Go Back

1 Athamaki Chapter 12

• 1. Nake Rehoboamu agĩgĩthiĩ Shekemu; nĩ gũkorũo Aisiraeli othe nĩmaathiĩte kũu Shekemu makamũtue mũthamaki.
• 2. Na gũgĩkinya atĩrĩ, atĩ hĩndĩ ĩrĩa Jeroboamu wa Nebati aaiguire ũhoro ũcio, (tondũ aakorirũo arĩ o Misiri kũu orĩire eherere Suleimani, mũthamaki; Jeroboamu aagĩtũire o kũu Misiri,
• 3. nao andũ makĩrekania agetwo;) Jeroboamu na kĩrĩndĩ gĩothe gĩa Isiraeli magĩgĩthiĩ makĩarĩria Rehoboamu makĩmwĩra ũũ:
• 4. Atĩrĩrĩ, watho ũrĩa thoguo aratwathaga nĩũratũritũhĩire mũno; na tondũ ũcio tũhũthahũthĩrie wĩra ũcio ũrarĩ hinya wa thoguo, o na ũhoro ũcio wake ũratariĩ ta mũtĩ wa ngingo mũritũ aatwĩkĩrĩte, na nĩtũrĩgũtungatagĩra.
• 5. Nake agĩkĩmera atĩrĩ, Thiĩi-ĩ, mwanina mĩthenya ĩtatũ mũcoke mũũke kũrĩ niĩ. Nao andũ acio magĩgĩĩthiĩra.
• 6. Nake Rehoboamu, mũthamaki, agĩgĩcira na athuri arĩa maarĩaga kĩrĩra na ithe, Suleimani, ihinda rĩrĩa aarĩ muoyo, akĩmoria atĩrĩ, Nĩ kĩrĩra kĩrĩkũ mũkũ’he nĩguo njokerie andũ acio ũhoru?
• 7. Nao magĩkĩmwarĩria, makĩmwĩra atĩrĩ, Ũngĩĩtĩkĩra gwĩtua ta ũrĩ ndungata ya andũ acio ũmũthĩ, na ũmatungatĩre, na ũmacokerie ũhoro wega ũrĩa mangĩkũũria, na ũmaarĩrie ndeto njega, nĩmegũtuĩka ndungata ciaku tene na tene.
• 8. No nĩaatigire kĩrĩra gĩa athuri acio kĩrĩa maamũheete, agĩcira na aanake arĩa maarĩ a riika rĩake, o arĩa maathiaga thiritũ nake,
• 9. agĩkĩmoria atĩrĩ, Ha ũhoro wa andũ acio maarĩtie na niĩ, makanjĩra ũũ: Tũhũthahũthĩrie wĩra ũcio mũritũ ũratariĩ ta mũtĩ wa ngingo thoguo aatwĩkĩrĩte-rĩ, inyuĩ nĩ kĩrĩra kĩrĩkũ mũkũ’he nĩguo ndĩmacokerie ũhoro?
• 10. Nao aanake acio a riika rĩake makĩaria nake, makĩmwĩra atĩrĩ, Andũ acio maakwarĩirie, makiuga ũũ: Watho ũrĩa thoguo aratwathaga nĩũratũritũhĩire mũno ta arĩ mũtĩ wa ngingo mũritũ, no wee tũhũthahũthĩrie-rĩ, aria nao ũmere atĩrĩ, Kĩara gĩakwa kĩa mũira nĩ gĩtungu gũkĩra kĩero kĩa baba.
• 11. Na rĩrĩ, kuona atĩ baba aramwĩkĩrĩte mũtĩ wa ngingo mũritũ-rĩ, niĩ nĩ kũritũhia ngũmũritũhĩria mũtĩ ũcio wa ngingo; baba aramũhũraga na iboko, no niĩ ndĩrĩmũrũmithia ing’aurũ.
• 12. Nake Jeroboamu, na andũ acio othe, magĩgĩcoka he Rehoboamu mũthenya wa gatatũ, o ta ũrĩa mũthamaki oigĩte gwĩkwo, rĩrĩa oigire atĩrĩ, Nĩmũgacoka gũũka kũrĩ niĩ mĩthenya ĩtatũ yathira.
• 13. Nake mũthamaki agĩgĩcokeria andũ acio ũhoro ehĩte mũno, agĩtiga kĩrĩra kĩrĩa aaheetwo nĩ athuri, agĩkĩrega,
• 14. akĩarĩria andũ acio athingatĩte kĩrĩra kĩa aanake, akiuga atĩrĩ, Watho ũrĩa baba aramwathaga nĩũramũritũhĩire ta arĩ mũtĩ wa ngingo mũritũ; no rĩrĩ, niĩ nĩ kũritũhia ngũmũritũhĩria mũtĩ ũcio wanyu wa ngingo makĩria; ningĩ baba aramũhũraga na iboko, no niĩ ndĩrĩmũrũmithia ing’aurũ.
• 15. Ũguo nĩguo mũthamaki aaregire kũigua andũ acio; nĩ gũkorũo ũhoro ũcio warehithĩtio nĩ Jehova, nĩ getha atũme ũhoro wake ũrĩa aakinyĩirie Jeroboamu wa Nebati na kanua ka Ahija, Mũshiloni, ũikare ũrũmĩte.
• 16. Na rĩrĩ, hĩndĩ ĩrĩa Aisiraeli othe monire atĩ mũthamaki ndanamaigua, andũ acio magĩgĩcokeria mũthamaki ũhoro makĩmwĩra atĩrĩ, Nĩ igai rĩrĩkũ twĩ narĩo he Daudi? Ningĩ-rĩ, hatirĩ kĩndũ tũgaĩte mũrũ wa Jesii. Wĩthiĩrei hema-inĩ cianyu inyuĩ Aisiraeli aya! Rĩu-rĩ, Daudi, kĩĩroragĩre nyũmba yaku wee mwene. Tondũ ũcio Aisiraeli makĩharaganĩria hema-inĩ ciao.
• 17. No rĩrĩ, ha ũhoro wa ciana cia Isiraeli iria ciatũũraga matũũra ma Juda-rĩ, Rehoboamu agĩgĩtuĩka mũthamaki wacio.
• 18. Na rĩrĩ, hĩndĩ ĩrĩa mũthamaki ũcio, ti Rehoboamu, aarekirie Adoramu, mũnene wa andũ a kĩaro-rĩ, Aisiraeli othe makĩmũhũra na mahiga nyuguto, o nginya agĩkua. Nake mũthamaki ũcio, ti Rehoboamu, agĩkĩhiũha akahaice ngari yake ya ita, orĩre Jerusalemu.
• 19. Ũguo nĩguo Aisiraeli mokĩrĩire nyũmba ya Daudi makĩrega gũcoka gwathwo nĩyo, o na ũmũthĩ.
• 20. Na gũgĩkinya atĩrĩ, atĩ hĩndĩ ĩrĩa Aisiraeli othe maaiguire atĩ Jeroboamu nĩacokete, makĩrekia mũndũ akamwĩte athiĩ kĩrĩndĩ-inĩ gĩa Isiraeli, nao makĩmũtua mũthamaki wa gũthamaka Isiraeli guothe; na gũtirĩ mũhĩrĩga warũmĩrĩire nyũmba ya Daudi, tiga o mũhĩrĩga wa Juda wiki.
• 21. Na rĩrĩ, hĩndĩ ĩrĩa Rehoboamu aakinyire Jerusalemu, akĩũnganithia arũme othe a nyũmba ya Juda, o na a mũhĩrĩga wa Benjamini, nao nĩo andũ arĩa athure maathiaga ita, ngiri igana rĩmwe rĩa mĩrongo ĩnana, nĩ getha makahũrane na nyũmba ya Isiraeli macokithie ũthamaki harĩ Rehoboamu, mũrũ wa Suleimani.
• 22. No rĩrĩ, ndũmĩrĩri ya Ngai ĩgĩkĩnyĩra Shemaia, mũndũ wa Ngai, akĩĩrũo atĩrĩ,
• 23. Aria na Rehoboamu, mũrũ wa Suleimani, mũthamaki wa Juda, o na andũ othe a nyũmba ya Juda na ya Benjamini, hamwe na andũ arĩa angĩ othe, ũmere atĩrĩ,
• 24. Jehova oigĩte ũũ: Mũtikwambata, o na kana mũkahũrane na ariũ a ithe wanyu ciana icio cia Isiraeli; cokai o mũndũ kwao mũciĩ; nĩ gũkorũo ũndũ ũcio nĩ niĩ ndũmĩte woneke. Nao magĩkĩigua ũhoro ũcio wa Jehova, makĩhũndũka, magĩĩthiĩra, o ta ũrĩa ũhoro ũcio merĩtwo nĩ Jehova watariĩ.
• 25. Hĩndĩ ĩo Jeroboamu agĩgĩaka itũũra rĩĩtagwo Shekemu bũrũri ũrĩa wĩ irĩma nyingĩ wa Efiraimu, agĩgĩtũũra kuo; ningĩ agĩcoka kuuma kuo agĩthiĩ agĩaka Penueli.
• 26. Nake Jeroboamu agĩkĩĩĩra na ngoro atĩrĩ, Hihi no kuona ũthamaki ũyũ ũgĩgacokerera nyũmba ya Daudi.
• 27. Andũ aya mangĩkorũo nĩmarĩambataga magathiĩ nyũmba ya Jehova o kũu Jerusalemu kũrutĩra magongona kuo-rĩ, ngoro cia andũ aya hihi nĩikagarũrũka, icokerere mwathi wao Rehoboamu, mũthamaki wa Juda; nao hihi nĩmakanjũraga, macoke he Rehoboamu, mũthamaki wa Juda.
• 28. Tondũ ũcio mũthamaki agĩgĩthiĩ ndundu nĩguo amenye ũrĩa egwĩka, nake agĩgĩthondekithia mĩhianano ĩĩrĩ ya njaũ cia thahabu; agĩcoka akĩĩra andũ ake atĩrĩ, Ũhoro wa kwambataga Jerusalemu nĩũkũmũgĩtĩra hinya mũno. Atĩrĩrĩ, inyuĩ Aisiraeli aya, ngai cianyu iria ciamũrutire bũrũri wa Misiri nĩcio ici!
• 29. Nayo mĩhianano ĩo, ũmwe akĩũiga Beth-eli, naguo ũrĩa ũngĩ akĩũiga Dani, akĩmĩhanda kuo.
• 30. Naguo ũndũ ũcio ũgĩtuĩka wĩhia; nĩ gũkorũo andũ nĩmaathiire o kũu Dani kũinamĩrĩra ũcio warĩ kuo maũhoe.
• 31. Ningĩ agĩaka nyũmba cia kũhoerũo matĩri-inĩ ma kũndũ gũtũũgĩru, agĩcoka akĩamũra athĩnjĩri-Ngai a andũ o ro ũguo, arĩa mataarĩ a ciana cia Lawii.
• 32. Nake Jeroboamu agĩtua atĩ kũgĩage gĩathĩ mweri wa ĩnana, mũthenya wa ikũmi na ĩtano wa mweri ũcio, o ta ũrĩa gĩathĩ kĩrĩa kĩgĩaga Juda gĩtariĩ, nake we mwene akĩambata agĩthiĩ kĩgongona-inĩ; ũguo nĩguo ekire o kũu Beth-eli, agĩkĩrutĩra njaũ icio aathondekete igongona; nakuo kũu Beth-eli akĩiga athĩnjĩri-ngai a kũrutagĩra magongona matĩri-inĩ ma kũndũ gũtũũgĩru marĩa aathondekete.
• 33. Nake akĩambata agĩkinya kĩgongona-inĩ kĩu aathondekete Beth-eli mũthenya wa ikũmi na ĩtano wa mweri wa ĩnana, o mweri ũcio aatuĩte na ũndũ wa gwĩciria na ngoro yake we mwene; agĩgĩtua atĩ ciana cia Isiraeli igĩe na gĩathĩ, akĩambata kĩgongona-inĩ kĩu agacine ũbumba.

Home