Go Back

Kĩambĩrĩria Chapter 38

• 1. Na rĩrĩ, gũgĩkinya atĩrĩ, atĩ o matukũ-inĩ macio Juda agĩikũrũka oimĩte kũrĩ ariũ a ithe, agĩthiĩ kwa mũndũ wa Adulamu wetagwo Hira.
• 2. Nakuo kũu Juda akĩona mũirĩtu wa Shua, Mũkanaani, nake akĩmũhikia, akĩonana nake.
• 3. Nake mũndũ-wa-nja ũcio agĩkĩgĩa ihu, agĩciara kahĩĩ, agĩgatua Eri.
• 4. Ningĩ akĩgĩa ihu rĩngĩ, agĩciara kahĩĩ kangĩ agĩgatua Onani.
• 5. Agĩcoka agĩciara kahĩĩ o kangĩ agĩgatua Shela, nake Juda aatũũrĩte Chezibu hĩndĩ ĩrĩa mũka ũcio aaciarire kahĩĩ kau.
• 6. Juda agĩkĩgũrĩra Eri, irigithathi rĩake, mũka, na etagwo Tamaru.
• 7. Nake Eri ũcio mũrũ wa Juda wa irigithathi, nĩonagwo nĩ Jehova arĩ mwaganu; Jehova agĩkĩmũũraga.
• 8. Juda agĩkĩĩra Onani atĩrĩ, Thiĩ ũkonane na mũka wa mũrũ wa nyũkwa, ũmwĩke o ta ũrĩa mũrũ wa nyina na mũndũ aagĩrĩirũo nĩ gwĩka mũka wa mũrũ wa nyina; nĩguo ũcokerie mũrũ wa nyũkwa rũciaro.
• 9. Nake Onani agĩkĩmenya atĩ rũciaro rũu rũtigatuĩka rũake, tondũ ũcio rĩrĩa onana na mũka wa mũrũ wa nyina, agaita hinya wake thĩ, nĩ getha ndagacokerie mũrũ wa nyina rũciaro.
• 10. Naguo ũndũ ũcio ekire ũkĩonwo wĩ mũũru nĩ Jehova, agĩkĩmũũraga o nake.
• 11. Hĩndĩ ĩo Juda akĩĩra Tamaru, mũka wa mũriũ atĩrĩ, Tũũra gwa thoguo o ro ũguo wĩ wa ndigwa o nginya hĩndĩ ĩrĩa Shela, mũrũ wakwa, agakũra; nĩ ũndũ oigire atĩrĩ, Nĩ getha hihi o nake ndagakue, o ta ariũ a nyina. Tamaru agĩgĩtũũra gwa ithe mũciĩ.
• 12. Na rĩrĩ, matukũ maathiathia, mwarĩ wa Shua, mũka wa Juda, agĩkua, nake Juda agĩkirio maithori, agĩcoka akĩambata agĩthiĩ Timina, akinye kũrĩ amuri guoya wa ng’ondu ciake, magĩgĩthiĩ na Hira mũratawe, ũcio wa Adulamu.
• 13. Tamaru agĩkĩĩrũo atĩrĩ, Iciciaraguo nĩegũthiĩ Timina kũmurithia ng’ondu ciake guoya.
• 14. Nake mũndũ-wa-nja ũcio akĩruta nguo ciake cia mũthemba wa atumia a ndigwa, akĩĩhumba uthiũ, akĩĩrigicĩria tama mwĩrĩ, agĩgĩikara thĩ hingo-inĩ gĩa itũũra rĩa Enaimu, rĩrĩa rĩahĩtũkagĩrũo gũgĩthio Timina, nĩ ũndũ nĩonire atĩ rĩu Shela nĩ mũiganu, na ndaheo we amũthambie.
• 15. Rĩrĩa Juda aakĩonire mũka ũcio, agĩĩciria nĩ mũka wa maraya, nĩ ũndũ nĩehumbĩte ũthiũ.
• 16. Agĩgĩthiĩ harĩ we hau mũkĩra-inĩ wa njĩra, akĩmwĩra atĩrĩ, Ndagũthaitha ũnjĩtĩkĩrie nyonane nawe; nĩ gũkorũo ndaamenyaga atĩ mũka ũcio nĩwe warĩ mũka wa mũriũ. Mũka ũcio agĩkĩmũũria atĩrĩ, Ũkũ’he kĩ, nĩ getha wonane na niĩ?
• 17. Juda agĩkĩmwĩra atĩrĩ, Nĩngũkũrehithĩrie kori ka mbũri cia rũũru rũakwa. Nake mũndũ-wa-nja ũcio akĩmũũria atĩrĩ, Nĩũkũndigĩra kĩndũ o nginya rĩrĩa ũrĩgĩkũũra?
• 18. Juda agĩkĩmũũria atĩrĩ, Ũkwenda ngũtigĩre kĩ? Nake mũka ũcio akiuga atĩrĩ, Ndigĩra gĩcũhĩ gĩaku kĩu kĩĩ na rũũri rũaku, hamwe na kĩrengeri gĩakĩo, o na rũthanju rũu ũnyitĩte na guoko gwaku. Juda agĩkĩmũtigĩra indo icio, magĩkĩonana, mũka ũcio agĩkĩgĩa ihu rĩake.
• 19. Mũka ũcio agĩgĩũkĩra agĩĩthiĩra, akĩĩhumbũria ũthiũ, agĩcoka akĩĩhumba nguo ciake cia mũthemba wa atumia a ndigwa.
• 20. Nake Juda agĩkĩmũtwarithĩria kori ka mbũri na mũndũ ũcio wa Adulamu, mũratawe, nĩ getha agakũũre he mũka ũcio indo iria aamũtigĩire; no ndaigana kũmuona.
• 21. Agĩgĩcoka akĩũria andũ a hau atĩrĩ, Iraya rĩa gũkũ Enaimu, rĩrĩa rĩrarĩ mũkĩra-inĩ wa njĩra rĩĩ ha? Nao makiuga atĩrĩ, Haha hatirĩ haagĩa iraya.
• 22. Mũndũ ũcio agĩgĩcoka kwĩ Juda, akĩmwĩra atĩrĩ, Ndinona mũka ũcio, ningĩ andũ a hau manjĩrire atĩrĩ, Haha hatirĩ haagĩa iraya.
• 23. Juda agĩkiuga atĩrĩ, Reka rĩĩthiĩre na indo icio, nĩ getha hihi tũtikae kũmeneka; ndũgũkĩona nĩngũrĩtwarithĩirie kori gaka, warĩaga.
• 24. Na gũgĩkinya atĩrĩ, atĩ mĩeri ĩtatũ yathira, Juda akĩheo ũhoro, akĩĩrũo atĩrĩ, Tamaru, mũka wa mũrũguo, nĩahũrĩte maraya; na e na ihu rĩa ũmaraya. Juda agĩkiuga atĩrĩ, Mũrutei acinwo.
• 25. Na rĩrĩ, aarutwo-rĩ, akĩrekania kũrĩ iciciarawe akerũo atĩrĩ, Mũndũ ũrĩa mwene indo ici, nĩwe wa’hirire ihu; ningĩ akiuga akerũo ũũ: Tuĩria indo ici ũmenye mwene, nacio nĩ gĩcũhĩ gĩkĩ, na kĩrengeri gĩkĩ, o na rũthanju rũrũ.
• 26. Juda agĩgĩ-cimenya, akiuga atĩrĩ, Hĩ! Mũka ũyũ nĩ mũthingu kũrĩ niĩ; nĩ ũndũ ndiigana kũmũhe Shela, mũrũ wakwa, amũthambie. Nake ndaacokire kuonana nake rĩngĩ o na rĩ.
• 27. Na gũgĩkinya atĩrĩ, atĩ rĩrĩa aarũmagwo, gũgĩkorũo atĩ ihu rĩu aarĩ narĩo nĩ rĩa mahatha.
• 28. Ningĩ gũgĩkinya atĩrĩ, atĩ hĩndĩ ĩo aarũmagwo, mwana ũmwe akiumia guoko; nake mũciarithania akĩoya uthi wa rangi wa gakarakũ, akĩwoherera guoko gwake, akiuga atĩrĩ, Ũyũ nĩwe woima mbere.
• 29. Na gũgĩkinya atĩrĩ, atĩ aacokia guoko-rĩ, mũrũ wa nyina akiuma; nake mũciarithania akiuga atĩrĩ, Hĩ! Wĩtuĩrĩire njĩra ya kuuma nĩ ũndũ kĩ? Tondũ ũcio agĩtuwo Perezu.
• 30. Na thutha wa ũguo mũrũ wa nyina o nake akiuma, o we ũcio warĩ na uthi wa rangi gakarakũ guoko, agĩgĩĩtwo Zera.

Home