Go Back

2 Samueli Chapter 13

• 1. Na gũgĩkinya atĩrĩ, atĩ maũndũ macio maathira, Abisalomu, mũrũ wa Daudi, agĩkorũo arĩ na mwarĩ wa nyina mũthaka mũno, wetagwo Tamaru; nake Amunoni, mũrũ wa Daudi, akĩmwenda mũno.
• 2. Amunoni ũcio agĩgĩtangĩka mũno o nginya akĩrũara nĩ ũndũ wa Tamaru, mwarĩ wa ithe; nĩ gũkorũo aarĩ mũirĩtu gathirange, nake Amunoni nĩonaga atĩ hatirĩ njĩra ya kũmwĩka ũndũ o na ũrĩkũ.
• 3. No rĩrĩ, Amunoni aarĩ na mũratawe wetagwo Jonadabu, wa Shimea, mũrũ wa nyina na Daudi; nake Jonadabu ũcio agĩkorũo arĩ mũndũ mwara mũno.
• 4. Nake akĩũria Amunoni atĩrĩ, Ĩ nĩ kĩ gĩtũmaga wee, mũrũ wa mũthamaki, ũikare ũkĩhĩnjaga ũũ mũthenya o mũthenya? Kaĩ ũtangĩkĩnjĩra gĩtũmi? Nake Amunoni akĩmwĩra atĩrĩ, Nĩ kwenda nyendete Tamaru, mwarĩ wa nyina na Abisalomu, mũrũ wa baba.
• 5. Nake Jonadabu agĩkĩmwĩra atĩrĩ, Thiĩ ũgekomie gĩtanda-inĩ gĩaku, wĩtue ta wĩ mũrũaru; na rĩrĩa thoguo arĩũka gũkũrora, ũmwĩre atĩrĩ, Ndagũthaitha ũreke mwarĩ wa baba, Tamaru, oke andehere irio cia kũrĩa, na a’thondekere irio njũthĩrĩirie, nĩ getha ndĩcione, ndĩcirĩe acinyitĩte na guoko gwake.
• 6. Tondũ ũcio Amunoni agĩĩkomia, agĩĩtua ta arĩ mũrũaru; na rĩrĩ, hĩndĩ ĩrĩa mũthamaki aathiire kũmũrora-rĩ, Amunoni agĩkĩĩra mũthamaki atĩrĩ, Ndagũthaitha ũreke mwarĩ wa baba Tamaru oke, nĩguo a’thondekere tũmĩgate twĩrĩ, njũthĩrĩirie, nĩ getha ndĩtũrĩe atũnyitĩte na guoko gwake.
• 7. Hĩndĩ ĩo Daudi agĩkĩrekania mũciĩ Tamaru agetwo, akiuga atĩrĩ, Thiĩ o ro rĩu kwa mũrũ wa thoguo, Amunoni, nyũmba, ũkamũthondekere irio.
• 8. Tondũ ũcio Tamaru agĩgĩthiĩ nyũmba ya mũrũ wa ithe, Amunoni; nake agĩkorũo nĩ gũkoma aakomete. Nake Tamaru agĩkĩoya kĩmere kĩa mũtu, agĩkĩmanda, agĩthondeka mĩgate Amunoni amũcũthĩrĩirie, nayo mĩgate ĩo akĩmĩruga.
• 9. Agĩcoka akĩoya rũgĩo, akĩmũihũrĩra; no nĩaaregire kũmĩrĩa. Nake Amunoni akiuga atĩrĩ, Andũ othe nĩmoime nja manjeherere. Andũ othe magĩkiuma makĩmweherera.
• 10. Nake Amunoni akĩĩra Tamaru atĩrĩ, Ndehere irio gũkũ kanyũmba thĩinĩ, nĩ getha ndĩcirĩe ũcinyitĩte na guoko gwaku. Tamaru agĩkĩoya mĩgate ĩo aathondekete, akĩmĩtwara kanyũmba thĩinĩ kwĩ Amunoni, mũrũ wa ithe.
• 11. Na rĩrĩ, hĩndĩ ĩrĩa aamũtwarĩrĩire hakuhĩ atĩ nĩguo arĩe-rĩ, akĩmũnyita, akĩmwĩra atĩrĩ, Ũka ngome nawe, mwarĩ wa awa.
• 12. Nake akĩmũcokeria atĩrĩ, Aca, mũrũ wa awa, tiga kũngwata na hinya; nĩ gũkorũo ũndũ ta ũcio ndwagĩrĩire gwĩkwo thĩinĩ wa Isiraeli; menya wĩke ũndũ ta ũcio wa ũkĩgu.
• 13. Niĩ na niĩ-rĩ, ingĩkĩhota gũcoka gũthiĩ atĩa nĩ thoni? O naho ha ũhoro waku-rĩ, ũgũtuĩka o ta mũndũ ũmwe wa andũ arĩa monagwo marĩ akĩgu thĩinĩ wa Isiraeli. Na tondũ ũcio kaba warie na mũthamaki, ndagũthaitha, nĩ ũndũ ndengirania nawe.
• 14. No rĩrĩ, Amunoni ndaigana kũigua uuge wake; no tondũ wa ũrĩa aamũkĩririe hinya, nĩaamũnyitire na hinya, agĩkoma nake.
• 15. Thutha wa ũguo Amunoni agĩcoka akĩmũthũũra gĩthũũro kĩnene mũno; nakuo gũthũũra kũu aamũthũũrire gũkĩneneha mũno gũkĩra kwenda kũrĩa aamwendete. Nake Amunoni agĩkĩmwĩra atĩrĩ, Ũkĩra, wehere haha.
• 16. Nake Tamaru akĩmwĩra atĩrĩ, Ũguo tiguo; nĩ ũndũ ihĩtia rĩrĩ inene rĩa kũnyumia na nja nĩ rĩũru makĩria kũrĩ ũndũ ũcio ũngĩ wanjĩka. No ndaigana kũmũigua.
• 17. Nake agĩgĩĩta ndungata yake ĩrĩa yamũtungatagĩra, akĩmĩĩra atĩrĩ, Ruta mũndũ-wa-nja ũyũ na nja rĩu, anjeherere, ũcoke ũhinge mũrango wega na thutha wake.
• 18. Nake mũirĩtu ũcio ehumbĩte nguo ya rangi wa mĩthemba mĩingĩ, nĩ gũkorũo nguo ta icio nĩcio ciehumbagwo nĩ airĩtu a mũthamaki arĩa maakoragwo marĩ airĩtu gathirange. Ndungata ĩo yake ĩgĩkũmũruta na nja, ĩgĩcoka ĩkĩhinga mũrango wega na thutha wake.
• 19. Nake Tamaru agĩkĩĩitĩrĩria mũhu mũtwe, o na agĩtembũranga nguo yake ĩo yarĩ ya rangi wa mĩthemba mĩingĩ, ĩo ehumbĩte; agĩcoka akĩĩigĩrĩra guoko mũtwe, agĩĩthiĩra; agĩgĩthiĩ na njĩra akĩrĩraga aanĩrĩire.
• 20. Nake Abisalomu, mũrũ wa nyina, akĩmũũria atĩrĩ, Anga uuma na mũrũ wa thoguo Amunoni? No rĩrĩ, wĩkirĩre, mwarĩ-wa-iya; ũcio nĩ mũrũ wa thoguo; tiga kũigua ũũru ngoro nĩ ũndũ wa ũhoro ũcio. Tondũ ũcio Tamaru agĩgĩtũũra kwa mũrũ wa nyina Abisalomu mũciĩ e na kĩeha kĩnene.
• 21. No rĩrĩ, mũthamaki aaigua ũhoro wa maũndũ macio mothe, agĩtũkũyana mũno.
• 22. Nake Abisalomu ndaigana gũcoka kwaria na Amunoni ũndũ o na ũrĩkũ mwega kana mũũru; nĩ gũkorũo Abisalomu nĩaathũũrire Amunoni o kũmũthũũra biũ nĩ ũndũ wa kũgwata mwarĩ wa nyina, Tamaru.
• 23. Na gũgĩkinya atĩrĩ, atĩ mĩaka ĩĩrĩ mĩgima yathira, Abisalomu agĩkorũo akĩmurithia ng’ondu ciake guoya o kũu Baali-hazoru, kũrĩa gũkuhanĩrĩirie na Efiraimu; nake Abisalomu agĩĩtĩra ariũ a mũthamaki othe gĩathĩ.
• 24. Abisalomu agĩgĩthiĩ he mũthamaki, akĩmwĩra ũũ: Atĩrĩrĩ, nĩ hĩndĩ niĩ, ndungata yaku, ndĩramurithia ng’ondu ciakwa guoya; ndagũthaitha, mũthamaki ũyũ, ũũke tũthiĩ nawe, niĩ ndungata yaku, mũrĩ na ndungata iria ingĩ ciaku, tũtwarane na inyuĩ.
• 25. Nake mũthamaki akĩĩra Abisalomu atĩrĩ, Aca, mũrũ wakwa, tũtigũthiĩ ithuothe, nĩ getha hihi tũtigagũtitikithie mũrigo mũritũ. Nake akĩmũhatĩrĩria, no ndetĩkĩrire gũthiĩ, tiga o kũrathima aamũrathimire.
• 26. Hĩndĩ ĩo Abisalomu agĩkiuga atĩrĩ, Kũngĩkorũo ti ũguo-rĩ, ndagũthaitha ũreke Amunoni, mũrũ wa baba, atwarane na ithuĩ. Nake mũthamaki agĩkĩmũũria atĩrĩ, Egũgĩtwarana na inyuĩ nĩ ũndũ kĩ?
• 27. No Abisalomu akĩmũhatĩrĩria mũno o nginya akĩreka Amunoni, o na ariũ othe a mũthamaki, matwarane nake.
• 28. Nake Abisalomu agĩatha ndungata ciake, agĩciĩra atĩrĩ, Barai mũmenye wega hĩndĩ ĩrĩa ngoro ya Amunoni ĩrĩkorũo ĩkenete mũno nĩ ũndũ wa ndibei ĩrĩa anyuĩte; na rĩrĩ, hĩndĩ ĩrĩa inyuĩ ndĩrĩmwĩra atĩrĩ, Hũrai Amunoni, hĩndĩ ĩo mũgakĩmũũraga, na mũtigetigĩre; githĩ ti niĩ ndakĩmwatha mwĩke ũguo? Ũmĩrĩriai mũno, na mũgĩe na ũcamba.
• 29. Nacio ndungata cia Abisalomu igĩgĩĩka Amunoni o ta ũguo Abisalomu aaciathĩte. Hĩndĩ ĩo ariũ a mũthamaki othe makĩarahũka, nao othe, mũndũ o mũndũ, akĩhaica nyũmbũ yake, akĩũra.
• 30. Na gũgĩkinya atĩrĩ, atĩ hĩndĩ ĩrĩa maarĩ njĩra, ũhoro ũgĩkinyĩra Daudi, akĩĩrũo atĩrĩ, Abisalomu nĩoragĩte ariũ a mũthamaki othe, na hatirĩ o na ũmwe wao ũtigarĩte.
• 31. Nake mũthamaki agĩgĩũkĩra, agĩtembũranga nguo ciake, agĩkoma thĩ; nacio ndungata ciake ciothe ikĩmũrũgama hakuhĩ, itembũrangĩte nguo ciacio.
• 32. Nake Jonadabu, wa Shimea, mũrũ wa ithe na Daudi, agĩitĩka kwaria, akiuga atĩrĩ, Mwathi wakwa, tiga kwĩgereria atĩ nĩ aanake othe ariũ a mũthamaki akuũ; nĩ gũkorũo Amunoni nowe wiki mũkuũ; nĩ ũndũ ũhoro ũcio wagwetereirũo nĩ Abisalomu atĩ nĩũgekwo gwata o mũthenya ũrĩa Amunoni ũcio aagwatire mwarĩ wa nyina, Tamaru.
• 33. Na tondũ ũcio mũthamaki ũyũ, mwathi wakwa, tiga kũigua ũũru ngoro nĩ ũndũ wa ũhoro ũcio, ũgĩtinda ũgĩĩciria atĩ nĩ ariũ othe a mũthamaki akuũ, nĩ gũkorũo Amunoni wiki nowe mũkuũ.
• 34. No rĩrĩ, Abisalomu akĩũra. Nake mwanake ũrĩa warangaga itũũra-inĩ agĩtiira maitho, agĩcũthĩrĩria, na atĩrĩrĩ, hagĩũka andũ aingĩ na njĩra ĩrĩa yarĩ gĩthũngũri-inĩ na thutha wake.
• 35. Nake Jonadabu agĩkĩĩra mũthamaki ũũ: Atĩrĩrĩ, ariũ a mũthamaki nĩmokĩte; o ta ũrĩa niĩ, ndungata yaku, ngwĩrire-rĩ, ũguo noguo gũtariĩ.
• 36. Na gũgĩkinya atĩrĩ, atĩ aarĩkia kwaria o ro ũguo, ariũ a mũthamaki magĩkinya; nao makĩanĩrĩra na mũgambo mũnene, makĩrĩra, o nake mũthamaki na ndungata ciake ciothe makĩrĩra mũno mũno.
• 37. No rĩrĩ, Abisalomu nĩ kũũra orire, agĩthiĩ gwĩ Talimai wa Amihuri, mũthamaki wa Geshuru. Nake Daudi akarĩragĩra mũriũ mũthenya o mũthenya.
• 38. Abisalomu agĩkĩũra, agĩkinya Geshuru, agĩikara kuo mĩaka ĩtatũ.
• 39. Nayo ngoro ya mũthamaki Daudi ĩkeriragĩria gũthiĩ kwĩ Abisalomu; nĩ gũkorũo ha ũhoro wa Amunoni, nĩaakorirũo akirĩtio maithori nĩ ũndũ wa gĩkuũ gĩake.

Home