Go Back

1 Athamaki Chapter 19

• 1. Nake Ahabu agĩkĩhe Jezebeli ũhoro wa maũndũ macio mothe Elija ekĩte, na wa ũrĩa oragithirie anabii othe na rũhiũ rũa njora.
• 2. Hĩndĩ ĩo Jezebeli agĩkĩrekeria Elija mũndũ, akiuga atĩrĩ, Ngai ciakwa iro’thũũra, o na ikĩrĩrĩrie gũ’thũũra, ingĩkaaga gũtũma muoyo waku ũtuĩke o ta muoyo wa mũndũ o wothe wa acio rũciũ, ihinda o ta rĩrĩ.
• 3. Nake Elija ona ũguo agĩũkĩra, agĩĩthiĩra athare muoyo wake, agĩgĩthiĩ agĩkinya Biri-shiba, itũũra rĩa Juda, agĩtiga ndungata yake kuo.
• 4. No rĩrĩ, we mwene agĩthiĩ rũgendo rũa mũthenya mũgima arorete werũ-inĩ, agĩikara thĩ; gĩtina-inĩ kĩa mwethia; nake akĩĩhoera atĩ akue, agĩkiuga atĩrĩ, Rĩu nĩnjiganĩtie; wee Jehova, nduta muoyo, nĩ ũndũ ti niĩ mwega gũkĩra aa baba.
• 5. Agĩgĩkoma thĩ toro hau mwethia-inĩ. Gũgĩtuĩka atĩrĩ, atĩ akĩhutio nĩ mũraika, akĩĩrũo ũũ: Arahũka ũrĩe irio.
• 6. Nake agĩgĩcũthĩrĩria, na atĩrĩrĩ, mũtwe-inĩ wake hagĩkorũo he mũgate ũhihĩirio makara igũrũ, o na mbũthũ ya maĩ. Nake agĩkĩrĩa o na akĩnyua; agĩcoka agĩkoma o rĩngĩ.
• 7. Ningĩ mũraika wa Jehova agĩthiĩ harĩ we rĩngĩ, hĩndĩ ya kerĩ; akĩmũhutia, akiuga atĩrĩ, Arahũka ũrĩe irio; nĩ gũkorũo rũgendo rũrĩa ũgũthiĩ nĩrũgũkũnenehera mũno.
• 8. Agĩkĩarahũka, akĩrĩa, o na akĩnyua; nake agĩgĩthiĩ na hinya wa irio icio aarĩire matukũ mĩrongo ĩna, mũthenya na ũtukũ, agĩgĩkinya kĩrĩma-inĩ kĩa Ngai kĩrĩa gĩĩtagwo Horebu.
• 9. Nakuo kũu agĩtonya ngurunga-inĩ, akĩraara kuo. Na atĩrĩrĩ, kiugo kĩa Jehova gĩkĩmũkinyĩrĩra, akĩũrio atĩrĩ, Ũreka atĩa gũkũ, Elija?
• 10. Nake agĩkiuga atĩrĩ, Nĩ ũiru ndũire ndĩ naguo mũno nĩ ũndũ wa Jehova, Ngai Mũnene wa Ita; nĩ gũkorũo ciana cia Isiraeli nĩitigĩte kũrũmĩrĩra kĩrĩkanĩro gĩaku, ikagũithia igongona ciaku thĩ, na ikoraga anabii aku na hiũ cia njora; na niĩ, o niĩ nyiki, no niĩ ndigarĩte; na no iracaria muoyo wakwa, iũrute.
• 11. Nake akiuga atĩrĩ, Ta uma ũkarũgame kĩrĩma igũrũ, mbere ya Jehova. Na atĩrĩrĩ, Jehova akĩhĩtũkĩra hakuhĩ na hau, naruo rũhuho rũĩ na hinya mũno rũgĩatũranga irĩma, o na rũkĩhũranga ndwaro cia mahiga rũgĩcienyũranga cienyũ mbere ya Jehova; no rĩrĩ, Jehova ndaarĩ rũhuho-inĩ rũu; na thutha wa rũhuho rũu gũkĩgĩa gĩthingithia gĩa thĩ; no rĩrĩ, Jehova ndaarĩ gĩthingithia-inĩ kĩu;
• 12. na thutha wa gĩthingithia kĩu gũkĩoneka mwaki; no rĩrĩ, Jehova ndaarĩ mwaki-inĩ ũcio; na thutha wa mwaki ũcio hakĩgĩa kamũgambo gaceke kahoreru.
• 13. Na gũgĩtuĩka atĩrĩ, atĩ hĩndĩ ĩrĩa Elija aakaiguire, akĩĩhumba ũthiũ na nguo yake ya igũrũ, akiuma hau aarĩ, akĩrũgama itonyero-inĩ rĩa ngurunga. Na atĩrĩrĩ, agĩgĩkinyĩrĩrũo nĩ mũgambo ũkĩmũũria atĩrĩ, Ũreka atĩa haha, Elija?
• 14. Nake akiuga atĩrĩ, Nĩ ũiru ndũire ndĩ naguo mũno nĩ ũndũ wa Jehova, Ngai Mũnene wa Ita; nĩ gũkorũo ciana cia Isiraeli nĩitigĩte kũrũmĩrĩra kĩrĩkanĩro gĩaku, ikagũithia igongona ciaku thĩ, na ikoraga anabii aku na hiũ cia njora; na niĩ, o niĩ nyiki, no niĩ ndigarĩte; na no iracaria muoyo wakwa iũrute.
• 15. Nake Jehova akĩmwĩra atĩrĩ, Thiĩ ũcoke na njĩra ĩrĩa ũroimire nayo, ũkinye werũ wa Dameski; na wakinya kuo, ũitĩrĩrie Hazaeli maguta, atuĩke mũthamaki wa gũthamaka Suriata;
• 16. nake Jehu wa Nimshi ũmũitĩrĩrie maguta, atuĩke mũthamaki wa gũthamakĩra Isiraeli; o nake Elisha wa Shafatu, wa kũu Abeli-mehola, ũmũitĩrĩrie maguta nĩguo agatuĩka mũnabii ithenya rĩaku.
• 17. Na nĩgũgakinya atĩrĩ, atĩ mũndũ ũrĩa ũkahonoka kũũragwo na rũhiũ rũa Hazaeli, oragwo nĩ Jehu; nake ũrĩa ũkahonoka kũũragwo na rũhiũ rũa Jehu, oragwo nĩ Elisha.
• 18. No rĩrĩ, nĩngwĩtigĩria andũ ngiri mũgwanja thĩinĩ wa Isiraeli, nao othe nĩ arĩa matarĩ maaturĩria Baali maru, o natuo tũnua twao tuothe tũtirĩ twamũmumunya.
• 19. Tondũ ũcio agĩkiuma kũu, agĩthiĩ, agĩkora Elisha wa Shafatu agĩcimba na ndegwa ciohanĩtio igĩrĩ igĩrĩ, moha ikũmi na merĩ, aciumĩte thutha, nake we mwene aarĩ hamwe na icio cia rĩoha rĩa ikũmi na merĩ; nake Elija akĩgera harĩ we, akĩmũikĩria nguo yake ya igũrũ.
• 20. Nake Elisha agĩgĩtiga ndegwa, akĩrũmĩrĩra Elija na ihenya, akĩmwĩra atĩrĩ, Ndagũthaitha ũreke ’thiĩ ngamumunye baba na maitũ, njoke ngũrũmĩrĩre. Nake Elija akĩmwĩra atĩrĩ, Coka; kaĩ ngũgirĩtie na kĩ?
• 21. Agĩkĩhũndũka, oimĩte kũmũrũmĩrĩra, akĩnyita ndegwa igĩrĩ ciohanĩtio na mũtĩ wa ngingo, agĩcithĩnja, akĩruga nyama ciacio na mĩtĩ ya mĩnyamũ ĩrĩa yarutagwo wĩra nayo, akĩhe andũ arĩa maarĩ nake, nao makĩrĩa. Thutha wa ũguo agĩũkĩra, akĩrũmĩrĩra Elija, akĩmũtungatĩra.

Home