Go Back

Kĩambĩrĩria Chapter 29

• 1. Hĩndĩ ĩo Jakubu agĩkĩoya magũrũ, agĩkinya bũrũri wa ciana cia mwena wa irathĩro.
• 2. Nake akĩbaranga, akĩona gĩthima werũ-inĩ, na atĩrĩrĩ, hagĩkorũo he ndũru ithatũ cia ng’ondu ikomete hakuhĩ nakĩo, nĩ gũkorũo gĩthima-inĩ kĩu nĩkĩo andũ maanyuithagia ndũru ciao maĩ; narĩo ihiga rĩrĩa rĩarĩ mũromo-inĩ wa gĩthima kĩu rĩarĩ inene.
• 3. Na nĩho ndũru ciothe cionganaga, nao andũ makagaragaria ihiga, rĩgathengio mũromo-inĩ wa gĩthima, magacoka kũnyuithia ndũru maĩ; na thutha wa ũguo magacokia ihiga mũromo-inĩ wa gĩthima o handũ harĩo.
• 4. Nake Jakubu akĩũria atĩrĩ, Mũrĩ a kũ, andũ aya? Magĩkĩmwĩra atĩrĩ, Tũrĩ a Harani.
• 5. Agĩcoka akĩmoria atĩrĩ, Nĩmũngĩkorũo mũũĩ Labani, mũrũ wa Nahoru? Magĩkiuga, Ĩĩ, nĩtũmũũĩ.
• 6. Ningĩ akĩmoria atĩrĩ, Akĩrĩ o mũhoro? Nao makiuga atĩrĩ, Ĩĩ, no mũhoro; na atĩrĩrĩ, Rakeli, mwarĩ, nĩwe ũrĩa ũroka na ng’ondu.
• 7. Agĩcoka akĩmera ũũ: Atĩrĩrĩ, mũthenya nĩ mũnene, o na ihinda ti ikinyu rĩa gũcokanĩrĩria mahiũ; nyuithiai ng’ondu maĩ, mũthiĩ mũgacirĩithie.
• 8. Makĩmũcokeria atĩrĩ, Tũtingĩhota gwĩka ũguo, tiga o nginya rĩrĩa ndũru ciothe irĩcokanĩrĩrio hamwe, nao andũ magaragarie ihiga, rĩthenge mũromo-inĩ wa gĩthima; na hĩndĩ ĩo tũnyuithie ng’ondu maĩ.
• 9. Na ihinda o ro rĩu aaragia nao, Rakeli agĩũka na ng’ondu cia ithe, nĩ ũndũ nĩwe wacirĩithagia.
• 10. Na gũgĩkinya atĩrĩ, atĩ rĩrĩa Jakubu onire Rakeli, mwarĩ wa Labani, mamawe, na akĩona ng’ondu cia Labani, ũcio mamawe, agĩthengerera hau gĩthima-inĩ, akĩgaragaria ihiga, akĩrĩthengia mũromo-inĩ wakĩo; nake Jakubu we mwene agĩkĩnyuithia rũũru rũu rũa Labani mamawe maĩ.
• 11. Jakubu agĩkĩmumunya Rakeli, akĩanĩrĩra na mũgambo mũnene, akĩrĩra.
• 12. Ningĩ Jakubu akĩĩra Rakeli atĩ nĩ mũihawe wa ithe, na atĩ nĩ mũrũ wa Rebeka; Rakeli agĩgĩteng’era akĩhe ithe ũhoro ũcio.
• 13. Na gũgĩkinya atĩrĩ, atĩ rĩrĩa Labani aaiguire ũhoro wa Jakubu mũrũ wa mwarĩ wa nyina, agĩteng’era, agĩthiĩ kũmũthagania, akĩmũhĩmbĩria, akĩmũmumunya, akĩmũtwara gwake mũciĩ. Nake Jakubu agĩkĩhe Labani ũhoro wa maũndũ macio mothe.
• 14. Labani agĩkĩmwĩra atĩrĩ, Ti-itherũ niĩ nawe tũrĩ a mũthimo ũmwe, o na a mwĩrĩ ũmwe. Nake Jakubu agĩikarania nake mweri mũgima.
• 15. Nake Labani akĩũria Jakubu atĩrĩ, Kaĩ kwĩ hĩndĩ ũngĩkĩndungatĩra o ro ũguo tũhũ nĩ ũndũ atĩ wĩ mũihwa? Ta kĩnjĩre kĩrĩa ũngĩheo gĩa ũtungati waku?
• 16. Nake Labani aakĩrĩ na airĩtu erĩ; na ũrĩa mũkũrũ etagwo Lea, nake ũrĩa mũnyinyi agetwo Rakeli.
• 17. Nake Lea aakĩrĩ na maitho macici, no Rakeli aarĩ mũthaka, na aarĩ kĩĩrorerũa.
• 18. Nake Jakubu endete Rakeli; agĩkiuga atĩrĩ, Nĩngũgũtungatĩra mĩaka mũgwanja nĩ ũndũ wa Rakeli mwarĩguo ũrĩa mũnyinyi.
• 19. Labani agĩkiuga atĩrĩ, Nĩ kaba ngũhe arĩ wee, gũkĩra kũhe mũndũ ũngĩ; gĩtũũranie na niĩ.
• 20. Jakubu agĩkĩmũtungatĩra mĩaka mũgwanja nĩ ũndũ wa Rakeli; nake akĩona mĩaka ĩo o ta ĩrĩ matukũ manyinyi, nĩ ũndũ wa ũrĩa aamwendete.
• 21. Nake Jakubu akĩĩra Labani atĩrĩ, ’He mũka wakwa, nĩ ũndũ matukũ makwa nĩ mahingu, nĩ getha ngonane nake.
• 22. Nake Labani agĩkĩũngania andũ othe a handũ hau, akĩruga iruga.
• 23. Na gũgĩkinya atĩrĩ, atĩ hwaĩ-inĩ akĩoya mwarĩwe Lea, akĩmũtwarĩra Jakubu; nake Jakubu akĩonana nake.
• 24. Ningĩ Labani akĩoya ndungata ĩmwe yake ya mũirĩtu, yetagwo Zilipa, akĩmĩhe Lea ĩkamũtungatagĩre.
• 25. Na gũgĩkinya atĩrĩ, atĩ rũcinĩ gwakĩa, gũkĩonwo atĩ nĩ Lea; Jakubu agĩkĩĩra Labani atĩrĩ, Hĩ! Ĩ ũndũ ũyũ wanjĩka nĩ ũrĩkũ! Githĩ ndigũtungatĩire nĩ ũndũ wa Rakeli? Wakĩ’henia nĩkĩ?
• 26. Nake Labani akiuga atĩrĩ, Ũndũ ta ũcio, wa kũneana mũirĩtu ũrĩa mũnyinyi mbere ya ũrĩa wa irigithathi-rĩ, ndũrĩ wekwo gũkũ gwitũ o na rĩ.
• 27. Hingia kiumia gĩa ũcio, na thutha wa ũguo nĩtũgakũhe ũcio ũngĩ o nake, nĩ ũndũ wa wĩra ũrĩa ũkandutĩra mĩaka ĩngĩ mũgwanja.
• 28. Jakubu agĩgĩĩka o ro ũguo, akĩhingia kiumia gĩa ũcio; nake Labani agĩkĩmũnengera Rakeli mwarĩ, atuĩke mũka.
• 29. Ningĩ Labani akĩoya ndungata ĩmwe yake ya mũirĩtu, yetagwo Biliha, akĩhe Rakeli ĩkamũtungatĩre.
• 30. Jakubu agĩkĩonana na Rakeli o nake, o na akĩenda Rakeli gũkĩra Lea; agĩgĩcoka agĩtungatĩra Labani mĩaka ĩngĩ mũgwanja.
• 31. Na rĩrĩ, Jehova akĩona atĩ Lea nĩ mũthũũre agĩkĩmũhe rũciaro; no Rakeli aarĩ thata.
• 32. Lea agĩkĩgĩa ihu, agĩciara kahĩĩ, agĩgeta Reubeni nĩ ũndũ oigire atĩrĩ, Nĩ gũkorũo Jehova nĩonete mathĩna makwa, nĩ ũndũ rĩu, mũthuri wakwa nĩekũnyenda.
• 33. Nake agĩkĩgĩa ihu rĩngĩ, agĩciara kahĩĩ kangĩ; akiuga atĩrĩ, Nĩ gũkorũo Jehova nĩaiguĩte atĩ ndĩ mũthũũre, na tondũ ũcio aka’he kahĩĩ gaka o nako; agĩgĩgeta Simeoni.
• 34. Ningĩ akĩgĩa ihu rĩngĩ, agĩciara kahĩĩ kangĩ; akiuga atĩrĩ, Rĩu ihinda rĩrĩ-rĩ, niĩ na mũthuri wakwa nĩtũgũtũũrania anyendete, nĩ ũndũ nĩndĩmũciarĩire ihĩĩ ithatũ; tondũ ũcio gagĩĩtwo Lawii.
• 35. Ningĩ agĩkĩgĩa ihu rĩngĩ, agĩciara o kahĩĩ kangĩ, agĩkiuga atĩrĩ, Rĩu ihinda rĩrĩ nĩ kũgatha ngũgatha Jehova; agĩgeta Juda; thutha wa ũguo akĩrũgamĩra.

Home