Go Back

2 Athamaki Chapter 15

• 1. Na rĩrĩ, mwaka wa mĩrongo ĩĩrĩ na mũgwanja ĩrĩa Jeroboamu mũthamaki wa Isiraeli aakorirũo athamakĩte, nĩguo Azaria, mũrũ wa Amazia mũthamaki wa Juda, aambĩrĩirie gũthamaka.
• 2. Nake aarĩ wa mĩaka ikũmi na ĩtandatũ rĩrĩa aambĩrĩirie gũthamaka; agĩgĩthamaka mĩaka mĩrongo ĩtano na ĩĩrĩ kũu Jerusalemu; nake nyina etagwo Jekolia, wa kũu Jerusalemu.
• 3. Nake agĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe maatariĩ marĩa ithe, Amazia, ekĩte.
• 4. No rĩrĩ, matĩri ma kũndũ gũtũũgĩru matiigana kweherio; andũ no maatũire marutagĩra magongona kuo, o na magacinagĩra ũbumba matĩri-inĩ macio.
• 5. Nake Jehova akĩrehithĩirie mũthamaki ũcio ũũru, agĩkĩrũara mangũ o nginya hĩndĩ ĩrĩa aakuire, nake agĩtũũra nyũmba ĩrĩ iiki handũ mwanya. Nake Jothamu, mũrũ wa mũthamaki ũcio, agĩtuĩka mũrori wa maũndũ mothe ma nyũmba yao, agagĩciragĩra andũ a bũrũri ũcio.
• 6. Na rĩrĩ, ciĩko iria ingĩ cia Amazia, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 7. Nake Azaria agĩgĩkoma hamwe na maithe; nao makĩmũthika hamwe na maithe itũũra rĩa Daudi; nake Jothamu, mũrũwe, agĩthamaka ithenya rĩake.
• 8. Na rĩrĩ, mwaka wa mĩrongo ĩtatũ na ĩnana ĩrĩa Azaria, mũthamaki wa Juda, aakorirũo athamakĩte, nĩguo Zekaria, mũrũ wa Jeroboamu, aathamakĩire Isiraeli mĩeri ĩtandatũ o kũu Samaria.
• 9. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa maithe make mekaga; nake ndaigana gũtigana na mehia ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo.
• 10. Nake Shalumu wa Jabeshi akĩgĩa ndundu nĩguo amũũkĩrĩre, nake akĩmũgũthĩra o mbere ya andũ, akĩmũũraga, agĩcoka agĩthamaka ithenya rĩake.
• 11. Na rĩrĩ, ciĩko iria ingĩ cia Zekaria-rĩ, nĩciandĩkĩtwo ibuku-inĩ rĩa maũndũ ma ihinda rĩa athamaki a Isiraeli.
• 12. Hĩndĩ ĩo uuge wa Jehova ũgĩkĩhinga ũrĩa aarĩirie Jehu, akĩmwĩra atĩrĩ, Ciana ciaku nĩigaikarĩra gĩtĩ gĩa ũthamaki gĩa Isiraeli o nginya rũciaro rũa kana. Naguo ũguo noguo gwatuĩkire.
• 13. Na rĩrĩ, Shalumu, mũrũ wa Jabeshi, aambĩrĩirie gũthamaka mwaka wa mĩrongo ĩtatũ na kenda ĩrĩa Ũzia, mũthamaki wa Juda, aakorirũo athamakĩte; agĩgĩthamaka ihinda rĩa mweri ũmwe kũu Samaria.
• 14. Thutha o ro ũcio Menahemu wa Gadi akĩambata oimĩte Tiriza agĩkinya Samaria, nake akĩhũrĩra Shalumu ũcio wa Jabeshi o kũu Samaria, akĩmũũraga, nake agĩthamaka ithenya rĩake.
• 15. Na atĩrĩrĩ, ciĩko iria ingĩ cia Shalumu, o na ndundu ĩrĩa aagĩire ya gũũkanĩrĩra-rĩ, maũndũ macio nĩmaandĩkĩtwo ibuku-inĩ rĩa maũndũ ma ihinda rĩa athamaki a Isiraeli.
• 16. Hĩndĩ ĩo Menahemu akĩhũra itũũra rĩetagwo Tifisa, o na andũ othe arĩa maarĩ kuo, o na hari-inĩ ciarĩo kuuma Tiriza; ekire ũguo nĩ ũndũ andũ akuo nĩmaaregire kũmũhingũrĩra; kĩu nĩkĩo gĩtũmi kĩa arĩhũre; o nao andũ-a-nja othe arĩa maarĩ na mahu kuo akĩmatathũra nda.
• 17. Na rĩrĩ, mwaka wa mĩrongo itatũ na kenda ĩrĩa Amazia, mũthamaki wa Juda, aakorirũo athamakĩte-rĩ, nĩguo Menahemu, mũrũ wa Gadi, aambĩrĩirie gũthamakĩra Isiraeli, agĩgĩthamaka mĩaka ikũmi o kũu Samaria.
• 18. Agĩgĩĩka maũndũ marĩa monagwo marĩ moru nĩ Jehova; namo matukũ make mothe ndaigana gũtigana na mehia ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo.
• 19. Na rĩrĩ, hĩndĩ ĩo mũthamaki wa Ashuri wetagwo Puli agĩũka gũtharĩka bũrũri ũcio; nake Menahemu akĩhe Puli ũcio taranda ngiri ĩmwe cia betha nĩ getha amũteithie atũme ũthamaki wake ũikare ũrũmĩte wega wĩ moko-inĩ make.
• 20. Nake Menahemu agĩĩtia ciringi icio kũrĩ Aisiraeli, o arĩa othe maarĩ anene itonga, mũndũ o mũndũ cekeri mĩrongo ĩtano cia betha, nĩ getha iheo mũthamaki wa Ashuri. Tondũ ũcio mũthamaki ũcio wa Ashuri agĩkĩhũndũka, na ndaigana gũikara kũu bũrũri ũcio.
• 21. Na rĩrĩ, ciĩko iria ingĩ cia Menahemu, o na maũndũ mothe marĩa ekire, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
• 22. Nake Menahemu agĩkoma hamwe na maithe, nake Pekaia, mũrũwe, agĩthamaka ithenya rĩake.
• 23. Na rĩrĩ, mwaka wa mĩrongo ĩtano ĩrĩa Azaria, mũthamaki wa Juda, aakorirũo athamakĩte, nĩguo Pekaia, mũrũ wa Menahemu, aambĩrĩirie gũthamakĩra Isiraeli o kũu Samaria, agĩthamaka mĩaka ĩĩrĩ.
• 24. Agĩgĩĩka maũndũ marĩa monagwo marĩ moru nĩ Jehova; na ndaigana gũtigana na mehia ma Jeroboamu wa Nebati, marĩa aatũmire Aisiraeli o nao mehie nĩ ũndũ wamo.
• 25. Nake Peka wa Remalia, mũnene wake wa mbũtũ cia ita, akĩgĩa ndundu ya kũmũũkĩrĩra, nake akĩmahũranĩria hamwe na Arigobu na Arie, kũu Samaria, mũthiringo-inĩ wa nyũmba ya mũthamaki, nake aakorirũo e na andũ mĩrongo ĩtano Agileadi; agĩkĩmũũraga, nake agĩthamaka ithenya rĩake.
• 26. Na atĩrĩrĩ, ciĩko iria ingĩ cia Pekaia, o na maũndũ mothe marĩa ekire-rĩ, nĩmaandĩkĩtwo ibuku-inĩ rĩa maũndũ ma ihinda rĩa athamaki a Isiraeli.
• 27. Na rĩrĩ, mwaka wa mĩrongo ĩtano na ĩĩrĩ ĩrĩa Azaria, mũthamaki wa Juda, aakorirũo athamakĩte, nĩguo Peka, mũrũ wa Remaiia, aambĩrĩirie gũthamakĩra Isiraeli kũu Samaria, agĩthamaka mĩaka mĩrongo ĩĩrĩ.
• 28. Nake agĩĩka maũndũ marĩa monagwo marĩ moru nĩ Jehova; na ndaigana gũtigana na mehia ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo.
• 29. Na rĩrĩ, matukũ macio ma Peka, mũthamaki wa Isiraeli, nĩguo Tigilathu-pileseru, mũthamaki wa Ashuri, aathiire gũtunyana matũũra ma Ijoni, na Abeli-bethi-maaka, na Janoa, na Kedeshi, na Hazoru, na ng’ongo cia Gileadi, na Galili, naguo ũguo nĩ ta kuuga bũrũri wothe wa Nafitali, agĩkĩgwata andũ akuo mĩgwate, akĩmatwara Ashuri.
• 30. Nake Hoshea wa Ela akĩgĩa ndundu ya gũũkĩrĩra Peka ũcio wa Remalia, akĩmũhũra akĩmũũraga; agĩgĩthamaka ithenya rĩake o mwaka wa mĩrongo ĩĩrĩ ĩrĩa Jothamu, mũrũ wa Uzia, aakorirũo athamakĩte.
• 31. Na atĩrĩrĩ, ciĩko iria ingĩ cia Peka, o na maũndũ mothe marĩa ekire-rĩ, nĩmaandĩkĩtwo ibuku-inĩ rĩa maũndũ ma ihinda rĩa athamaki a Isiraeli.
• 32. Na rĩrĩ, mwaka wa ĩĩrĩ ĩrĩa Peka, mũrũ wa Remalia mũthamaki wa Isiraeli, aakorirũo athamakĩte, nĩguo Jothamu, mũrũ wa Uzia mũthamaki wa Juda, aambĩrĩirie gũthamaka.
• 33. Nake aarĩ wa mĩaka mĩrongo ĩĩrĩ na ĩtano hĩndĩ ĩrĩa aambĩrĩirie gũthamaka agĩthamaka; mĩaka ikũmi na ĩtandatũ kũu Jerusalemu; nake nyina etagwo Jerusha, mwarĩ wa Zadoku.
• 34. Nake agĩgĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe marĩa ithe Uzia ekaga maatariĩ.
• 35. No rĩrĩ, matĩri ma kũndũ gũtũũgĩru matiigana kweherio; andũ no maatũire marutagĩra igongona kuo, o na magacinĩra ũbumba matĩri-inĩ macio. Ũcio nĩwe waakire kĩhingo kĩa rũgongo igũrũ kĩa nyũmba ya Jehova.
• 36. Na rĩrĩ, ciĩko iria ingĩ cia Jothamu, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 37. Na rĩrĩ, matukũ-inĩ macio, Jehova akĩgwata kũrekia Rezini, mũthamaki wa Suriata, o na Peka, mũrũ wa Remalia, mokĩrĩre Juda.
• 38. Nake Jothamu agĩkoma hamwe na maithe, agĩthikwo hamwe na maithe o kũu itũũra rĩa ithe, Daudi; nake Ahazu, mũrũwe, agĩthamaka ithenya rĩake.

Home