Go Back

2 Athamaki Chapter 20

• 1. Na rĩrĩ, matukũ-inĩ o ro macio, Hezekia akĩrũara, agĩkuhĩhĩria gũkua. Nake Isaia mũnabii, mũrũ wa Amozu, agĩthiĩ agĩkinya harĩ we, akĩmwĩra atĩrĩ, Jehova oigĩte ũũ: Wĩgaĩre nyũmba yaku, nĩ ũndũ nĩũgũkua; ndũtũũra muoyo.
• 2. Nake agĩkĩhũgũra ũthiũ akĩũroria rũthingo-inĩ, akĩhoya Jehova, akiuga atĩrĩ,
• 3. Wee, Jehova, ndagũthaitha ũririkane ũrĩa ndũire ’thiaga mbere yaku nũmĩtie ũhoro-wa-ma, o na ngakũrũmĩrĩra na ngoro yakwa yothe, o na ngeka maũndũ marĩa monagwo marĩ mega nĩwe. Nake Hezekia akĩrĩra mũno.
• 4. Na gũgĩkinya atĩrĩ, atĩ Isaia atanakinya itũũra-inĩ gatagatĩ-rĩ, ndũmĩrĩri ya Jehova ĩkĩmũkinyĩrĩra, akĩĩrũo atĩrĩ,
• 5. Garũrũka ũcoke wĩre Hezekia, mũnene wa andũ akwa, atĩrĩ, Jehova, Ngai wa thoguo Daudi, oiga ũũ: Nĩndaigua ihoya rĩaku, na nĩnyonete maithori maku, na atĩrĩrĩ, nĩngũkũhonĩa; na matukũ atatũ nĩũkaambata ũthiĩ nyũmba ya Jehova.
• 6. Namo matukũ maku nĩngũmongerera mĩaka ikũmi na ĩtano; nawe wee mwene hamwe na itũũra rĩrĩ nĩngũmũhonokia mũtikegwatĩrũo nĩ mũthamaki wa Ashuri narĩo itũũra rĩrĩ, nĩngũrĩgitĩra nĩ ũndũ wakwa niĩ mwene, o na ũndũ wa gũconokera Daudi ndungata yakwa.
• 7. Nake Isaia akiuga atĩrĩ, Oyai gĩkũmba kĩa ngũyũ. Nao andũ magĩkĩoya, magĩkĩigĩrĩra ihũha-inĩ, nake akĩhona.
• 8. Nake Hezekia akĩũria Isaia atĩrĩ, Kĩmenyithia gĩa atĩ nĩngaambata ’thiĩ nyũmba ya Jehova matukũ atatũ nĩ kĩrĩkũ?
• 9. Nake Isaia akiuga atĩrĩ, Gĩkĩ nĩkĩo gĩgũtuĩka kĩmenyithia harĩ wee, kiumĩte he Jehova, gĩa atĩ nĩegwĩka ũndũ ũcio oigĩte, Rĩu-rĩ, ũkwenda kĩĩruru gĩtwarũo na mbere matĩĩna ikũmi, kana ũkwenda gĩcokio na thutha matĩĩna ikũmi?
• 10. Nake Hezekia agĩcokia atĩrĩ, Kĩĩruru gũthiĩ na mbere matĩĩna ikũmi nĩ ũndũ mũhũthũ. Nĩ kaba kĩĩruru gĩcokio na thutha matĩĩna ikũmi.
• 11. Nake Isaia mũnabii agĩkaĩra Jehova; nake Jehova agĩcokia kĩĩruru na thutha matĩĩna ikũmi, o matĩĩna macio ikũmi kĩĩruru kĩu kĩamenyithanagia thaa kĩarĩkĩtie kũhĩtũka imenyithanĩrio-inĩ rĩa thaa rĩa Ahazu.
• 12. Na rĩrĩ, hĩndĩ ĩo Berodaku-baladani, mũrũ wa Baladani, mũthamaki wa Babuloni, agĩtwarithĩria Hezekia marũa, o na kĩheo; nĩ ũndũ nĩaaiguĩte atĩ Hezekia aarĩ mũrũaru.
• 13. Nake Hezekia agĩĩtĩkĩra ũhoro wa andũ acio, akĩmonia nyũmba yake kũndũ guothe kũrĩa indo cia goro ciaigagwo, nacio nĩ betha, na thahabu, o na mahuti marĩa manungaga wega, o na maguta ma goro, o na nyũmba ĩrĩa indo ciake cia mbaara ciaigagwo, o na indo ciothe iria ciarĩ mũthithũ-inĩ wa indo ciake cia bata; na gũtirĩ kĩndũ o na kĩ thĩinĩ wa nyũmba yake, o na kũndũ guothe kũrĩa Hezekia aathanaga, ataamonirie.
• 14. Hĩndĩ ĩo Isaia, ũcio mũnabii, agĩgĩthiĩ agĩkinya kwĩ Hezekia, mũthamaki, akĩmũũria atĩrĩ, Andũ acio moigire atĩa? Nao magĩũka kũrĩ wee-rĩ, mekuumĩte na kũ? Nake Hezekia akiuga atĩrĩ, Mekuumĩte bũrũri wĩ kũraya, o bũrũri wa Babuloni.
• 15. Agĩkĩũria atĩrĩ, Nĩ kĩ monire gwaku mũciĩ? Nake Hezekia agĩcokia atĩrĩ, Indo ciothe iria ii gwakwa nĩmacionire; o nacio indo ciakwa ciothe cia bata-rĩ, hatirĩ kĩndũ o na kĩmwe itanamonia.
• 16. Nake Isaia akĩĩra Hezekia atĩrĩ, Ta igua uuge wa Jehova.
• 17. Atĩrĩrĩ, matukũ nĩmagoka rĩrĩa indo ciothe iria irĩ gwaku mũciĩ, o na indo iria mathoguo maatũire mahaĩte magaciiga o nginya ũmũthĩ, igakuuwo itwarũo Babuloni. Gũtirĩ kĩndũ o na kĩmwe gĩgatigio; ũguo nĩguo Jehova oigĩte.
• 18. Nacio ihĩĩ ciaku iria ũgaciara ciume mũthimo waku nĩmagataha imwe ciacio igatũũre nyũmba ya mũthamaki wa Babuloni irĩ cia thiritũ ya andũ arĩa mehokeirũo wĩra wa nyũmba yake.
• 19. Hĩndĩ ĩo Hezekia agĩkĩĩra Isaia atĩrĩ, Uuge wa Jehova ũcio waaria nĩ mwega. Agĩcoka akiuga ũũ: Githĩ ũguo tiguo, kũngĩkorũo nĩgũkũgĩa thayũ o na ũhoro-wa-ma matukũ-inĩ makwa?
• 20. Na rĩrĩ, ciĩko iria ingĩ cia Hezekia, o na hinya ũrĩa wothe aarĩ naguo, o na ũhoro wa ũrĩa aathondekithirie karia, o na mũtaro, agĩtwarithia maĩ itũũra-inĩ thĩinĩ-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 21. Nake Hezekia agĩkoma hamwe na maithe; nake Manase, mũrũwe, agĩthamaka ithenya rĩake.

Home