Go Back

2 Athamaki Chapter 17

• 1. Na rĩri, mwaka wa ikũmi na ĩĩrĩ ĩrĩa Ahazu, mũthamaki wa Juda, aakorirũo athamakĩte, nĩguo Hoshea, mũrũ wa Ela, aambĩrĩirie gũthamakĩra Isiraeli o kũu Samaria, agĩthamaka mĩaka kenda.
• 2. Nake agĩĩka maũndũ marĩa monagwo marĩ moru nĩ Jehova; no ti ta athamaki a Isiraeli arĩa maarĩ mbere yake.
• 3. Nake Shalimaneseru, mũthamaki wa Ashuri, akĩambata nĩguo akahũrane nake, nake Hoshea agĩgĩĩtĩkĩra gwathwo nĩwe, akamũtwaragĩra igoti.
• 4. Thutha ũcio mũthamiki wa Ashuri akĩona atĩ Hoshea nĩagĩĩte ndundu ya kũmũũkĩrĩra, nĩ ũndũ nĩaareketie andũ gwĩ So, mũthamaki wa Misiri, na agatiga gũcoka kũrutĩra mũthamaki ũcio wa Ashuri igoti ta ũrĩa aatũire ekaga mwaka o mwaka; tondũ ũcio mũthamaki wa Ashuri akĩmũhingĩra korokoro-inĩ akĩmuoha kuo.
• 5. Agĩgĩcoka akĩambata, akĩgera bũrũri ũcio wothe, agĩkinya Samaria, nake akĩrĩrigicĩria mĩaka ĩtatũ nĩguo arĩtunyane.
• 6. Na rĩrĩ, mwaka wa kenda ĩrĩa Hoshea aakorirũo athamakĩte-rĩ, nĩguo mũthamaki wa Ashuri aatunyanire Samaria, agĩgĩtaha Aisiraeli, akĩmatwara bũrũri wa Ashuri, akĩmaiga matũũra ma Haia na Haboru marĩa me hũgũrũrũ-inĩ cia rũũĩ rũa Gozani, o na akĩmaiga matũũra-inĩ ma Amedi, matũũre kuo.
• 7. Na rĩrĩ, gwatuĩkire ũguo nĩ ũndũ ciana cia Isiraeli nĩciehirie Jehova Ngai wacio, o we waciambatĩtie, agaciruta bũrũri wa Misiri, ciume watho-inĩ wa Firauni mũthamaki wa Misiri; nacio igĩkĩgwata gwĩtigĩra ngai ingĩ,
• 8. o na ikarũmĩrĩra irĩra cia watho wa kũrũmĩrĩrũo cia ndũrĩrĩ iria Jehova aaingatire ciehere mbere ya ciana cia Isiraeli, o na irĩra cia athamaki a Isiraeli iria maathanĩte irũmagĩrĩrũo.
• 9. Nacio ciana cia Isiraeli igĩĩka Jehova Ngai wacio maũndũ materekereire na hitho; nacio igĩkĩĩyakĩra matĩri ma kũndũ gũtũũgĩru matũũra-inĩ ma cio mothe kũndũ guothe, imarutĩtie o mĩthiringo-inĩ ya nyũmba ndaya na igũrũ ya arangĩri, o nginya matũũra-inĩ marĩa mairigĩtwo na hinya.
• 10. Ningĩ ikĩĩhandĩra itugĩ cia kũhoyũo, o na Maashera, kĩrĩma-inĩ kĩrĩa gĩothe kĩraya, o na mũtĩ-inĩ ũrĩa wothe mũruru.
• 11. Nakuo kũu igĩgĩcinĩra ũbumba matĩri-inĩ mothe ma kũndũ gũtũũgĩru, o ta ũrĩa ndũrĩrĩ ciekaga iria Jehova aaingatire kũu ciehere mbere yacio; nacio igĩĩka maũndũ ma waganu igĩthirĩkia Jehova ikĩmũrakaria;
• 12. nacio igĩtungatĩra mĩhianano ya kũhoyũo o ĩrĩa Jehova aaciheete ũhoro wayo agaciĩra ũũ: Mũtikaneke ũndũ ũcio.
• 13. No rĩrĩ, Jehova nĩoimbũrĩire Isiraeli o na Juda ũhoro wake na kanua ka mũnabii o wothe, o na ka mũndũ o wothe ũrĩa muoni maũndũ, akamera atĩrĩ, Garũrũkai, mũtigane na mĩthiĩre yanyu mĩũru, mũmenyagĩrĩre maathani makwa o na irĩra cia watho wakwa wa kũrũmĩrĩrũo, o ta ũrĩa watho wothe ũtariĩ ũrĩa ndaathire maithe manyu, o na ũrĩa ndamũrehithĩirie na tũnua twa anabii ndungata ciakwa.
• 14. No rĩrĩ, o na harĩa meragwo ũguo-rĩ, matiigana kũigua, no nĩ kũũmia momirie ciongo ciao, o ta ũrĩa maithe mao momĩtie ciongo ciao, o acio maaregire gwĩtĩkia Jehova Ngai wao.
• 15. Ningĩ makĩrega kũrũmĩrĩra irĩra cia watho wake wa kũrũmĩrĩrũo, o na kĩrĩkanĩro gĩake kĩrĩa aarĩkanĩire na maithe mao, o na maũira make ma ũhoro ũrĩa aamoimbũrĩire, nao makĩrũmĩrĩra o maũndũ ma tũhũ, magĩtuĩka andũ matarĩ bata; na makĩrũmĩrĩra ndũrĩrĩ iria ciamaikarĩte na ndwere ciothe, o icio Jehova aamataarĩte ũhoro wacio mũno, atĩ matikaneke maũndũ ta marĩa ciĩkaga.
• 16. Nao magĩtigana na maathani mothe ma Jehova Ngai wao, magĩĩthondekera mĩhianano ya gũtwekio, nayo nĩyo njaũ igĩrĩ, o na magĩĩthondekera Ashera, na makĩinamĩrĩra mbũtũ yothe ya igũrũ mamĩhoe, na magĩtungatĩra Baali.
• 17. Ningĩ makĩhĩtũkithĩria ariũ ao o na airĩtu ao mwaki-inĩ, na makĩragũria, o na magĩtuĩria ũhoro wa nyoni ya mũndũ, nao magĩĩtwarĩrĩra ũhoro-inĩ wa gwĩka maũndũ marĩa monagwo marĩ moru nĩ Jehova, magĩkĩmũthirĩkia magĩtũma arakare.
• 18. Tondũ ũcio Jehova agĩkĩrakario mũno mũno nĩ Isiraeli, akĩmeheria ũthiũ-inĩ wake; na hatirĩ mũhĩrĩga o na ũmwe watigarire tiga o wa Juda wiki.
• 19. Ningĩ o nao andũ a Juda matiigana kũmenyerera maathani ma Jehova Ngai wao, no maarũmĩrĩire irĩra cia watho wa Isiraeli iria maathanĩte irũmagĩrĩrũo.
• 20. Nake Jehova akĩrega mbeũ yothe ya Isiraeli, akĩmĩnyaririthia, akĩmĩrekereria akĩmĩneana moko-inĩ ma atahani, o nginya hĩndĩ ĩrĩa aamĩingatire akĩmĩeheria ũthiũ-inĩ wake.
• 21. Nĩ ũndũ nĩaamũranirie Isiraeli na nyũmba ya Daudi, nao magĩtua Jeroboamu wa Nebati mũthamaki wao; nake Jeroboamu akĩhatĩrĩria Aisiraeli matige kũrũmĩrĩra Jehova, na agĩtũma mehie rĩĩhia inene.
• 22. Nacio ciana cia Isiraeli ikĩrũmĩrĩra mehia mothe ma Jeroboamu marĩa ehirie, na matiigana gũtigana namo,
• 23. o nginya hĩndĩ ĩrĩa Jehova eheririe Isiraeli ũthiũ-inĩ wake, o ta ũrĩa aaririe na tũnua twa ndungata ciake ciothe cia anabii. Tondũ ũcio Aisiraeli magĩgĩtahwo makĩrutwo bũrũri wao kĩũmbe, magĩtwarũo Ashuri, nao matũire kuo o na ũmũthĩ.
• 24. Nake mũthamaki wa Ashuri agĩtwarithia andũ amarutĩte Babuloni na Kutha, na Ava, na Hamathu, na Sefarivaimu, akĩmaigithia matũũra ma Samaria matũũre kuo ithenya rĩa ciana cia Isiraeli, nao makĩĩgwatĩra bũrũri wa Samaria ũgĩtuĩka wao, nao magĩtũũra matũũra-inĩ maguo.
• 25. Na gũgĩtuĩka atĩrĩ, atĩ o ihinda rĩrĩa maambĩrĩirie gũtũũra kuo, makĩaga gwĩtigĩra Jehova; na tondũ ũcio Jehova akĩmarekeria mĩrũthi, nayo ĩkĩũraga andũ amwe ao.
• 26. Tondũ ũcio andũ magĩkĩaria na mũthamaki wa Ashuri, makĩmwĩra atĩrĩ, Ndũrĩrĩ iria watwarithĩtie, ũgĩciiga matũũra ma Samaria-rĩ, itiũĩ watho wa Ngai wa bũrũri ũcio; na tondũ ũcio nĩareketie mĩrũthi thĩinĩ wao, na atĩrĩrĩ, nĩĩramoraga nĩ ũndũ matiũĩ watho wa Ngai wa bũrũri ũcio.
• 27. Hĩndĩ ĩo mũthamaki wa Ashuri agĩgĩathana, akiuga atĩrĩ, Oyai mũthĩnjĩri-Ngai ũmwe wa arĩa mwarutire kuo; mũreke athiĩ kuo na andũ ake magatũũre kuo, akamarute watho wa Ngai wa bũrũri ũcio.
• 28. Tondũ ũcio ũmwe wa athĩnjĩri-Ngai arĩa maatahĩte, mamarutĩte Samaria, agĩcoka kuo, agĩtũũra Beth-eli, nake akĩmaruta ũrĩa maagĩrĩirũo nĩ gwĩtigĩra Jehova.
• 29. No rĩrĩ, rũrĩrĩ o rũrĩrĩ nĩrũethondekeire ngai ciaruo kĩũmbe, rũgĩciĩkĩra nyũmba cia matĩri ma kũndũ gũtũũgĩru iria ciathondeketwo nĩ Asamaria, o rũrĩrĩ rũgĩciĩkĩra matũũra-inĩ maruo kũrĩa rũatũire.
• 30. Nao andũ a Babuloni magĩthondeka mũhianano wĩtagwo Sukothu-benothu; nao andũ a Kuthi magĩthondeka Nerigali; o nao andũ a Hamathu magĩthondeka Ashima;
• 31. nao Aavi magĩthondeka Nibihazu na Tarataka; nao Asefarivi magĩcinĩra Adarameleku na Anameleku, ngai cia Sefarivaimu, ciana ciao na mwaki.
• 32. Ũguo nĩguo gwatuĩkire atĩ magĩĩtigĩra Jehova, no ningĩ magĩĩthurĩra athĩnjĩri-Ngai moimĩte thĩinĩ wao o ene a kũruta wĩra matĩri-inĩ; nao nĩo maamarutagĩra igongona me nyũmba cia matĩri-inĩ macio.
• 33. Magĩgĩikara metigĩrĩte Jehova, o na ningĩ magatungatagĩra ngai ciao o ene o ta ũrĩa mũtugo wa ndũrĩrĩ cia kũndũ kũrĩa maathamĩtio watariĩ.
• 34. Nao andũ acio, o na ũmũthĩ, matũire mekaga o ta ũrĩa mĩtugo ĩo ya tene yatariĩ; matiĩtigagĩra Jehova na ma, o ma, kana mageka ta ũrĩa irĩra itariĩ iria ituĩtwo watho wa kũrũmĩrĩrũo, kana ta ũrĩa mĩtugo ya kũrũmĩrĩrũo nĩo ĩtariĩ, o kana ikarũmĩrĩra watho na maathani marĩa Jehova aathire ciana cia Jakubu, o we ũrĩa aatuire Isiraeli.
• 35. Nao andũ acio nĩo Jehova aarĩkanĩire kĩrĩkanĩro nao; akĩmataara, akĩmera atĩrĩ, Mũtikanetigĩre ngai ingĩ, kana mũciinamĩrĩre, o na kana mũcitungatĩre, kana mũcirutĩre magongona;
• 36. no rĩrĩ, Jehova, ũrĩa wamũrutire bũrũri wa Misiri na ũndũ wa hinya mũnene, o na guoko gũtambũrũkĩtio, nĩwe mũrĩĩtigagĩra, na nĩwe mũrĩinamagĩrĩra, o na ningĩ nĩwe mũrĩrutagĩra magongona manyu;
• 37. nacio irĩra iria atuĩte cia watho wa kũrũmĩrĩrũo, o na mĩtugo ya kũrũmĩrĩrũo, o na watho, o na maathani marĩa aamwandĩkĩire, maũndũ macio-rĩ, nĩmo mũrĩmenyagĩrĩra mũtũũre mũmekaga tene na tene; na mũtikanetigĩre ngai ingĩ;
• 38. o nakĩo kĩrĩkanĩro kĩrĩa ndĩkanĩire na inyuĩ mũtikanariganĩrũo nĩkĩo; o na kana mwĩtigĩre ngai ingĩ.
• 39. No rĩrĩ, Jehova Ngai wanyu, nĩwe mũrĩĩtigagĩra; na nĩwe ũkamũhonokia, amũrute moko-inĩ ma thũ cianyu ciothe.
• 40. No rĩrĩ, matiigana kũigua, tiga o kũrũmanĩria maarũmanĩirie gwĩka o ta ũrĩa maatũire mekaga tene.
• 41. Ũguo noguo gwatuĩkire atĩ ndũrĩrĩ icio igĩikara ciĩtigĩrĩte Jehova, no ningĩ igatungatagĩra mĩhianano yacio ya gwacũhio; nacio ciana ciacio, o na ciana cia ciana ciacio, igĩĩka o ta ũrĩa maithe ma cio mekaga; o na noguo itũire ciĩkaga o na ũmũthĩ.

Home