Go Back

Kĩambĩrĩria Chapter 32

• 1. Nake Jakubu aagwata rũgendo, agĩtungana na araika a Ngai
• 2. Nake Jakubu aamona akiuga atĩrĩ, Ĩno nĩ mbũtũ ya Ngai, agĩgĩtua handũ hau Mahanaimu.
• 3. NINGĨ Jakubu akĩrekia andũ mathiage mbere yake kwĩ Esau, mũrũ wa nyina, o kũu bũrũri wa Seiru, werũ wa Edomu.
• 4. Agĩkĩmaatha akĩmera ũũ: Thiĩi mũkere mwathi wakwa Esau atĩrĩ, Ndungata yaku ĩrĩa ĩĩtagwo Jakubu yoiga ũũ: Atĩrĩrĩ, ndũire ndĩ mũgeni wa Labani, ngatũũra gwake o nginya rĩu;
• 5. na rĩrĩ, indo iria ndĩ nacio nĩ ndegwa na ndigiri, na mahiũ, o na ndungata cia arũme, na cia andũ-a-nja; na rĩu ndarekania nĩ getha wee, mwathi wakwa, ũheo ũhoro ũcio, nĩguo njĩtĩkĩrĩke nĩwe.
• 6. Nao arekio acio magĩcoka kwĩ Jakubu, makĩmwĩra atĩrĩ, Nĩtwakinyire kwĩ Esau, mũrũ wa nyũkwa; na makĩria nĩarerehe we mwene agũtũnge, me na andũ magana mana.
• 7. Jakubu agĩgĩĩtigĩra, agĩtangĩka mũno; agĩgĩtinangia andũ arĩa maarĩ nake ikundi igĩrĩ, o na mbũri na ng’ombe, na ngamĩra,
• 8. agĩkiuga atĩrĩ, Hihi Esau angĩũka akinye gĩkundi-inĩ kĩmwe, akĩhũre-rĩ, gĩkundi kĩrĩa gĩtigarĩte kĩahonoka.
• 9. Ningĩ Jakubu akĩhoya akiuga ũũ: Wee Ngai wa baba Iburahimu, o wee Ngai wa baba Isaaka, wee Jehova ũrĩa wanjĩrire ũũ: Atĩrĩrĩ, coka bũrũri wanyu, na kũrĩ andũ anyu, na nĩngũgwĩka wega;
• 10. ũhoro ũcio wa tha ciaku ciothe iria ũnjiguagĩra-rĩ, niĩ ndiagĩrĩirũo nĩ kũiguĩrũo o na imwe ciacio, kana gwĩkwo maũndũ maku mothe ma kwĩhokeka marĩa wĩkĩte ndungata yaku; nĩ gũkorũo ndaringire rũũĩ rũa Jorodani ndĩ o na rũthanju ruiki; na rĩrĩ, rĩu nĩnduĩkĩte ikundi igĩrĩ.
• 11. Ndagũthaitha ’honokia he mũrũ wa maitũ, ũcio ti Esau; nĩ ũndũ nĩngũmwĩtigĩra, nĩ getha hihi ndagoke a’hũre niĩ mwene, hamwe na atumia aya na twana twao.
• 12. Tondũ wanjĩrire ũũ: Ti-itherũ nĩngagwĩka wega, na nĩngatũma ciana ciaku ciingĩhe o ta mũthanga wa iria-inĩ rĩrĩa inene, ũrĩa ũtangĩtarĩka nĩ kũingĩha.
• 13. Agĩkĩraarĩrĩra hau ũtukũ ũcio; agĩcoka agĩthurĩra Esau mũrũ wa nyina indo imwe thĩinĩ wa iria aarĩ nacio ituĩke kĩheo gĩake;
• 14. nacio nĩ mbũri magana merĩ cia mĩgoma, na thenge mĩrongo ĩĩrĩ, na ng’ondu magana merĩ, na ndũrũme mĩrongo ĩĩrĩ;
• 15. o na ngamĩra mĩrongo ĩtatũ cia mĩgoma igũkamwo, ii na njaũ ciacio, na ng’ombe cia mĩgoma mĩrongo ĩna, na ndegwa cia njamba ikũmi, na ndigiri mĩrongo ĩĩrĩ cia mĩgoma, na njaũ ciacio ikũmi.
• 16. Agĩkĩnengera ndungata ciake indo icio, o rũũru mwanya, agĩkĩĩra ndungata icio ciake ũũ: Atĩrĩrĩ, ta ringai mũthiage mbere yakwa, na mũtigage itheri gatagatĩ ka rũũru na rũũru.
• 17. Nake Jakubu agĩgĩtaara mũndũ ũrĩa warĩ mbere ya arĩa angĩ, akĩmwĩra atĩrĩ, Rĩrĩa Esau mũrũ wa maitũ arĩgũtũnga, akũũrie atĩrĩ, Wĩ wa ũ? Na wathiĩ kũ? I ũhiũ ũyũ wĩ mbere yaku nĩ wa ũ?
• 18. Hĩndĩ ĩo nĩũkamũcokeria, ũmwĩre atĩrĩ, Nĩ wa ndungata yaku Jakubu; na nĩ wa gũkũhe kĩheo, wee mwathi wakwa Esau; o nake Jakubu we mwene e thutha witũ.
• 19. Ningĩ agĩtaara ndungata ya kerĩ, o na ya gatatũ, na iria ciothe ciatindĩkaga ndũru icio, agĩciĩra atĩrĩ, Ũguo nĩguo mũrĩĩra Esau, mwamuona;
• 20. o na mũmwĩre atĩrĩ, O nake Jakubu, ndungata yaku, e thutha witũ. Nĩ ũndũ Jakubu oigire atĩrĩ, Nĩngumuhaka ndĩmũhorerie na kĩheo kĩa indo ici igũthiĩ mbere yakwa, na thutha wa ũguo niĩ mwene njoke nyonane nake; tondũ hihi nĩakanjĩtĩkĩria.
• 21. Tondũ ũcio indo icio cia kũheanwo ikĩamba kũringa mbere yake; nake Jakubu we mwene ũtukũ ũcio akĩraara o hau maarĩ na andũ ake.
• 22. Naguo ũtukũ o ro ũcio Jakubu agĩũkĩra, akĩoya atumia ake erĩ, na ndungata ciake igĩrĩ cia andũ-a nja, o na ciana ciake ikũmi na ũmwe, akĩringĩra iriũko rĩa Jaboku.
• 23. Agĩgĩthiĩ nao, akĩmaringia karũũĩ, na akĩringia indo ciothe iria aarĩ nacio.
• 24. Nake Jakubu agĩgĩtigwo wiki; naho hau hagĩgĩkorũo he mũndũ, akĩgiana nake o nginya gũgĩthera.
• 25. Na rĩrĩ, mũndũ ũcio ona atĩ ndekũmũhoota, akĩmũhutia gĩtina gĩa kũgũrũ; nakuo kũgũrũ kũu kwa Jakubu gũgĩthenyũkĩra gĩtina-inĩ, makĩgiana.
• 26. Mũndũ ũcio agĩkiuga atĩrĩ, Reka ndĩĩthiĩre amu gũgũthera. Nake Jakubu agĩkĩmũcokeria akiuga atĩrĩ, Ndingĩkũreka ũthiĩ, tiga o ũndathimire.
• 27. Mũndũ ũcio agĩkĩmũũria atĩrĩ, Wĩtagwo atĩa? Nake agĩkĩmwĩra, Njĩtagwo Jakubu.
• 28. Ningĩ mũndũ ũcio agĩcoka akiuga atĩrĩ, Ndũgũcoka gwĩtwo Jakubu, no ũrĩĩtagwo Isiraeli; nĩ ũndũ nĩũgianĩte na Ngai, o na andũ, na ũkahootana.
• 29. Jakubu agĩkĩmwĩra atĩrĩ, Ndagũthaitha njĩra rĩĩtwa rĩaku. Nake mũndũ ũcio akiuga ũũ: Ũkũnjũria rĩĩtwa rĩakwa nĩkĩ? Agĩkĩmũrathimĩra hau.
• 30. Jakubu agĩgĩtua handũ hau Penieli; nĩ ũndũ oigire atĩrĩ, Nĩnyonanĩte na Ngai ũthiũ na ũthiũ, na ngacoka gũtũũra muoyo.
• 31. Narĩo riũa rĩkĩmũrathĩra agĩkĩra hau Penueli; na kũgũrũ gwake nĩkwamũthuithagia.
• 32. Na tondũ ũcio ciana cia Isiraeli itingĩrũma mũkiha ũrĩa ũrĩ rũhonge-inĩ rũa gĩtina gĩa kũgũrũ o na ũmũthĩ, nĩ ũndũ wa ũrĩa mũndũ ũcio aahutirie Jakubu gĩtina gĩa kũgũrũ mũkiha wa rũhonge-inĩ.

Home