Go Back

2 Athamaki Chapter 11

• 1. Na rĩrĩ, Athalia, nyina wa Ahazia, ona atĩ mũrũwe e gũkua, akĩnina mbeũ yothe ya nyũmba ya mũthamaki.
• 2. No rĩrĩ, Jehosheba, mwarĩ wa mũthamaki Joramu, mwarĩ wa nyina na Ahazia, akĩoya Joashu, mũrũ wa Ahazia, agĩthiĩ nake na hitho, akĩmũruta thĩinĩ wa ariũ a mũthamaki acio moragagwo, me hamwe na mũmũreri, akĩmaiga kanyũmba ga toro; magĩkĩmũhitha Athalia, na tondũ ũcio Joashu ndaigana kũũragwo.
• 3. Nake agĩtũũra ahithĩtwo nĩwe nyũmba ya Jehova mĩaka ĩtandatũ; narĩo ihinda rĩu Athalia nĩwe wathamakaga bũrũri ũcio.
• 4. Na rĩrĩ, mwaka wa mũgwanja, Jehoiada akĩrekania, akĩgĩrithia anene arĩa maathaga athigari igana igana thĩinĩ wa andũ arĩa metagwo Akari, o na thĩinĩ wa arangĩri a mũthamaki, akĩmarehithie harĩ we o kũu nyũmba ya Jehova thĩinĩ; nake akĩrĩkanĩra kĩrĩkanĩro nao, o na akĩmehĩtithĩria mwĩhĩtwa o kũu nyũmba ya Jehova thĩinĩ, agĩcoka akĩmonia mũrũ wa mũthamaki.
• 5. Nake Jehoiada akĩmaatha, akĩmera atĩrĩ, Ũndũ ũrĩa mũgeka nĩguo ũyũ atĩrĩ, atĩ gĩcunjĩ gĩa gatatũ kĩanyu kĩa arĩa magoka wĩra-inĩ mũthenya wa thabatũ, gĩkarangĩra nyũmba ya mũthamaki;
• 6. o nao andũ arĩa angĩ gĩcunjĩ gĩa gatatũ maikare kĩhingo-inĩ kĩrĩa gĩĩtagwo Suri; o nao andũ arĩa angĩ gĩcunjĩ gĩa gatatũ maikare kĩhingo-inĩ kĩrĩa kĩĩ na thutha wa arangĩri acio; ũguo nĩguo mũkarangĩra nyũmba ĩo mũriĩre andũ.
• 7. Nacio mbũtũ iria igĩrĩ cianyu, o andũ arĩa makoima wĩra-inĩ mũthenya ũcio wa thabatũ, nĩo makarangĩra nyũmba ya Jehova marangĩre mũthamaki ũyũ witũ.
• 8. Nĩ gũthiũrũrũkĩria mũgathiũrũrũkĩria mũthamaki ũyũ witũ na mĩena yothe, o mũndũ anyitĩte indo ciake cia mbaara na guoko; na mũndũ ũngĩ o na ũrĩkũ angĩgatonya mĩhari-inĩ ĩo thĩinĩ, oragwo; ningĩ mũgaikara hamwe na mũthamaki akiuma nja, o na agĩcoka nyũmba.
• 9. Nao anene acio maathaga athigari igana magĩĩka o ta ũrĩa maũndũ mothe maatariĩ marĩa Jehoiada mũthĩnjĩri-Ngai aamaathire nao mũndũ o mũndũ akĩoya andũ ake, arĩa maarĩ a kwambĩrĩria wĩra wao kũu mũthenya ũcio wa thabatũ, hamwe na arĩa maarĩ a kũinũka mũthenya ũcio wa thabatũ, nao magĩthiĩ magĩkinya he Jehoiada mũthĩnjĩri-Ngai.
• 10. Nake mũthĩnjĩri-Ngai akĩrutĩra anene arĩa maathaga athigari igana matimũ na ngo iria ciarĩ cia mũthamaki Daudi, o iria ciaigĩtwo kũu nyũmba ya Jehova.
• 11. Nao arangĩri acio makĩrũgama, o mũndũ anyitĩte indo ciake cia mbaara na guoko, kuuma o mwena wa ũrĩo wa nyũmba ĩo, o nginya mwena wa ũmotho wayo, megiritanĩtie na kĩgongona, o na nyũmba ĩo, o na marĩ hakuhĩ na mũthamaki mamũrigicĩirie.
• 12. Hĩndĩ ĩo agĩkĩruta mũrũ wa mũthamaki, akĩmũigĩrĩra tanji mũtwe, na akĩmũnengera ibuku rĩa ũira; nao makĩmũitĩrĩria maguta, makĩmũtua mũthamaki; makĩmũhũrahũrĩra hĩ, makiugaga atĩrĩ, Ngai arotũũria mũthamaki witũ!
• 13. Na rĩrĩ, Athalia aaigua inegene rĩu rĩa arangĩri, o na rĩa andũ arĩa maarĩ ho, agĩtonya harĩ andũ acio o kũu nyũmba ya Jehova thĩinĩ;
• 14. agĩgĩcũthĩrĩria, akĩona atĩ mũthamaki nĩ kũrũgama arũgamĩte handũ hatũũgĩru igũrũ o ta ũrĩa mũtugo wa hĩndĩ ĩo watariĩ, nao anene a athigari, o na ahuhi macoro magakuhĩhĩria mũthamaki; nao andũ othe a bũrũri ũcio magakena, makĩhuhaga macoro. Hĩndĩ ĩo Athalia agĩgĩtembũranga nguo ciake, akĩanĩrĩra na mũgambo mũnene, akiuga ũũ: Ĩno nĩ ndundu ya njũkanĩrĩro. Hĩ! Nĩ ndundu ya njũkanĩrĩro.
• 15. Nake Jehoiada mũthĩnjĩri-Ngai agĩatha anene a athigari igana igana arĩa maaigĩtwo marorage mbũtũ cia ita, akĩmera atĩrĩ, Nĩagerio gatagatĩ ka mĩhari ya andũ, oimio nja, nake mũndũ ũrĩa ũkũmũrũmĩrĩra nĩoragwo na rũhiũ rũa njora; nĩ ũndũ mũthĩnjĩri-Ngai oigire atĩrĩ, Menyai mũmũũragĩre gũkũ nyũmba ya Jehova.
• 16. Tondũ ũcio magĩkĩmweherera; nake akĩgera njĩra ĩrĩa yageragwo nĩ mbarathi igĩthiĩ nyũmba ya mũthamaki; nakuo kũu nĩkuo oragĩirũo.
• 17. Nake Jehoiada agĩgĩtũma harĩkanĩrũo kĩrĩkanĩro gĩkoniĩ Jehova, o na mũthamaki, o na andũ, gĩa atĩ nĩmegũtuĩka andũ a Jehova; o na ningĩ agĩtũma hagĩe kĩrĩkanĩro gĩa atĩ mũthamaki na andũ ake maiguane.
• 18. Nao andũ othe a bũrũri ũcio magĩgĩthiĩ nyũmba ya Baali, makĩmĩtharia; nacio igongona ciayo, o na mĩhianano yayo, icio ciothe magĩciunanga tũcunjĩ, igĩthira biũ; o nake Matani, mũthĩnjĩri-Baali, makĩmũũragĩra o hau mbere ya igongona icio. Nake mũthĩnjĩri-Ngai agĩcoka agĩtua andũ amwe anene matuĩke arori a nyũmba ya Jehova.
• 19. Nake akĩoya andũ arĩa maathaga athigari igana igana, o na andũ arĩa metagwo Akari, o na arangĩri a nyũmba ya mũthamaki, o na andũ othe a bũrũri ũcio; nao magĩikũrũkia mũthamaki mamũrutĩte nyũmba ya Jehova, magerete njĩra ya kĩhingo kĩa arangĩri a nyũmba ya mũthamaki, magĩgĩkinya o nyũmba ya mũthamaki. Nake agĩgĩikarĩra gĩtĩ kĩa ũnene gĩa ũthamaki.
• 20. Na tondũ ũcio andũ othe a bũrũri ũcio magĩkena, narĩo itũũra rĩu rĩgĩikara rĩtarĩ ngũĩ; nao makĩũragĩra Athalia na rũhiũ rũa njora o hau hakuhĩ na nyũmba ya mũthamaki.
• 21. Nake Jehoashu aarĩ wa mĩaka mũgwanja hĩndĩ ĩrĩa aambĩrĩirie gũthamaka.

Home