Go Back

2 Athamaki Chapter 24

• 1. Na rĩrĩ, matukũ-inĩ make Nebukadinezaru, mũthamaki wa Babuloni, agĩkĩambata kuo, nake Jehoiakimu agĩtuĩka ndungata yake mĩaka ĩtatũ; thutha wa ũguo akĩmũgarũka akĩmũrema.
• 2. Nake Jehova akĩmũrekeria mbũtũ cia gũtahana cia Akalidei, o na mbũtũ cia gũtahana cia Asuriata, o na mbũtũ cia gũtahana cia Amoabi, o na mbũtũ cia gũtahana cia ciana cia Amoni, ikamũũkĩrĩre; agĩgĩcirekia nĩguo ikahũre andũ a Juda, imanine biũ, o ta ũrĩa ũhoro wa Jehova watariĩ ũrĩa aaririe na kanua ka anabii ndungata ciake.
• 3. Ti-itherũ maũndũ macio maakorire andũ acio a Juda nĩ ũndũ wa ũrĩa gwathanĩtwo nĩ Jehova, nĩ getha amanine biũ, atige gũcoka kũmona rĩngĩ o na rĩ, nĩ ũndũ wa mehia marĩa Manase ehirie, o ta ũrĩa maũndũ mothe marĩa ekire maatariĩ;
• 4. o na ningĩ nĩ ũndũ wa thakame ĩrĩa aaitithirie ĩtarĩ na ũũru; nĩ gũkorũo nĩaaiyũririe Jerusalemu thakame ĩrĩa ĩtaarĩ na ũũru; nake Jehova ndaigana kuohanĩra ũndũ ũcio.
• 5. Na rĩrĩ, ciĩko iria ingĩ cia Jehoiakimu, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 6. Jehoiakimu agĩgĩkoma hamwe na maithe; nake mũrũwe, Jehoiakini, agĩthamaka ithenya rĩake.
• 7. Nake mũthamaki wa Misiri ndaigana gũcoka kuuma bũrũri wake rĩngĩ o na atĩa; nĩ ũndũ mũthamaki wa Babuloni nĩaatunyanire bũrũri wothe ũrĩa warĩ wa mũthamaki wa Misiri kuuma karũũĩ ka Misiri nginya o rũũĩ rũa Farati.
• 8. Na rĩrĩ, Jehoiakini aarĩ wa mĩaka ikĩmi na ĩnana hĩndĩ ĩrĩa aambĩrĩirie gũthamaka; agĩgĩthamaka kũu Jerusalemu mĩeri ĩtatũ; nake nyina etagwo Nehushita, mwarĩ wa Elinathani wa kũu Jerusalemu.
• 9. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa maũndũ mothe marĩa ithe ekaga maatariĩ.
• 10. Na rĩrĩ, ihinda rĩu ndungata cia Nebukadinezaru, mũthamaki wa Babuloni, ikĩambata Jerusalemu, narĩo itũũra rĩu rĩkĩrigicĩrio nĩguo rĩtunyanwo.
• 11. Nake Nebukadinezaru, mũthamaki wa Babuloni, agĩkinya itũũra-inĩ rĩu o ihinda rĩrĩa ndungata ciake ciarĩrigicagĩria irĩtunyane;
• 12. nake Jehoiakini, mũthamaki wa Juda, akiumagara agĩĩtwara kwĩ mũthamaki wa Babuloni, we mwene, o na nyina, o na ndungata ciake, o na anene ake, o na andũ arĩa mehokeirũo wĩra wa nyũmba yake. Nake mũthamaki wa Babuloni aakĩmũnyitire mwaka wa ĩnana ĩrĩa aakorirũo athamakĩte.
• 13. Nake Nebukadinezaru agĩkuua indo ciothe cia bata iria ciaigagwo nyũmba ya Jehova agĩthiĩ nacio, o na iria ciaigagwo nyũmba ya mũthamaki, o nacio indo ciothe cia thahabu iria Suleimani, mũthamaki wa Isiraeli, aathondekithĩtie ikaigwo hekarũ ya Jehova, agĩcitinangia tũcunjĩ, o ta ũrĩa Jehova oigĩte.
• 14. Nake agĩtaha andũ othe a Jerusalemu, o na anene othe, o na andũ othe arĩa maarĩ njamba irĩ hinya, nao andũ arĩa maagwatirũo mĩgwate maarĩ ngiri ikũmi, o na agĩtaha abundi othe, o na aturi; gũtikĩrĩ mũndũ o na ũmwe watigirũo, tiga o andũ arĩa athĩni mũno a bũrũri ũcio.
• 15. Agĩgĩthiĩ na Jehoiakini Babuloni, o na nyina wa mũthamaki, o na atumia a mũthamaki, o na andũ arĩa mehokeirũo wĩra wa nyũmba yake, o na andũ arĩa maarĩ igweta a bũrũri; acio othe-rĩ, akĩmataha, akĩmaruta Jerusalemu akĩmatwara Babuloni.
• 16. Nao andũ othe arĩa maarĩ hinya, nao nĩ andũ ngiri mũgwanja magĩtarũo, hamwe na abundi o na aturi, andũ ngiri ĩmwe, mũthamaki wa Babuloni akĩmatwara Babuloni, nao othe maarĩ na hinya na makohĩgĩrĩra mbaara.
• 17. Nake mũthamaki wa Babuloni agĩtua Matania, ithe mũnyinyi wa Jehoiakini, mũthamaki ithenya rĩake, na akĩmũgarũrĩra rĩĩtwa, akĩmũtua Zedekia.
• 18. Na rĩrĩ, Zedekia aarĩ wa mĩaka mĩrongo ĩĩrĩ na ũmwe hĩndĩ ĩrĩa aambĩrĩirie gũthamaka; agĩgĩthamaka mĩaka ikũmi na ũmwe Jerusalemu, nake nyina etagwo Hamutali, mwarĩ wa Jeremia wa kũu Libina.
• 19. Nake agĩĩka maũndũ marĩa monagwo marĩ moru nĩ Jehova, o ta ũrĩa maũndũ mothe maatariĩ marĩa Jehoiakimu ekaga.
• 20. Na rĩrĩ, tondũ wa marakara marĩa Jehova aarakarĩte, nĩkĩo maũndũ maya maakinyĩire Jerusalemu o na Juda, ma atĩ amaingate biũ, mehere mbere yake; nake Zedekia akĩrema mũthamaki wa Babuloni.

Home