Go Back

1 Athamaki Chapter 13

• 1. Na atĩrĩrĩ, kũu Beth-eli gũgĩgĩũka mũndũ wa Ngai woimĩte Juda e na ndũmĩrĩri ya Jehova; nake Jeroboamu agĩkorũo arũgamĩte kĩgongona-inĩ, agacine ũbumba.
• 2. Nake mũndũ ũcio wa Ngai agĩkĩanĩrĩra na ũndũ wa ndũmĩrĩri ĩo ya Jehova, akĩaria ũhoro ũkoniĩ kĩgongona kĩu, akiuga ũũ: Atĩrĩrĩ, wee kĩgongona gĩkĩ, kĩgongona gĩkĩ, Jehova oigĩte ũũ: Kaana nĩgagaciarũo ka mbarĩ ya Daudi, nako gagetwo Josia; na igũrũ rĩaku nĩho gagathĩnjĩra athĩnjĩri-ngai a matĩri-inĩ ma kũndũ gũtũũgĩru, o arĩa macinagĩra ũbumba igũrũ rĩaku, kamarute igongona, namo mahĩndĩ ma andũ magacinĩrũo igũrũ rĩaku.
• 3. Na akĩonania kĩmenyithia mũthenya o ro ũcio, akiuga atĩrĩ, Gĩkĩ nĩkĩo kĩmenyithia kĩrĩa Jehova onanĩtie: Atĩrĩrĩ, kĩgongona gĩkĩ nĩgĩgwatũkanga, naguo mũhu ũrĩa wĩ igũrũ rĩakĩo ũitĩke thĩ.
• 4. Na gũgĩkinya atĩrĩ, atĩ Jeroboamu, mũthamaki, aaigua ũhoro ũrĩa mũndũ ũcio wa Ngai aarĩirie kĩgongona kĩu kĩarĩ o kũu Beth-eli na mũgambo mũnene-rĩ, agĩtambũrũkia guoko gwake, arũgamĩte kĩgongona-inĩ kĩu, akiugaga atĩrĩ, Mũnyitei. Nakuo guoko kũu gwake aamũtambũrũkĩirie gũkĩũma, akĩremwo nĩ gũcoka gũgũthuna.
• 5. O nakĩo kĩgongona kĩu gĩgĩatũkanga, naguo mũhu ũgĩitĩka thĩ uumĩte kĩgongona-inĩ kĩu, o ta ũrĩa kĩmenyithia gĩatariĩ kĩu kĩonanĩtio na ũhoro wa Jehova nĩ mũndũ ũcio wa Ngai.
• 6. Nake mũthamaki agĩcokia akĩĩra mũndũ ũcio wa Ngai atĩrĩ, Ta ’thaithĩra Jehova Ngai waku, njĩtĩkĩrĩke nĩwe, na ũ’hoere nĩguo guoko gwakwa kũnjokerere. Nake mũndũ ũcio wa Ngai agĩthaitha Jehova, nakuo guoko kwa mũthamaki gũkĩmũcokerera, gũgĩcoka gũtuĩka o ta ũrĩa gwatariĩ mbere ĩo.
• 7. Nake mũthamaki agĩkĩĩra mũndũ ũcio wa Ngai atĩrĩ, Ũka tũinũke mũciĩ, ũkanogoke, na nĩngũkũhe nduhi.
• 8. Nake mũndũ ũcio wa Ngai akĩĩra mũthamaki atĩrĩ, O na ũngĩkorũo nĩ nuthu ya indo iria irĩ mũciĩ waku ũkũ’he-rĩ, ndingĩtonyania nawe kuo, o na kana ndĩe irio, kana ’nyue maĩ kũndũ gũkũ;
• 9. nĩ gũkorũo ũguo nĩguo ndaathirũo na uuge wa Jehova, ngĩĩrũo atĩrĩ, Ndũkanarĩe irio kuo, o na kana ũnyue maĩ, o na kana ũcokere njĩra ĩrĩa wagereire.
• 10. Tondũ ũcio agĩkĩgera njĩra ĩngĩ, na ndaacokeire njĩra ĩrĩa aagereire agĩthiĩ Beth-eli.
• 11. Na rĩrĩ, kũu Beth-eli nĩgwatũũrĩte mũnabii mũthuri mũkũrũ; nake mũndũ ũmwe wa ariũ ake agĩthiĩ akĩmũhe ũhoro wa maũndũ macio mothe mekĩtwo nĩ mũndũ ũcio wa Ngai kũu Beth-eli mũthenya ũcio; o nacio ciugo iria oigire akĩaria na mũthamaki-rĩ, ariũ ake magĩcihe ithe wao.
• 12. Nake ithe wao agĩkĩmoria atĩrĩ, Agerire njĩra ĩrĩkũ? Nao ariũ acio ake magĩkorũo nĩmonete njĩra ĩrĩa mũndũ ũcio wa Ngai aagerete, o ũcio woimĩte Juda.
• 13. Nake agĩkĩĩra ariũ ake atĩrĩ, Ta ndandĩkĩrai ndigiri yakwa. Magĩkĩmũtandĩkĩra ndigiri yake, nake akĩmĩhaica.
• 14. Agĩkĩrũmĩrĩra mũndũ ũcio wa Ngai, akĩmũkora aikarĩte thĩ gĩtina-inĩ kĩa mũgandi, akĩmũũria atĩrĩ, Ĩ nĩwe mũndũ wa Ngai ũrĩa woimire Juda? Nake akiuga atĩrĩ, Ĩĩ, nĩ niĩ.
• 15. Agĩgĩcoka akĩmwĩra atĩrĩ, Ũka tũinũke mũciĩ, ũkarĩe irio
• 16. Nake akiuga atĩrĩ, Ndingĩhota gũcokania nawe, kana tũtonyanie nyũmba nawe; o na ningĩ-rĩ, ndingĩrĩanĩra irio nawe, kana ’nyue maĩ kũndũ gũkũ;
• 17. nĩ gũkorũo nĩnderirũo na ũndũ wa uuge wa Jehova ũũ: Ndũkanarĩe irio, kana ũnyue maĩ kũu, o na kana ũhũndũkĩre njĩra ĩrĩa wathiĩrĩire.
• 18. Nake agĩkĩmwĩra atĩrĩ, Niĩ o na niĩ ndĩ mũnabii o tawe; na nĩ mũraika waririe na niĩ na ũndũ wa uuge wa Jehova, aanjĩra atĩrĩ, Mũhũndũre, mũcokanie nake gwaku mũciĩ, nĩ getha arĩe irio, o na anyue maĩ. No nĩ kũmũhenia aamũhenagia.
• 19. Tondũ ũcio agĩcokania nake, na akĩrĩa irio gwake mũciĩ, o na akĩnyua maĩ.
• 20. Na gũgĩkinya atĩrĩ, atĩ o hĩndĩ ĩrĩa maaikarĩte metha-inĩ, ũhoro wa Jehova ũgĩkinya he mũnabii ũcio wamũhũndũrĩte;
• 21. agĩkĩarĩria hau na mũgambo mũnene, akĩĩra mũndũ ũcio wa Ngai woimĩte Juda ũũ: Jehova oiga atĩrĩ, Kuona atĩ nĩũregete ũhoro ũrĩa waheirũo na kanua ka Jehova, ũkaaga kũmenyerera watho ũrĩa Jehova Ngai waku aagwathire,
• 22. no nĩũhũndũkire, na warĩa irio o na wanyua maĩ kũndũ kũrĩa aakwĩrire ũũ: Ndũkanarĩe irio, na ndũkananyue maĩ-rĩ, kĩimba gĩaku gĩtigakinya mbĩrĩra-inĩ ya thoguo.
• 23. Na gũgĩkinya atĩrĩ, atĩ thutha wa aarĩkia kũrĩa irio, o na aarĩkia kũnyua, mũndũ ũcio wamũcoketie na thutha akĩmũtandĩkĩra ndigiri yake; naguo ũguo nĩ ta kuuga akĩmĩtandĩkĩra mũnabii ũcio aacoketie gwake mũciĩ.
• 24. Na aarĩkia kũgwata njĩra ainũke-rĩ, agĩtũngwo nĩ mũrũthi, ũgĩkĩmũũraga; nakĩo kĩimba gĩake gĩkĩgũa njĩra-inĩ, nayo ndigiri ĩkĩrũgama hakuhĩ nakĩo; o naguo mũrũthi ũcio ũkĩrũgama o hau hakuhĩ na kĩimba kĩu.
• 25. Naho hau hakĩhĩtũkĩra andũ, nao makĩona kĩimba kĩu kĩgũĩte njĩra-inĩ, naguo mũrũthi ũkarũgama hakuhĩ nakĩo; nao magĩgĩthiĩ makĩheana ũhoro ũcio itũũra-inĩ rĩrĩa mũnabii ũcio mũthuri mũkũrũ aatũire.
• 26. Na hĩndĩ ĩrĩa mũnabii ũrĩa wamũhũndũrire e njĩra-inĩ aaiguire ũhoro ũcio, akiuga atĩrĩ, Hĩ! Ũcio nĩ mũndũ ũrĩa wa Ngai waregire kũrũmia uuge ũrĩa waarĩtio na kanua ka Jehova; tondũ ũcio Jehova nĩamũrekereirie akamũneana he mũrũthi; naguo nĩũmũtarũrangĩte ũkamũũraga, o ta ũrĩa uuge wa Jehova ũrĩa aamwarĩirie watariĩ.
• 27. Nake agĩgĩatha ariũ ake, akĩmera atĩrĩ, Ta ndandĩkĩrai ndigiri yakwa. Nao magĩkĩmĩtandĩka.
• 28. Nake agĩthiĩ akĩona kĩimba kĩu kĩgũĩte njĩra-inĩ, nayo ndigiri o na mũrũthi ikarũgama hakuhĩ nakĩo; naguo mũrũthi ũgĩkorũo ndũrĩĩte kĩimba kĩu, o na kana ũgatarũranga ndigiri.
• 29. Nake mũnabii ũcio agĩkĩoya kĩimba kĩa mũndũ ũcio wa Ngai, agĩkĩigĩrĩra igũrũ rĩa ndigiri, akĩhũndũka nakĩo; mũnabii ũcio mũthuri agĩthiĩ agĩkinya itũũra rĩao, nĩ getha akamũrĩrĩre, o na amũthike.
• 30. Nake agĩkĩiga kĩimba kĩu mbĩrĩra-inĩ yake we mwene; nao makĩmũrĩrĩra, makiugaga atĩrĩ, Ĩiya mũrũ wa ithe witũ-ĩ!
• 31. Na gũgĩkinya atĩrĩ, atĩ aarĩkia kũmũthika, agĩcoka akĩaria na ariũ ake, akĩmera atĩrĩ, Hĩndĩ ĩrĩa ngakua-rĩ, nĩmũga’thika mbĩrĩra-inĩ ĩno twathika mũndũ ũcio wa Ngai, mũkaiga mahĩndĩ makwa mwena-inĩ wa mahĩndĩ make.
• 32. Nĩ ũndũ-rĩ, ciugo icio aaririe aanĩrĩire na mũgambo mũnene na ũndũ wa uuge wa Jehova ĩkoniĩ kĩgongona kĩu kĩĩ Beth-eli, o na nyũmba ciothe cia matĩri ma kũndũ gũtũũgĩru cia matũũra-inĩ ma Samaria-rĩ, itirĩ hingo itagakinya.
• 33. Na rĩrĩ, o na maũndũ macio maathira-rĩ, Jeroboamu ndaigana kũgarũrũka atigane na mĩthiĩre yake mĩũru; no nĩ kwamũra aacokire kwamũra andũ angĩ o ro ũguo matuĩke athĩnjĩri-Ngai a matĩri-inĩ macio ma kũndũ gũtũũgĩru; o mũndũ ũrĩa wothe wendete kwamũrĩrũo wĩra ũcio, akĩmwamũra aũrutage, nĩguo atĩ kũgĩe athĩnjĩri-Ngai a matĩri macio ma kũndũ gũtũũgĩru.
• 34. Naguo ũndũ ũcio ũgĩtuĩka wĩhia harĩ nyũmba ya Jeroboamu, ũgĩgĩtũma ĩthengio biũ, ininwo o kũninwo, yehere gũkũ thĩ guothe.

Home