Go Back

2 Athamaki Chapter 19

• 1. Na gũgĩkinya atĩrĩ, atĩ mũthamaki ti Hezekia aaigua ũhoro ũcio, agĩtembũranga nguo ciake, akĩĩhumba tama wa ikũnia, agĩthiĩ agĩtonya nyũmba ya Jehova.
• 2. Ningĩ akĩrekia Eliakimu, mũrori wa maũndũ mothe ma nyũmba yake, na Shebina mwandĩki-marũa, o na athuri amwe a athĩnjĩri-Ngai, mehumbĩte matama ma ikũnia, mathiĩ kwĩ Isaia mũrũ wa Amozu, mũnabii.
• 3. Magĩkĩmwĩra atĩrĩ, Hezekia oiga ũũ: Mũthenya wa ũmũthĩ nĩguo mũthenya wa thĩna, na wa ngũmano, o na wa kũmenwo; nĩ ũndũ twana nĩtũkinyĩrĩire hĩndĩ ya gũciarũo, na hinya wa kuohoka ũkaaga.
• 4. No gũkorũo Jehova Ngai waku nĩaiguĩte ũhoro wothe ũrĩa warĩtio nĩ Rabishake, ũrĩa ũrareketio nĩ mwathi wake mũthamaki wa Ashuri oke arume Ngai ũrĩa ũrĩ muoyo, nake Jehova Ngai waku hihi arũithanĩrie ũhoro ũcio aiguĩte! Tondũ ũcio hoera andũ aya matigarĩte ũrorete igũrũ.
• 5. Ndungata icio cia Hezekia, mũthamaki, igĩgĩkinya he Isaia.
• 6. Nake Isaia agĩciĩra atĩrĩ, Ĩrai mwathi wanyu atĩ Jehova ekuuga ũũ: Menya wĩtigĩre ciugo icio ũiguĩte, o icio ndungata cia mũthamaki wa Ashuri inumĩte nacio.
• 7. Atĩrĩrĩ, nĩngũmwĩkĩra ngoro ĩngĩ, nake nĩekũheo ũhoro wa mũhuhu, naguo ũhoro ũcio ũtũme ahũndũke acoke bũrũri wake we mwene; na niĩ ndũme oragĩrũo na rũhiũ rũa njora o kũu bũrũri wake kĩũmbe.
• 8. Nake Rabishake agĩkĩhũndũka, agĩkora mũthamaki wa Ashuri akĩrũa mbaara na Libina; nĩ ũndũ nĩaaiguĩte atĩ nĩoimĩte Lakishi.
• 9. Na rĩrĩ, hĩndĩ ĩrĩa mũthamaki wa Ashuri aaiguire ũhoro wa Tirihaka, mũthamaki wa Kushi, ũkĩheanwo ũũ: Atĩrĩrĩ, nĩoimagarĩte agoka kũhũrana nawe, agĩkĩrekania rĩngĩ he Hezekia, akiuga atĩrĩ,
• 10. Thiĩi mwarie na Hezekia, mũthamaki wa Juda, mũmwĩre ũũ: Menya ũreke Ngai waku ũrĩa ũikaraga wĩhokete akũhenie akiuga atĩ Jerusalemu rĩtitunyanwo rĩnenganĩrũo moko-inĩ ma mũthamaki wa Ashuri.
• 11. Atĩrĩrĩ, wee nĩwĩiguĩrĩire ũrĩa athamaki a Ashuri maaneka mabũrũri mothe, makamaamũra o ma kũninwo biũ; wee nĩwe ũgũkĩhonoka?
• 12. Kũrĩ kwoneka hihi atĩ ngai cia andũ a ndũrĩrĩ iria aa baba maaninire o kũnina biũ nĩimahonoketie, nacio nĩ Gozani, na Harani, na Rezefu, o na ariũ a Edeni arĩa maatũire Telasaru?
• 13. Rĩu-rĩ, mũthamaki wa Hamathu arĩ ha, o na mũthamaki wa Aripadi, o na mũthamaki wa itũũra rĩa Sefarivaimu, o na wa Hena, o na wa Iva?
• 14. Nake Hezekia akĩiyũkia marũa macio moko-inĩ ma andũ acio maareketio, akĩmathoma; agĩcoka akĩambata agĩthiĩ nyũmba ya Jehova, akĩmakũnjũra akĩmaiga mbere ya Jehova.
• 15. Nake Hezekia akĩhoera Jehova o hau mbere yake, akiuga atĩrĩ, Wee Jehova Ngai wa Isiraeli, o wee ũikaraga gatagatĩ-inĩ ka makerubi, wee wiki nĩwe Ngai mwene mabũrũri mothe marĩa mathamakagwo gũkũ thĩ, na nĩwe wombire igũrũ na thĩ.
• 16. Tega gũtũ, wee Jehova, wĩiguĩre ũhoro ũyũ; racũria maitho maku, wee Jehova, wĩonere ũrĩa maũndũ maya matariĩ, o na ũigue ciugo ici Senakeribu arehithĩtie nĩ getha arume Ngai ũrĩa ũrĩ muoyo.
• 17. Ti-itherũ, Jehova, athamaki a Ashuri maananina ndũrĩrĩ, o na mabũrũri ma cio,
• 18. o na magĩikia ngai ciacio mwaki-inĩ; nĩ ũndũ itikoragwo irĩ ngai cia ma, no nĩ cia wĩra wa moko ma andũ, ithondeketwo na mĩtĩ o na mahiga; na tondũ ũcio igĩkĩninwo biũ.
• 19. Tondũ ũcio, wee Jehova Ngai witũ, ndagũthaitha ũtũhonokie rĩu ũtũrute moko-inĩ make, nĩ getha mothamaki mothe ma thĩ mamenye atĩ wee Jehova nĩwe Ngai, o wee wiki.
• 20. Hĩndĩ ĩo Isaia, mũrũ wa Amozu, akĩrekania he Hezekia, akĩmwĩra atĩrĩ, Jehova, Ngai wa Isiraeli, oigĩte ũũ: Kuona atĩ nĩũ’hoete ngũhonokie harĩ Senakeribu, mũthamaki wa Ashuri-rĩ, nĩndaigua ihoya rĩaku.
• 21. Naguo ũhoro ũrĩa Jehova aarĩtie ũmũkoniĩ nĩguo ũyũ: Mũirĩtu gathirange mwarĩ wa Zayuni nĩ kũmena akũmenete, na agagũthekerera, agakũnyarara. Mwarĩ wa Jerusalemu nĩagũthiũrũrĩirie mũtwe.
• 22. Rĩu-rĩ, ũcio ũmenete, o na ũkamũruma-rĩ, nĩ ũrĩkũ? Na ningĩ-rĩ, ũraihĩtie kanua, o namo maitho maku ũkamakũũra ũũkĩrĩre ũ? Nĩ ũũkĩrĩre ũrĩa Mũtheru wa Isiraeli.
• 23. Wee-rĩ, nĩ kũmenithia wamenithirie Mwathani na ũndũ wa andũ arĩa warekirie, ũkiuga atĩrĩ, Tondũ wa ũrĩa ngari ciakwa cia ita ciingĩhĩte-rĩ, nĩ kwambata nyambatĩte o kũrĩa gacũmbĩrĩ ka irĩma, o na ngakinya ituri-inĩ cia Lebanoni kũrĩa gũturu; nayo mĩtarakwa yakuo; ĩrĩa mĩraya mũno nĩngamĩtema, o na mĩthengera ĩrĩa mĩega mũno yakuo o na ndonye gĩikaro-inĩ gĩake kĩrĩa kĩrĩ mũthia-inĩ mũno, o kũu kĩrĩti-inĩ kĩa mũgũnda wake ũrĩa ũgĩaga maciaro maingĩ.
• 24. Nĩndĩĩyenjeire maĩ ma kũndũ kũngĩ, na ngamanyua; nacio njũĩ ciothe cia Misiri ngacihũithia na ikinya rĩa magũrũ makwa.
• 25. Jehova arakĩũria ũũ: Kaĩ ũtarĩ waigua atĩ nĩ niĩ ndekire maũndũ maya o tene, o na ngĩcirĩra ũhoro wamo mahinda marĩa ma tene o tene? Na rĩu nĩguo ndahingia ũndũ ũcio biũ, atĩ wee nĩwe ũthurĩtwo ũtuĩke wa kwananga matũũra marĩa mairigĩtwo, matuĩke maganjo matheri ma hĩba cia mahuti.
• 26. Tondũ ũcio andũ arĩa maamatũũraga-rĩ, hinya wao nĩwamanyihĩire, na makĩgegeara, o na magĩconorithio; nao magĩkĩhaana o ta nyeki ya gĩthaka-inĩ, o na ta kanyeki karuru, o na ta ĩrĩa ĩmeraga nyũmba igũrũ, o na ta ngano ĩrĩa ĩhĩĩte ĩtanakũra.
• 27. No rĩrĩ, mĩikarĩre yaku nĩndĩmĩũĩ, o na miumagarĩre, o na mĩinũkĩre, o na marakara marĩa ũndakarĩire.
• 28. Tondũ wa marakara macio ũndakarĩire, o na ningĩ tondũ wa ũrĩa rũng’athio rũaku rũambatĩte rũgakinya matũ-inĩ makwa-rĩ, nĩ gĩcũhĩ gĩakwa ngũgwĩkĩra iniũrũ, nako kanua gaku ndĩkohe na mũkwa wa kanua, njoke ngũhũgũre na thutha, ngũcokie na njĩra ĩrĩa wokĩire.
• 29. Wee nawe Hezekia-rĩ, ũndũ ũyũ nĩguo ũgũkũmenyithia ũhoro ũcio; atĩ mwaka ũyũ mũkũrĩa irio cia maitĩka, o naguo mwaka wa kerĩ mũkarĩa maitĩka ma irio o ro icio; naguo mwaka wa ĩtatũ kĩhandei, na mũgethe, na mũhande mĩgũnda ya mĩthabibu, na mũrĩe maciaro mayo.
• 30. Namo matigari marĩa mahonokete ma nyũmba ya Juda nĩmagacoka gũikũrũkia mĩri na thĩ; nakuo na igũrũ maciare maciare.
• 31. Nĩ gũkorũo Jerusalemu nĩgũkoima matigari ma andũ, o nakuo kĩrĩma-inĩ gĩa Zayuni kuume arĩa makahonoka; nakuo kwĩrutanĩria kwa Jehova nĩkuo gũgatũma ũndũ ũcio woneke.
• 32. Tondũ ũcio, ha ũhoro wa mũthamaki wa Ashuri Jehova oigĩte ũũ: Ndagoka itũũra rĩrĩ, o na kana aikie mũguĩ o na ũmwe kuo, o na kana arĩng’ethere na ngo, o na kana aite kĩhumbu gĩa tĩri akĩrĩũkĩrĩra.
• 33. Njĩra ĩrĩa okĩire-rĩ, noyo akahũndũkĩra, na ndagakinya itũũra rĩrĩ, ũguo nĩguo Jehova oigĩte.
• 34. Nĩ gũkorũo nĩngagitĩra itũũra rĩrĩ ndĩrĩhonokie nĩ ũndũ wa ũhoro wakwa niĩ mwene, o na ũndũ wa gũconokera Daudi, ndungata yakwa.
• 35. Na gũgĩkinya atĩrĩ, atĩ ũtukũ o ro ũcio mũraika wa Jehova agĩkiumagara, agĩthiĩ akĩũraga andũ ngiri igana rĩmwe rĩa mĩrongo ĩnana na atano o kũu kĩraaro-inĩ kĩa Aashuri; na rĩrĩa andũ maarokire gũũkĩra rũcinĩ tene, magĩkora atĩ andũ acio othe no ciimba theri.
• 36. Tondũ ũcio Senakeribu, mũthamaki wa Ashuri, akiuma kũu akĩĩhũndũkĩra, akĩinũka gwake Nineve, akĩĩikarĩra kuo.
• 37. Na gũgĩkinya atĩrĩ, atĩ hĩndĩ ĩrĩa aahoyagĩra nyũmba ya Nisiroku ngai yake-rĩ, Adarameleki na Sharezeru makĩmũũraga na hiũ cia njora, na makĩũrĩra bũrũri wa Ararati. Nake Esarihadoni, mũrũwe, agĩthamaka ithenya rĩake.

Home