Go Back

Kĩambĩrĩria Chapter 39

• 1. Na rĩrĩ, Jusufu agĩikũrũkio, agĩkinyio Misiri; nake Potifaru, Mũmisiri ũmwe wa Firauni, ũrĩa wehokeirũo wĩra wa nyũmba yake, na agatuwo mũnene wa athigari a kũrangĩra korokoro, akĩmũgũra harĩ Aishumaeli acio maamũikũrũkĩtie kuo.
• 2. Na rĩrĩ, Jehova aarĩ hamwe na Jusufu, namo maũndũ marĩa ekaga makagaacĩra, agĩgĩtũũra o kũu nyũmba ya Mũmisiri ũcio, mwathi wake.
• 3. Ningĩ mwathi wake akĩona atĩ Jehova e hamwe na Jusufu, na atĩ Jehova nĩaatũmaga maũndũ mothe marĩa ekaga magaacĩre.
• 4. Jusufu agĩgĩĩtĩkĩrĩka nĩ Potifaru, agĩkĩmũtungatĩra, nake Potifaru agĩkĩmũtua mũrori wa nyũmba yake, agĩkĩmũnengera indo ciake ciothe iria aarĩ nacio acirorage.
• 5. Na gũgĩkinya atĩrĩ, atĩ gwata hĩndĩ ĩrĩa aamũtuire mũrori wa nyũmba yake, o na wa indo ciothe iria aarĩ nacio, Jehova akĩrathima nyũmba ya Mũmisiri ũcio nĩ ũndũ wa Jusufu; nacio indo ciothe iria aarĩ nacio ikĩgĩa na kĩrathimo kĩa Jehova, o na irĩ nyũmba, kana mũgũnda.
• 6. Nacio indo ciothe iria aarĩ nacio agĩciiga moko-inĩ ma Jusufu; na ndaarumbũyagia ũhoro wa kĩndũ o na kĩ kĩrĩa aarĩ nakĩo tiga o ũhoro wa irio iria aarĩaga. Nake Jusufu aarĩ mũthaka, na aarĩ kĩĩrorerũa.
• 7. Na gũgĩkinya atĩrĩ, atĩ thutha wa maũndũ macio, mũka wa mwathi wa Jusufu akĩmũroria riitho, akĩmwĩra atĩrĩ, Koma na niĩ.
• 8. Nowe akĩrega, agĩkĩĩra mũka wa mũmwathi ũũ; Atĩrĩrĩ, mwathi wakwa ndarũmbũragia kĩndũ o na kĩ kĩrĩa kĩĩ nyũmba ĩno, nĩ ũndũ nĩa’nengerete indo ciake ciothe ndĩcirorage,
• 9. na gũtirĩ mũndũ ũngĩ mũnene kũrĩ niĩ mũciĩ ũyũ; ningĩ gũtirĩ kĩndũ o na kĩ andigĩrĩirie tiga o wee wiki, nĩ ũndũ wĩ mũtumia wake; kaĩ ingĩkĩhota atĩa gwĩka ũndũ ta ũcio mũnene ũguo wa waganu, o na njĩhie Ngai?
• 10. Na gũgĩkinya atĩrĩ, atĩ o na harĩa aaragia na Jusufu mũthenya o mũthenya-rĩ, ndaigana kũmũigua, atĩ nĩguo akome nake, o na kana aikaranie nake.
• 11. Na matukũ-inĩ o ro macio gũgĩkinya atĩrĩ, atĩ mũthenya ũmwe Jusufu agĩtonya nyũmba nĩguo akarute wĩra wake, na gũgĩkorũo gũtiarĩ mũndũ ũngĩ wa nyũmba ĩo warĩ kũu thĩinĩ.
• 12. Mũtumia ũcio agĩkĩmũnyita nguo, akĩmwĩra atĩrĩ, Koma na niĩ; nake Jusufu agĩtiga nguo yake ĩĩ guoko gwake, akĩũra, akĩĩyumĩra.
• 13. Na gũgĩkinya atĩrĩ, atĩ rĩrĩa onire atĩ Jusufu egũtiga nguo yake ĩĩ guoko gwake, ora, oima nja,
• 14. agĩĩta andũ a nyũmba yake, akĩmera atĩrĩ, Ta kĩonei atĩ mũthuri wakwa aatũreheire Mũhibirania gũkũ oke atũnyarare; egũũkĩte kũrĩ niĩ atĩ nĩguo akome na niĩ, no niĩ ndoiga mbu;
• 15. na gwatuĩka atĩrĩ, atĩ rĩrĩa aiguire ndaanĩrĩra ndoiga mbu, aatiga nguo yake harĩ niĩ, ora, oima nja.
• 16. Mũtumia ũcio agĩkĩiga nguo ĩo o nginya hĩndĩ ĩrĩa mwathi wa Jusufu aainũkire.
• 17. Nake akĩmũhe ũhoro, akiuga ũũ: Atĩrĩrĩ, ndungata ĩrĩa yaku ya Mũhibirania watũrehereire ĩgũũkĩte kũrĩ niĩ ĩ’nyarare;
• 18. na gwakinya atĩrĩ, atĩ rĩrĩa nyanĩrĩire ndoiga mbu, yatiga nguo yayo harĩ niĩ, yora, yoima nja.
• 19. Gũgĩkinya atĩrĩ, atĩ hĩndĩ ĩrĩa mwathi wa Jusufu aaiguire ndeto icio cia mũtumia wake, rĩrĩa aamwĩraga ũũ: Ndungata yaku ĩnjĩkĩte ũna na ũna, akĩrakara mũno.
• 20. Mwathi ũcio wa Jusufu agĩkĩmũnyita, akĩmũikia korokoro-inĩ, o kũrĩa andũ arĩa ohe a mũthamaki maaikagio; agĩgĩikara kũu korokoro-inĩ.
• 21. No rĩrĩ, Jehova aarĩ hamwe na Jusufu, agĩkĩmwĩka maũndũ mega ma ũtugi, agĩtũma etĩkĩrĩke nĩ mũnene ũrĩa waroraga andũ arĩa ohe.
• 22. Nake mũnene ũcio agĩtigĩra Jusufu ũrori wa andũ othe arĩa maarĩ kũu korokoro-inĩ; naguo wĩra ũrĩa wothe warutagwo kũu, nĩ Jusufu waũrutithagia.
• 23. Ningĩ mũnene ũcio wa korokoro ndarĩ ũndũ o na ũrĩkũ aaroraga wa maũndũ marĩa maarĩ watho-inĩ wa Jusufu, nĩ ũndũ Jehova aarĩ hamwe nake; naguo ũndũ ũrĩa wothe ekaga, Jehova agĩtũma ũgaacĩre.

Home