Go Back

2 Samueli Chapter 20

• 1. Na rĩrĩ, hau hagĩgĩkorũo he mũndũ ũmwe mwaganu mũno, wetagwo Sheba wa Bikiri, Mũbenjamini; nake akĩhuha coro, akiuga atĩrĩ, Ithuĩ tũtirĩ ho o na hanini ũhoro-inĩ wa Daudi, o na kana tũkagĩa igai o na rĩrĩkũ he mũrũ wa Jesii. Mũndũ o mũndũ nĩecokere hema-inĩ yake, inyuĩ Aisiraeli aya!
• 2. Tondũ ũcio Aisiraeli othe magĩgĩtiga kũrũmĩrĩra Daudi, makĩrũmĩrĩra Sheba ũcio wa Bikiri; no rĩrĩ, andũ a Juda, kuuma Jorodani nginya Jerusalemu, maarũmĩrĩire o mũthamaki wao.
• 3. Na rĩrĩ, mũthamaki Daudi agĩgĩkinya gwake mũciĩ kũu Jerusalemu; nake akĩnyita aka acio ikũmi thuriya ciake, o acio aatigĩte maikaragie mũciĩ, akĩmahingĩrithia handũ mwanya, na agĩgĩathana atĩ maheagwo irio cia kũmaigana; no rĩrĩ, ndaacokire gũthiĩ kuonana nao. Na tondũ ũcio magĩgĩtũũra mahingĩirũo o nginya hĩndĩ ĩrĩa maakuire, magĩtũũra o ro ũguo ta marĩ aka a ndigwa.
• 4. Ningĩ mũthamaki agĩkĩĩra Amasa atĩrĩ, Mũira wa matukũ matatũ mathire-rĩ, njĩtĩra andũ a Juda, macokanĩrĩre haha, o nawe ũgakorũo ho.
• 5. Tondũ ũcio Amasa agĩgĩthiĩ gwĩta andũ a Juda macokanĩrĩre hamwe; no rĩrĩ, nĩaaikarangire gũkĩra ihinda rĩrĩa rĩatuĩtwo.
• 6. Nake Daudi agĩkĩĩra Abishai atĩrĩ, Rĩu Sheba wa Bikiri nĩegũtũgera ngero nene gũkĩra ĩrĩa twagerirũo nĩ Abisalomu; tondũ ũcio oya ndungata ciakwa, niĩ mwathi waku, ũmũrũmĩrĩre na ihenya, nĩ getha ndakegwatĩre matũũra marĩa mairigĩtwo, ehonokie, na ithuĩ twage gũcoka kũmuona.
• 7. Naho hagĩkiumagara andũ arĩa maarĩ a Joabu, makĩmũrũmĩrĩra, o na Akerethi, na Apelethi, o na njamba ciothe; nao magĩkiuma kũu Jerusalemu marũmĩrĩre Sheba wa Bikiri.
• 8. Na rĩrĩ, maakuhĩhĩria ihiga-inĩ rĩrĩa inene rĩrĩ kũu Gibeoni-rĩ, Amasa agĩgĩtũngana nao. Nake Joabu agĩkorũo eohete indo ciake cia mbaara iria ekagĩra, agaciohania na rũhiũ rũa njora rũrĩa eyohete njohero, naruo rũhiũ rũarĩ njora; nake rĩrĩa aathiaga o ro ũguo-rĩ, rũhiũ rũu rũkĩgũa thĩ.
• 9. Nake Joabu agĩkĩũria Amasa atĩrĩ, Ũhoro waku no mwega, mũrũ wa awa? Ningĩ Joabu agĩkĩnyita Amasa nderu ciake na guoko gwake kwa ũrĩo amũmumunye.
• 10. No rĩrĩ, Amasa ndaigana kũrũmbũiya ũhoro wa rũhiũ rũa njora rũu Joabu aanyitĩte na guoko; tondũ ũcio Joabu agĩkĩmũtheca naruo nda, nayo nda yake yothe ĩgĩitĩka thĩ, na ndaigana kũmũgũtha rĩngĩ; nake Amasa agĩgĩkua. Nake Joabu na Abishai mũrũ wa ithe makĩrũmĩrĩra Sheba wa Bikiri na ihenya.
• 11. Naho hau hagĩgĩtigwo mũndũ ũmwe wa aanake a Joabu arũgamĩte ho, wa kũheana ũhoro atĩrĩ, Mũndũ ũrĩa wothe wĩ mwena wa Joabu, o na wa Daudi, nĩarũmĩrĩre Joabu.
• 12. Nake Amasa aakorirũo akomete egaragarĩtie thakame-inĩ yake o njĩra-inĩ ya gĩtwari gatagatĩ. Na rĩrĩ, mwanake ũcio ona atĩ andũ othe nĩmararũgama hau, agĩkĩoya Amasa, akĩmweheria njĩra-inĩ ĩo ya gĩtwari, akĩmũkuua akĩmũkerũria gĩthaka-inĩ, agĩcoka akĩmũhumbĩra na nguo, ona atĩ mũndũ o wothe ũrĩa ũrahĩtũkĩra harĩ we nĩararũgama.
• 13. Na rĩrĩ, eherio njĩra-inĩ ĩo ya gĩtwari-rĩ, andũ othe magĩgĩthiĩ na mbere marũmĩrĩire Joabu, magateng’erie Sheba ũcio wa Bikiri.
• 14. Nake Sheba agĩgĩthiĩ akĩgera mabũrũri mothe ma mĩhĩrĩga ya Isiraeli, o nginya Abeli, o na Bethi-maaka, o na bũrũri wothe wa Aberi; nao andũ acio othe magĩkorũo macokanĩrĩire hamwe, makĩmũrũmĩrĩra.
• 15. Nao aa Joabu magĩgĩthiĩ makĩmũthiũrũrũkĩria o kũu Abeli, itũũra rĩa Bethi-maaka, nao magĩita tĩri kĩhumbu kĩnene kĩĩgiritanĩtie na itũũra, nakĩo gĩkĩambatĩrio kĩrĩ o rũthingo-inĩ rũarĩo; nao andũ acio othe maarĩ na Joabu makĩhũrahũra rũthingo marũtharie, nĩguo marũgũithie thĩ.
• 16. Hĩndĩ ĩo mũndũ-wa-nja ũmwe mũũgĩ wa itũũra rĩu akĩanĩrĩra na mũgambo mũnene akiuga atĩrĩ, Ta thikĩrĩriai; atĩrĩrĩ, ta thikĩrĩriai; ndamũthaitha mwĩre Joabu ũũ: Ũka ũthengerere haha, nĩ getha njarie nawe.
• 17. Nake agĩthiathia hakuhĩ nake; nake mũndũ-wa-nja ũcio akĩmũũria atĩrĩ, Wee nĩwe Joabu? Nake agĩgĩcokia atĩrĩ, Ĩĩ, nĩ niĩ we. Agĩkĩmwĩra atĩrĩ, Ta igua ũhoro wakwa, niĩ ndungata yaku ya mũndũ-wa-nja. Nake agĩgĩcokia atĩrĩ, Nĩ’thikĩrĩirie.
• 18. Nake agĩkĩmwarĩria, akiuga atĩrĩ, Tene-rĩ, ciugo ici nĩciaaragio, gũkerũo atĩrĩ, Ti-itherũ andũ makahoyaga kĩrĩra o kũu Abeli; naguo ũhoro ũgagĩthirĩra kuo.
• 19. Niĩ-rĩ, ndĩ wa andũ arĩa mendete kũgĩe thayũ, o na wa arĩa ehokeku thĩinĩ wa Isiraeli; no wee ũcarĩtie kũnina itũũra rĩrĩ, rĩĩ nyina wa andũ thĩinĩ wa Isiraeli; nĩ kĩ gĩgũtũma wende kũmeria ũgai wa Jehova, ũũnine biũ?
• 20. Nake Joabu agĩcokia akiuga atĩrĩ, Ndĩroaga gwĩka ũndũ ta ũcio o na hanini wa atĩ nyende kũmerania kana kũninana!
• 21. Ũhoro ndũtariĩ ũguo; no nĩ mũndũ ũmwe wa bũrũri ũrĩa wĩ irĩma nyingĩ wa Efiraimu, wĩtagwo Sheba, mũrũ wa Bikiri, wambararĩtie guoko gwake okĩrĩre mũthamaki witũ Daudi; mũneane arĩ o we wiki, na nĩngwehera nyume itũũra-inĩ rĩrĩ rĩanyu. Nake mũndũ-wa-nja ũcio agĩkĩĩra Joabu ũũ: Atĩrĩrĩ, nĩũgũikĩrio mũtwe wake na kũu mbarĩ ĩo ya rũthingo.
• 22. Hĩndĩ ĩo mũndũ-wa-nja ũcio agĩgĩthiĩ harĩ andũ akĩaria nao na ũũgĩ. Nao magĩtinia Sheba ũcio wa Bikiri mũtwe, makĩũikĩria Joabu na kũu mbarĩ ĩo ĩngĩ ya na nja. Nake Joabu agĩkĩhuhithia coro, nao andũ makĩharagania makiuma itũũra-inĩ rĩu, nao othe, mũndũ o mũndũ agĩthiĩ hema-inĩ yake. Nake Joabu agĩgĩcoka Jerusalemu he mũthamaki.
• 23. Na rĩrĩ, Joabu nĩwe waathaga mbũtũ yothe ya ita ya Isiraeli, nake Benaia wa Jehoiada nĩwe waathaga Akerethi, o na Apelethi,
• 24. nake Adoramu nĩwe warĩ mũnene wa kũrutithia igoti, o nake Jehoshafatu wa Ahiludu nĩwe warĩ mwandĩki maũndũ ma ihinda rĩu,
• 25. nake Sheva nĩwe warĩ mwandĩki-marũa, o nao Zadoku na Abiatharu nĩo maarĩ athĩnjĩri-Ngai;
• 26. o nake Ira, Mũjairi, aarĩ mũthĩnjĩri-Ngai wa Daudi.

Home