Go Back

1 Athamaki Chapter 17

• 1. Na rĩrĩ, Elija Mũtishibi, wa arĩa maatũũraga marĩ ageni Gileadi, agĩkĩĩra Ahabu atĩrĩ, O ta ũrĩa Jehova, Ngai wa Isiraeli, atũũraga muoyo, o we ũrĩa niĩ ndũgamaga mbere yake-rĩ, gũticoka kũgĩa ireera, o na kana mbura, mĩaka ĩno, tiga o ta ũrĩa ngoiga.
• 2. Nakĩo kiugo kĩa Jehova gĩkĩmũkinyĩrĩra, akĩĩrũo atĩrĩ,
• 3. Ũkĩra wĩthiĩre, ũgarũrũke ũrorete mwena wa irathĩro, ũkehithe karũũĩ-inĩ ga Kerithu, karĩa ke mbere ya Jorodani.
• 4. Na nĩgũgatuĩka atĩrĩ, atĩ ũkanyuaga maĩ mako; na nĩnjathĩte mahuru makũrehagĩre irio ho.
• 5. Nake agĩgĩthiĩ, agĩĩka o ta ũguo uuge wa Jehova watariĩ; nĩ ũndũ nĩaathiire agĩtũũra karũũĩ-inĩ kau ga Kerithu, o kau karĩ mbere ya Jorodani.
• 6. Namo mahuru makamũtwaragĩra mũgate na nyama rũcinĩ, o na mũgate na nyama hwaĩ-inĩ, nake akanyuaga maĩ ma karũũĩ kau.
• 7. Na gũgĩkinya atĩrĩ, atĩ matukũ maathiathia, karũũĩ kau gakĩhũa, nĩ ũndũ gũtiarĩ mbura bũrũri ũcio.
• 8. Ningĩ kiugo kĩa Jehova gĩkĩmũkinyĩrĩra, akĩĩrũo atĩrĩ,
• 9. Ũkĩra ũthiĩ Zarefathu, itũũra rĩa Zidoni, ũgatũũre kuo; na atĩrĩrĩ, nĩnjathĩte mũtumia wa ndigwa wakuo akũheage irio.
• 10. Tondũ ũcio agĩgĩũkĩra agĩthiĩ Zarefathu; na aakinya mũrango-inĩ wa kĩhingo gĩa itũũra, akĩona mũtumia wa ndigwa akĩũngania tũkũ, akĩmwĩta, akĩmwĩra atĩrĩ, Ndagũthaitha ndehere tũũĩ na kaihũri ’nyue.
• 11. Na rĩrĩa aathiaga gũtũgĩra, akĩmwĩta, akĩmwĩra atĩrĩ, Ndagũthaitha ũndehanĩrie na kenyũ ka mũgate.
• 12. Nake agĩkiuga atĩrĩ, O ta ũrĩa Jehova Ngai waku atũũraga muoyo-rĩ, ndirĩ na kamũgate tiga o kamũtu ka rũhĩ rũmwe ke ndigithũ-inĩ, o na tũguta tũnini twĩ cuba-inĩ; na atĩrĩrĩ, rĩu ndĩrongania tũkũ nĩguo ’thiĩ ngagathondeke ndĩkaruge nĩ ũndũ wakwa niĩ mwene, o na mũrũ wakwa, nĩguo tũkarĩe tũcoke tũkue.
• 13. Nake Elija agĩkĩmwĩra atĩrĩ, Tiga gwĩtigĩra, thiĩ wĩke o ta ũguo woiga; no rĩrĩ, amba ũ’thondekere kamũgate kanini kaguo, ũndehere, na thutha wa ũguo wĩthondekere wee mwene mwĩ na mũrũguo.
• 14. Nĩ gũkorũo Jehova, Ngai wa Isiraeli, oigĩte ũũ: Ndigithũ ĩo ya mũtu ndĩninũka, o na kana cuba ũcio wa maguta ũninũke, tiga o mũthenya ũrĩa Jehova akoiria mbura gũkũ thĩ.
• 15. Nake agĩgĩthiĩ, agĩĩka o ta ũguo Elija oigĩte gwĩkwo; nake mũtumia ũcio, o na Elija, o na andũ othe a nyũmba yake, makĩrĩa kandũ kau matukũ maingĩ.
• 16. Nayo ndigithũ ĩo ndĩigana gũthira mũtu, o na kana cuba ũgĩthira maguta, o ta ũrĩa uuge wa Jehova watariĩ ũrĩa aaririe na kanua ka Elija.
• 17. Na gũgĩkinya atĩrĩ, atĩ thutha wa maũndũ macio, mũrũ wa mũtumia ũcio mwene nyũmba ĩo akĩrũara; naguo mũrimũ ũkĩmwĩhĩra mũno o nginya akĩaga gũcoka kũhihia.
• 18. Nake mũtumia ũcio agĩkĩĩra Elija atĩrĩ, Ndĩ na ũhoro ũrĩkũ nawe, wee mũndũ wa Ngai? Anga wokire gũkũ gwakwa ũtũme mehia makwa maririkanwo, ũnjũragĩre mũrũ wakwa!
• 19. Nake agĩkĩmwĩra atĩrĩ, Ta ’nengera mũrũguo. Nake agĩkĩmuoya, akĩmũruta gĩthũri-inĩ gĩake, akĩhaica kanyũmba ka igũrũ karĩa aaikaraga amũkuuĩte, akĩmũkomia ũrĩrĩ wake we mwene.
• 20. Agĩgĩkaĩra Jehova, akiuga atĩrĩ, Wee Jehova Ngai wakwa, kaĩ warehere mũtumia ũyũ wa ndigwa ndũũraga gwake ndĩ mũgeni ũũru, woraga mũrũwe?
• 21. Agĩgĩkomera mwana ũcio maita matatũ etambũrũkĩtie, agĩkaĩra Jehova, akiuga atĩrĩ, Wee Jehova Ngai wakwa, ndagũthaitha ũreke muoyo wa mwana ũyũ ũmũcokerere.
• 22. Nake Jehova agĩkĩigua ihoya rĩa Elija; naguo muoyo wa mwana ũcio ũkĩmũcokerera, akĩriũka.
• 23. Nake Elija agĩkĩoya mwana ũcio, akĩmũruta kanyũmba kau, akĩmũikũrũkia kũu nyũmba, akĩmũnengera nyina; nake Elija akiuga atĩrĩ, Ta rora, mũrũguo e muoyo.
• 24. Nake mũtumia ũcio agĩkĩĩra Elija atĩrĩ, Rĩu ndĩ kũmenya atĩ wĩ mũndũ wa Ngai, o na atĩ ũhoro wa Jehova ũrĩa ũkwario na kanua gaku nĩ wa ma.

Home