo mũndũ ũyũ ekũrekania harĩ niĩ atĩ ’honie mũndũ mangũ? No rĩrĩ, ta wĩciriei, ndamũthaitha, muone ũrĩa mũndũ ũyũ ekwenda kũnjũgita.
• 8. Na gũgĩtuĩka atĩrĩ, atĩ Elisha, mũndũ wa Ngai, aaigua atĩ mũthamaki wa Isiraeli nĩatembũrangĩte nguo ciake, akĩrekia mũndũ he mũthamaki, akiuga atĩrĩ, Ũgũtembũranga nguo ciaku nĩkĩ? Nĩarekwo oke haha harĩ niĩ rĩu, na nĩekũmenya atĩ gũkũ, thĩinĩ wa Isiraeli, nĩkũrĩ mũnabii.
• 9. Tondũ ũcio Naamani agĩgĩthiĩ na mbarathi ciake, o na ngari ciake, akĩrũgama mũromo-inĩ wa nyũmba ya Elisha.
• 10. Nake Elisha akĩmũrekeria mũndũ akamwĩre atĩrĩ, Thiĩ ũgethambe Jorodani methamba mũgwanja, naguo mwĩrĩ waku nĩũgũgũcokerera, na nĩũgũthera.
• 11. No rĩrĩ, Naamani akĩrakara, agĩĩthiĩra akiugaga ũũ: Atĩrĩrĩ, niĩ ngwĩcirĩtie atĩ ti-itherũ nĩ kuuma ekuuma oke harĩ niĩ, akaĩre rĩĩtwa rĩa Jehova Ngai wake arũngiĩ o ro ũguo, acoke athũngũthie guoko gwake igũrũ rĩa handũ harĩa harũaru, a’honie mangũ.
• 12. Githĩ njũĩ ciitũ cia Dameski, Abana na Faripari, ti njega gũkĩra maĩ mothe ma Isiraeli? Githĩ ndingĩgĩĩthamba kuo ’there? Agĩkĩgarũrũka, agĩthiĩ ang’ũrĩkĩte.
• 13. Nacio ndungata ciake ikĩmũthengerera, ikĩmwarĩria, ikĩmwĩra atĩrĩ, Baba, rĩu-rĩ, korũo mũnabii ũcio nĩ kwĩra akwĩrire wĩke ũndũ mũnene-rĩ, ndũngĩwĩkĩte? Githĩ ndũngĩkĩwĩka makĩria rĩu akwĩrĩte ũũ: Wĩthambe ũthere?
• 14. Hĩndĩ ĩo agĩgĩikũrũka, agĩĩtobokia metobokia mũgwanja Jorodani o ta ũguo mũndũ ũcio wa Ngai oigĩte; naguo mwĩrĩ wake ũkĩmũcokerera ũkĩhaana o ta mwĩrĩ wa kaana kanini, agĩgĩthera.
• 15. Nake akĩhũndũka, agĩcoka he mũndũ ũcio wa Ngai, we mwene, o na gĩkundi gĩake gĩothe, agĩkĩrũgama mbere yake, akiuga ũũ: Ti-itherũ rĩu ndĩ kũmenya atĩ gũtirĩ Ngai ũngĩ gũkũ thĩ guothe, tiga o gũkũ Isiraeli; na tondũ ũcio ndagũthaitha wĩtĩkĩre atĩ niĩ, ndungata yaku, ngũhe nduhi.
• 16. Nowe akiuga atĩrĩ, O ta ũrĩa Jehova atũũraga muoyo, o we ũrĩa niĩ ndũgamaga mbere yake-rĩ, ndirĩ kĩndũ ingĩamũkĩra. Nake Naamani agĩkĩmũringĩrĩria mũno oe, no akĩrega.
• 17. Nake Naamani akiuga atĩrĩ, Kũngĩkorũo ti ũguo-rĩ, ndagũthaitha ũreke niĩ, ndungata yaku, ’heo tĩri, mĩrigo ĩĩrĩ ya nyũmbũ; nĩ ũndũ-rĩ, niĩ ndungata yaku, gwata rĩu, ndikarutĩra ngai ingĩ ihaki rĩa njino, kana igongona rĩa mũthemba o na ũrĩkũ, tiga o Jehova.
• 18. No rĩrĩ, Jehova aronjohera, niĩ ndungata yaku, ũndũ ũyũ, wa atĩ rĩrĩa mũnene wakwa egũtonya nyũmba ya Rimoni ainamĩrĩre ahoere kuo etiiranĩtie na guoko gwakwa, na niĩ ngainamĩrĩra o kũu nyũmba ĩo ya Rimoni-rĩ, hĩndĩ ĩrĩa ngũinamĩrĩra kũu nyũmba ĩo ya Rimoni, Jehova aronjohera ũndũ ũcio, niĩ ndungata yaku.
• 19. Nake Elisha agĩkĩmwĩra atĩrĩ, Thiĩ na ũhoro. Tondũ ũcio agĩkiuma harĩ we, agĩthiĩ gatĩĩna karayaraya.
• 20. No rĩrĩ, Gehazi, ndungata ya Elisha mũndũ ũcio wa Ngai, akĩĩĩra ũũ: Atĩrĩrĩ! Mwathi wakwa nĩaarekera Naamani, ũcio Mũsuriata, kuona atĩ nĩaarega kwamũkĩra indo iria aarehire; no rĩrĩ, niĩ-rĩ, o ta ũrĩa Jehova atũũraga muoyo, nĩngũmuuma thutha ndeng’erete, ngamwĩgwate kĩndũ.
• 21. Tondũ ũcio Gehazi agĩkĩrũmĩrĩra Naamani. Na rĩrĩ, hĩndĩ ĩrĩa Naamani onire mũndũ ateng’erete amũkinyĩre, agĩkiuma ngari-inĩ yake akamũtũnge, akĩmũũria atĩrĩ, No kũhoro?
• 22. Nake akiuga atĩrĩ, Ĩĩ, nĩ kũhoro. Nĩ mwathi wakwa wandekia, oiga atĩrĩ, Harĩ aanake erĩ a thiritũ ya ariũ a anabii maangora o ro rĩu moimĩte bũrũri ũrĩa wĩ irĩma nyingĩ wa Efiraimu; ndagũthaitha ũmahe taranda ĩmwe ya betha, o na nguo cia magarũrĩra merĩ.
• 23. Nake Naamani agĩkiuga atĩrĩ, Ĩtĩkĩra kuoya taranda igĩrĩ. Akĩmũringĩrĩria, agĩĩkĩra taranda igĩrĩ cia betha mĩhuko-inĩ ĩĩrĩ, agĩcioha, agĩciigĩrĩra ndungata ciake igĩrĩ, hamwe na nguo cia magarũrĩra merĩ, nacio igĩthiĩ mbere ya Gehazi icikuuĩte.
• 24. Na rĩrĩ, aakinya kĩrĩma-inĩ-rĩ, agĩciruta moko-inĩ ma cio, agĩciiga nyũmba, agĩcihitha kuo; agĩkĩreka andũ acio mathiĩ, nao magĩĩthiĩra.
• 25. No rĩrĩ, we mwene agĩthiĩ agĩtonya nyũmba, akĩrũgama mbere ya mwathi wake. Nake Elisha akĩmũũria atĩrĩ, Uuma kũ, Gehazi? Nake akiuga atĩrĩ, Niĩ, ndungata yaku, ndirĩ kũndũ ngũthiĩte.
• 26. Nake akĩmwĩra atĩrĩ, Githĩ ngoro yakwa ndĩgũthiĩte hamwe nawe, hĩndĩ ĩrĩa mũndũ ũcio agarũrũkire oimĩte ngari-inĩ yake, oke agũtũnge? Anga rĩu nĩyo hĩndĩ ya kwamũkĩra mbia, na kwamũkĩra nguo, na mĩgũnda ya mĩtamaiyũ na ya mĩthabibu, na mbũri, na ndegwa, na ndungata cia arũme o na cia andũ-a-nja?
• 27. Tondũ ũcio, mangũ macio ma Naamani megũtũũra makwĩgwatĩrĩire arĩ we, o na rũciaro rũaku, tene na tene. Nake Gehazi agĩkiuma hau mbere yake e na mangũ merũhĩte o ta ira.

Home