Go Back

2 Athamaki Chapter 18

• 1. Na gũgĩkinya atĩrĩ, atĩ mwaka wa ĩtatũ ĩrĩa Hoshea, mũrũ wa Ela, mũthamaki wa Isiraeli, aakorirũo athamakĩte, nĩguo Hezekia, mũrũ wa Ahazu, mũthamaki wa Juda, aambĩrĩirie gũthamaka.
• 2. Nake aarĩ wa mĩaka mĩrongo ĩĩrĩ na ĩtano hĩndĩ ĩo aambĩrĩirie gũthamaka; agĩgĩthamaka mĩaka mĩrongo ĩĩrĩ na kenda Jerusalemu; nake nyina etagwo Abi, mwarĩ wa Zekaria.
• 3. Nake agĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe marĩa ithe, Daudi, ekaga maatariĩ.
• 4. Agĩkĩeheria matĩri ma kũndũ gũtũũgĩru, o nacio itugĩ cia kũhoyũo agĩciunanga, o na Ashera akĩmĩtemenga akĩmĩgũithia thĩ; o nayo nyamũ-ya-thĩ ya gĩcango ĩrĩa yathondeketwo nĩ Musa akĩmĩunanga tũcunjĩ; nĩ ũndũ o na nginya matukũ macio ciana cia Isiraeli nĩciamĩcinagĩra ũbumba; nayo ĩgĩĩtwo Nehushitani.
• 5. Nake agĩgĩtũũra ehokete Jehova, Ngai wa Isiraeli, o nginya gũkĩoneka atĩ o na thutha wake gũtiacokire kũgĩa mũndũ ũngĩ take thĩinĩ wa athamaki othe a Juda, o na gũtiarĩ ũngĩ take thĩinĩ wa arĩa maarĩ mbere yake.
• 6. Nĩ ũndũ nĩaatũũrire egwatanĩtie na Jehova mũno, na ndaigana gũtiga kũmũrũmĩrĩra; no rĩrĩ, nĩaamenyereire maathani make, o macio Jehova aathire Musa.
• 7. Nake Jehova agĩgĩikara hamwe nake; nakuo kũndũ kũrĩa guothe erekagĩra, akĩgaacĩra; ningĩ akĩrega gũcoka gwathwo nĩ mũthamaki wa Ashuri, agĩtiga kũmũtungatĩra.
• 8. Nake akĩhũra Afilisiti o nginya Gaza, o na ndere-inĩ ciakuo, akĩmatoria kuuma o mĩthiringo-inĩ ya nyũmba ndaya na igũrũ ya arangĩri, o nginya matũũra marĩa mairigĩtwo na hinya.
• 9. Na gũgĩkinya atĩrĩ, atĩ mwaka wa ĩna ĩrĩa Hezekia aakorirũo athamakĩte, na nĩguo mwaka wa mũgwanja wa Hoshea wa Ela, mũthamaki wa Isiraeli, Shalimaneseri, mũthamaki wa Ashuri, akĩambata nĩguo akahũre Samaria, akĩrĩrigicĩria arĩtunyane.
• 10. Na mĩaka ĩtatũ yathira makĩrĩtunyana; naguo nĩguo mwaka wa ĩtandatũ ĩrĩa Hezekia aakorirũo athamakĩte, na noguo mwaka wa kenda wa Hoshea, mũthamaki wa Isiraeli; mwaka ũcio nĩguo Samaria rĩatunyanirũo.
• 11. Nake mũthamaki wa Ashuri agĩgĩtaha andũ a Isiraeli, akĩmatwara Ashuri, akĩmaiga matũũra ma Hala, na Haboru, marĩa me hũgũrũrũ-inĩ cia rũũĩ rũa Gozani, o na matũũra-inĩ ma Amedi, matũũre kuo;
• 12. ũguo nĩguo gwakinyire nĩ ũndũ nĩmaaregire gwathĩkĩra uuge wa Jehova Ngai wao, makĩagarara kĩrĩkanĩro gĩake, o maũndũ mothe marĩa Musa ndungata ya Jehova aathanĩte, makĩaga kũmaigua o na kana kũmeka.
• 13. Na rĩrĩ, mwaka wa ikũmi na ĩna ĩrĩa Hezekia, mũthamaki, aakorirũo athamakĩte-rĩ, Senakeribu, mũthamaki wa Ashuri, agĩkĩambata akahũrane na matũũra mothe marĩa mairigĩtwo ma Juda, akĩmatunyana.
• 14. Nake Hezekia, mũthamaki wa Juda, akĩrekia mũndũ athiĩ kwĩ mũthamaki wa Ashuri o kũu Lakishi, akamwĩre ũũ: Atĩrĩrĩ, nĩnjĩhĩtie; hũndũka ũnjeherere, naguo mũrigo ũrĩa wothe ũrĩnjigĩrĩra, nĩngũũkuua. Nake mũthamaki wa Ashuri agĩtua atĩ Hezekia, mũthamaki wa Juda, arute taranda magana matatũ cia betha, o na taranda mĩrongo ĩtatũ cia thahabu.
• 15. Nake Hezekia agĩkĩmũhe betha yothe ĩrĩa yonekire thĩinĩ wa nyũmba ya Jehova, o na ya kũndũ kũrĩa kwaigagwo mũthithũ wa indo cia bata kũu nyũmba ya mũthamaki.
• 16. Ningĩ hĩndĩ ĩo Hezekia mũthamaki wa Juda, akĩruta thahabu ĩrĩa yarĩ mĩrango-inĩ ya hekarũ ya Jehova, o na ĩrĩa aahumbĩte itugĩ nayo, akĩmĩhe mũthamaki wa Ashuri.
• 17. Ningĩ mũthamaki wa Ashuri akĩrekia Taritani, na Rabisarisi, na Rabishake, moime Lakishi marĩ na mbũtũ nene ya ita, makinye Jerusalemu. Nao magĩkĩambata magĩkinya Jerusalemu. Na rĩrĩ, maambata-rĩ, makĩrũgama mũberethi-inĩ wa karia ka rũgongo igũrũ, o karĩa karĩ njĩra-inĩ ya gĩtwari ĩrĩa ĩgereire gĩthaka kĩa mũthambia nguo.
• 18. Nao meta mũthamaki-rĩ, Eliakimu wa Hilikia, mũrori wa maũndũ mothe ma nyũmba ya mũthamaki, na Shebina, mwandĩki-marũa, na Joa wa Asafu, mwandĩki wa maũndũ ma ihinda rĩu, magĩkiumagara mathiĩ harĩ o.
• 19. Nake Rabishake akĩmera atĩrĩ, Thiĩi mwĩre Hezekia ũũ: Atĩrĩrĩ, mũthamaki ũrĩa mũnene, o we mũthamaki wa Ashuri, aakũũria atĩrĩ, Mwĩhoko ũyũ ũtũire wĩhokete nĩ ũrĩkũ hihi?
• 20. Wee uugaga ũũ: Ũtaarani wĩ ho, o na hinya wa kũrũa mbaara. No rĩrĩ, nĩ ciugo cia tũhũ. Rĩu-rĩ, mũndũ ũrĩa wĩhokete nĩ getha ũneme-rĩ, nĩ ũrĩkũ?
• 21. Atĩrĩrĩ, wee wĩhokete atĩ nĩũgwĩtirimia na kamũrangi kau kagondoku, nako nĩko Misiri; na mũndũ angĩĩtirimia nako kaamũtheca rũhĩ, karũtũrĩkie; ũguo nĩguo Firauni mũthamaki wa Misiri atariĩ harĩ andũ othe arĩa mamwĩhokaga.
• 22. No mũngĩnjĩra ũũ: Ithuĩ twĩhokete Jehova Ngai witũ-rĩ, githĩ ũcio tiwe Hezekia aatharirie matĩri make ma kũndũ gũtũũgĩru, o na igongona ciake, na agĩcoka akĩĩra Juda na Jerusalemu ũũ: Mũrĩhoyagĩra Ngai kĩgongona-inĩ gĩkĩ, o gũkũ Jerusalemu.
• 23. Na tondũ ũcio ta kĩgĩe na karĩko na mwathi wakwa, mũthamaki wa Ashuri, ndĩgĩkũhe mbarathi ngiri igĩrĩ, ũngĩgĩkorũo wee mwene haku wakĩhota kwĩonera acihaici.
• 24. Rĩu-rĩ, ũngĩkĩmaaga, wakĩhota atĩa gũtũma ũmwe wa arĩa anyinyi mũno wa anene a athigari aitũ, ithuĩ ndungata cia mwathi wakwa, ahutate ore? Na ũtũũre wĩhokaga Misiri nĩguo ũteithio na ngari cia ita, o na andũ arĩa mathiaga mahaicĩte mbarathi?
• 25. Kaĩ mũgwĩciria atĩ nyambatĩte ’hũrane na kũndũ gũkũ ndĩkũnine Jehova atarĩ ũhoro-inĩ ũcio? Jehova nĩwe wanjĩrire atĩrĩ, Ambata ũthiĩ ũkahũre bũrũri ũcio, ũũnine biũ.
• 26. Hĩndĩ ĩo Eliakimu wa Hilikia, na Shebina, na Joa, magĩkĩĩra Rabishake ũũ: Twagũthaitha aria na ithuĩ, ndungata ciaku, na rũthiomi rũa Suriata, nĩ ũndũ nĩtũkũrũigua; no tiga gũtwarĩria na rũthiomi rũa Ayahudi, andũ aya maikarĩte rũthingo-inĩ igũrũ makĩiguaga.
• 27. No Rabishake agĩcokia atĩrĩ, Kaĩ mũgwĩciria atĩ mwathi wakwa aakĩndekirie harĩ mwathi wanyu, o na harĩ inyuĩ nĩguo ndĩmũhe ũhoro ũyũ, na ndandekie harĩ andũ aya maikarĩte rũthingo-inĩ igũrũ, o aya makarĩa mai mao o ene, na manyuage mathugumo mao me rũmwe na inyuĩ?
• 28. Hĩndĩ ĩo Rabishake akĩrũgama, akĩanĩrĩra na mũgambo mũnene, akĩaria na rũthiomi rũa Ayahudi, akiuga atĩrĩ, Inyuĩ ta iguai ũhoro wa mũthamaki ũrĩa mũnene mũno, o we ũcio mũthamaki wa Ashuri.
• 29. Mũthamaki ũcio oigĩte ũũ: Menyai mũreke Hezekia amũhenie, nĩ ũndũ ndehota kũmũhonokia amũrute moko-inĩ make;
• 30. o na ningĩ menyai mũreke Hezekia atũme mwĩhoke Jehova akiuga atĩ, Ti-itherũ Jehova nĩegũtũhonokia, na atĩ, Itũũra rĩrĩ rĩtineanwo moko-inĩ ma mũthamaki wa Ashuri.
• 31. Tigai kũigua ũhoro ũrĩa mũkũheo nĩ Hezekia; nĩ gũkorũo mũthamaki wa Ashuri oigĩte atĩrĩ, Ta rekei tware ũhoro na inyuĩ kũgĩe thayũ, na muume kũu mũrĩ mũũke harĩ niĩ; na mũndũ o mũndũ atũũre arĩaga thabibu cia mũthabibu wake, o na ngũyũ cia mũkũyũ wake, na ningĩ inyuothe o mũndũ anyuage maĩ ma irima rĩake kĩũmbe;
• 32. o nginya rĩrĩa ngoka kũmũiyĩra ndĩmũtware bũrũri ũtariĩ o ta bũrũri ũyũ wanyu, naguo nĩ bũrũri wĩ ngano, o na ndibei, na wĩ irio, o na mĩgũnda ya mĩthabibu, na wĩ maguta ma ndamaiyũ, o na ũũkĩ; nĩ getha mũtũũre muoyo mũtigakue. No tigai kũigua Hezekia hĩndĩ ĩrĩa ekũmũringĩrĩria akiuga atĩ, Jehova nĩegũtũhonokia.
• 33. Rĩu-rĩ, he ngai o na ĩmwe, thĩinĩ wa ngai cia ndũrĩrĩ, ĩrĩ yahonokia bũrũri wayo o na rĩ, ĩkĩũruta moko-inĩ ma mũthamaki wa Ashuri?
• 34. Hĩ! ngai cia Hamathu-rĩ, ikĩrĩ ha rĩu? Ĩ cia Aripadi? O na cia Sefarivaimu, o na cia Hena, o na cia Iva? ngai icio-rĩ, nĩciahonokirie Samaria ndikarĩĩgwatĩre?
• 35. Nĩ ngai irĩkũ thĩinĩ wa ngai ciothe cia mabũrũri mothe irĩ ciahonokia bũrũri wacio, ndikawĩgwatĩre, atĩ nĩkĩo mũgwĩciria atĩ Jehova aahonokia Jerusalemu, ndikarĩĩgwatĩre?
• 36. No rĩrĩ, andũ acio no gũkira maakirire ki, na matiigana kũmũtumũka; nĩ gũkorũo mũthamaki aathanĩte ũũ: Mũtikamũcokerie ũndũ.
• 37. Hĩndĩ ĩo Eliakimu wa Hilikia, mũrori wa maũndũ mothe ma nyũmba ya mũthamaki, na Shebina mwandĩki-marũa, na Joa wa Asafu, mwandĩki wa maũndũ ma ihinda rĩu, magĩthiĩ magĩkinya kwĩ Hezekia, matembũrangĩte nguo ciao, makĩmũhe ũhoro ũcio Rabishake oigĩte.

Home