Go Back

Kĩambĩrĩria Chapter 8

• 1. Nake Ngai no aaririkaine Nuhu, na kĩrĩa gĩothe kĩarĩ na muoyo, gwata o nyamũ ciothe iria ciarĩ hamwe nake thabina thĩinĩ; ningĩ Ngai agĩcoka agĩtũma rũhuho rũhurutane gũkũ thĩ, namo maĩ magĩitĩka kũhũahũa,
• 2. namo matherũkĩro ma maĩ ma kũrĩa kũriku mũno makĩhingwo, o na mĩanya ya igũrũ nayo ĩkĩhingwo, na mbura ĩrĩa yoimaga igũrũ ĩkĩgirio ĩcoke kuura;
• 3. namo maĩ makĩrũmanĩria gũcokacoka na thutha o makĩeheraga thĩ; na rĩrĩ, matukũ maathira igana rĩa mĩrongo ĩtano, maĩ magĩkorũo manyihanyihĩte.
• 4. Naguo mũthenya wa ikũmi na mũgwanja wa mweri wa mũgwanja thabina ĩo ĩgĩikarĩra irĩma iria ciĩtagwo Ararati.
• 5. Namo maĩ macio makĩrũmanĩria kũnyihanyiha o nginya mweri wa ikũmi; na rĩrĩ, mũthenya wa mbere wa mweri o ro ũcio wa ikũmi tũcũmbĩrĩ twa irĩma tũgĩitĩka kuoneka.
• 6. Na gũgĩkinya atĩrĩ, atĩ matukũ maathira mĩrongo ĩna, Nuhu agĩkĩhingũra kamwanya ga thabina ĩo aakĩte,
• 7. agĩcoka akiumia ihuru na nja, akĩrĩrekia rĩthiĩ; narĩo rĩgĩtũũra rĩũrũraga o nginya rĩrĩa maĩ maahũire thĩ.
• 8. Agĩcoka akiumia ndutura na nja, yume kũu aarĩ, nĩ getha amenye kana maĩ nĩmahũcahũcũkĩte gũkũ thĩ;
• 9. no rĩrĩ, ndutura ĩo ĩkĩaga ha gũkinyithia ikinya ĩhurũke, nayo ĩgĩkĩmũcokerera kũu thabina inĩ, nĩ ũndũ maĩ nĩmaaiyũire kũndũ guothe thĩ, nake agĩtambũrũkia guoko, akĩmĩnyita, akĩmĩtonyia thabina thĩinĩ kũu aarĩ.
• 10. Ningĩ agĩikara mĩthenya ĩngĩ mũgwanja, agĩcoka akiumia ndutura ĩo na nja, yume thabina-inĩ rĩngĩ;
• 11. nayo ndutura ĩo ĩkĩya kũmũcokerera o hwaĩ-inĩ; na rĩ’, ĩgĩkorũo ĩrĩ na ithangũ rĩa mũtamaiyũ kanua kayo rĩa mwahũrano; na tondũ wa ũguo Nuhu akĩmenya atĩ maĩ nĩmahũcahũcũkĩte thĩ.
• 12. Agĩikara mĩthenya ĩngĩ mũgwanja, agĩcoka akiumia ndutura ĩo na nja o rĩngĩ; nayo ndĩigana kũmũcokerera rĩngĩ.
• 13. Na gũgĩkinya atĩrĩ, atĩ mwaka wa magana matandatũ na ũmwe, mweri wa mbere wa mwaka ũcio, o mũthenya wa mbere waguo, maĩ magĩkorũo marĩkĩtie kũhũa biũ gũkũ thĩ; nake Nuhu akĩeheria kĩnyamũ kĩrĩa kĩagitĩte igũrũ rĩa thabina, akĩrora, akĩona atĩ thĩ nĩĩniarĩte.
• 14. Na rĩrĩ, mũthenya wa mĩrongo ĩĩrĩ na mũgwanja wa mweri wa kerĩ nĩguo thĩ yakorirũo ĩniarĩte.
• 15. Nake Ngai akĩarĩria Nuhu, akĩmwĩra atĩrĩ,
• 16. Uma thabina wee mwene mũrĩ hamwe na mũkaguo, na ariũ aku, na aka ao.
• 17. Hingũrĩra nyamũ o yothe, ici ciothe wĩ nacio cia mwĩrĩ wa nyama, muumanie nacio, o gwata nyamũ iria ii njoya, na nyamũ cia magũrũ mana, o na kanyamũ o gothe gatambi karĩa gatambaga thĩ, nĩ getha ihunje ciingĩhe mũno gũkũ thĩ, na iciare mũno, o na ithegee gũkũ thĩ.
• 18. Nake Nuhu makiuma na ariũ ake, na mũka, na aka a ariũ ake;
• 19. ningĩ nyamũ o yothe ya magũrũ mana, na kanyamũ o gothe karĩa gatambaga, na nyamũ o yothe ĩrĩa ĩĩ njoya, o gwata kĩrĩa gĩothe gĩthiangaga gũkũ thĩ, o nyamũ mũhĩrĩga wayo, igĩkiuma thabina.
• 20. Nake Nuhu agĩakĩra Jehova kĩgongona; agĩtwara nyamũ imwe cia mũthemba o wothe ũrĩa ũtarĩ mũgiro, o na imwe cia iria ii njoya mũthemba o wothe ũtarĩ mũgiro, agĩcirutĩra kĩgongona inĩ kĩu, ituĩke mahaki ma njino.
• 21. Nake Jehova akĩigua atĩ mũcingũ wa nyama icio nĩ mwega; ningĩ Jehova akĩĩĩra na ngoro atĩrĩ, Ndigacoka gũthahĩria andũ tĩri rĩngĩ, nĩ gũkorũo methugunda marĩa ngoro ciao ithugundaga makoragwo marĩ o moru kuuma o ũnyinyi inĩ wao; o na ningĩ ndigacoka kũhũra kĩrĩa gĩothe kĩĩ na muoyo ta ũguo njĩkĩte.
• 22. Hĩndĩ ĩrĩa yothe thĩ ĩgũtũũra-rĩ, gũtikaaga hĩndĩ ya mahanda na hĩndĩ ya magetha, na ya heho na ya ũrugarĩ, o na themithũ na thano, o na kana kwage ũhoro wa gũkĩa na gũtuka.

Home