Go Back

Kĩambĩrĩria Chapter 26

• 1. Na rĩrĩ, bũrũri ũcio ũkĩgĩa ng’aragu ĩngĩ, thengia ĩrĩa ya mbere yokĩte matukũ ma Iburahimu. Nake Isaaka agĩthiĩ Gerari kwĩ Abimeleku, mũthamaki wa Afilisiti.
• 2. Nake Jehova akĩmuumĩrĩra, akiuga atĩrĩ, Menya ũikũrũke ũthiĩ Misiri; tũũra bũrũri o ũrĩa ndĩrĩkwĩrĩra.
• 3. Rĩangĩra ũgeni bũrũri ũyũ, na niĩ nĩngũikara hamwe nawe, na nduĩke wa gũkũrathima, amu-rĩ, mabũrũri maya mothe nĩwe ngũhe matuĩke maku, na ma mbeũ yaku; na nĩngũrũmia mwĩhĩtwa ũrĩa ndehĩtire ngĩrĩkĩria thoguo Iburahimu,
• 4. nayo mbeũ yaku ndĩmĩthegeiye, ĩingĩhe o ta njata cia ĩgũrũ; ningĩ mabũrũri maya mothe nĩngahe mbeũ ĩo yaku, o nacio ndũrĩrĩ ciothe cia gũkũ thĩ ikarathimwo nĩ ũndũ wa mbeũ ĩo yaku,
• 5. nĩ ũndũ wa ũrĩa Iburahimu etĩkĩrire kũigua mũgambo wakwa, na akĩhingia ũramati ũrĩa ndamwĩhokeire, akĩrũmagĩrĩra maathani makwa, na irĩra cia watho wakwa wa kũrũmĩrĩrũo, o na mawatho makwa.
• 6. Nake Isaaka agĩgĩtũũra o kũu Gerari,
• 7. nao arũme a kũndũ kũu makĩmũhoya ũhoro wa mũtumia wake; nake akiuga atĩrĩ, Nĩ mwarĩ witũ, nĩ gũkorũo nĩetigagĩra kuuga, Nĩ mũtumia wakwa; nĩ ũndũ eĩrĩte atĩrĩ, Ndikuumbũra, andũ a gũkũ matikanjũrage nĩ ũndũ wa Rebeka, amu aarĩ thaka akĩonwo.
• 8. Na gũgĩkinya atĩrĩ, atĩ rĩrĩa aakorirũo aikarĩte kũu matukũ maingĩ, Abimeleku, mũthamaki wa Afilisiti nĩaacũthĩrĩirie nja na ndirica, akĩbaranga, na atĩrĩ, Isaaka nĩ gũthaka aathakaga na mũka ũcio wake Rebeka.
• 9. Nake Abimeleku agĩĩta Isaaka, akiuga ũũ: Hĩ, ũyũ nĩ mũkaguo! Nĩ kĩ gĩagĩtũmire uuge ũũ: Ũyũ nĩ mwarĩ witũ? Nake Isaaka akĩmwĩra atĩrĩ, Ndoigire ũguo tondũ ndeĩrĩte atĩrĩ, Hihi no gũkua nĩ ũndũ wake.
• 10. Nake Abimeleku akĩmũũria atĩrĩ, Hĩ, ĩ watwĩka atĩa? Gũtiuma hinya mũndũ ũmwe wa gũkũ akorũo akomete na mũkaguo, nawe ũgĩtũme tũtuĩke ageru ngero.
• 11. Nake Abimeleku agĩkaania andũ othe a kũu, akiuga atĩrĩ, Mũndũ wa kũhutia mũndũ ũyũ kana mũka ũyũ wake-rĩ, ndarĩ hingo atangĩũragwo.
• 12. Nake Isaaka akĩhanda irio bũrũri ũcio, nakĩo kĩmera o ro kĩu akĩgetha maita igana ma iria aahandire; nake Jehova akĩmũrathima;
• 13. nake mũndũ ũcio agĩgĩtũũgĩra, agĩthiĩ o agĩkĩragĩrĩria gũtũũgĩra, o nginya agĩtuĩka mũndũ wa bata mũno;
• 14. nake akĩgĩa na indo cia thakame, mbũri na ng’ombe, na agĩkĩgĩa na mũciĩ mũnene; nao Afilisiti makĩmũiguĩra ũiru.
• 15. Na rĩrĩ, Afilisiti magĩkorũo mathikĩte ithima ciothe iria ndungata cia ithe cienjete matukũ marĩa Iburahimu ũcio ithe aarĩ muoyo, magaciiyũria tĩri.
• 16. Nake Abimeleku akĩĩra Isaaka atĩrĩ, Ũkĩra ũthame, ũtũthengere, tondũ nĩũgĩĩte na hinya mũno gũtũkĩra.
• 17. Nake Isaaka agĩgĩthama kũu, agĩthiĩ akĩamba hema ciake gĩtuamba kĩa Gerari, agĩtũũra kuo.
• 18. Nake Isaaka agĩcoka agĩthikũria ithima icio cia maĩ, o icio cienjetwo matukũ marĩa Iburahimu ũcio ithe aarĩ muoyo, nĩ gũkorũo Iburahimu aarĩkia gũkua, Afilisiti nĩmaacithikire; nacio ithima icio agĩcitua o marĩĩtwa marĩa ithe aacituĩte.
• 19. Nacio ndungata cia Isaaka ikĩenja irima gĩtuamba-inĩ, igĩkĩona gĩthima kĩa maĩ megũtherũka.
• 20. Nao arĩithi a kũu Gerari makĩgĩa ngarari na arĩithi a Isaaka, makiuga atĩrĩ, Maĩ maya nĩ maitũ! Nake agĩtua gĩthima kĩu Eseku, nĩ ũndũ nĩmogitanire nake.
• 21. Ningĩ makĩenja gĩthima kĩngĩ, kĩu o nakĩo magĩgĩkararanĩria, nake agĩgĩtua Sitina.
• 22. Agĩgĩthama kũu, agĩthiĩ akĩenjithia gĩthima kĩngĩ; na kĩu matiigana gũkararanĩria; nake agĩgĩtua Rehobothu agĩkiuga atĩrĩ, Nĩ tondũ rĩu Jehova nĩatuoneire ũikaro mwariĩ, na nĩtũkũhambĩra bũrũri ũyũ.
• 23. Ningĩ akĩambata, akiuma kũu, agĩthiĩ Biri-shiba.
• 24. Nake Jehova akĩmuumĩrĩra ũtukũ o ro ũcio, akiuga atĩrĩ, Niĩ-rĩ, nĩ niĩ Ngai wa thoguo Iburahimu, ndũkanetigĩre; amu nĩngũikara o hamwe nawe, na nduĩke wa gũkũrathima, na ngũthegeerie mbeũ, nĩ ũndũ wa Iburahimu ndungata yakwa.
• 25. Nake agĩgĩaka kĩgongona handũ hau, agĩthathaiya Jehova akĩmũgwetaga rĩĩtwa, akĩamba hema yake kuo; na nĩkuo ndungata cia Isaaka ciacokire kwenja gĩthima.
• 26. Hĩndĩ ĩo Abimeleku agĩthiĩ kũrĩ we, oimĩte Gerari, me na mũratawe Ahuzathu, na Fikolu, mũnene wa ita ciake.
• 27. Nake Isaaka akĩmoria atĩrĩ, Mũgũũka kũrĩ niĩ nĩkĩ, kuona atĩ nĩmũ’thũire, na mũkĩnyingata kwanyu?
• 28. Nao makiuga atĩrĩ, Nĩ kuona tuonire hatarĩ nganja atĩ Jehova arĩ hamwe nawe, tũgĩkiuga atĩrĩ, Nĩtũgĩe na mwĩgeko, hakĩgĩe mwĩgeko harĩ ithuĩ nawe, tũkĩgĩe kĩrĩkanĩro nawe
• 29. atĩ ndũrĩ ũũru ũngĩtwĩka, o ta ũrĩa na ithuĩ tũtaakũhutirie, o na ta ũrĩa ithuĩ tũtarĩ ũndũ twagwĩkire, tiga o wega, tũkĩreka ũthiĩ o na thayũ; na rĩu nĩũgĩtuĩkĩte mũrathimwo wa Jehova.
• 30. Nake akĩmarugithĩria iruga, nao makĩrĩa na makĩnyua.
• 31. Magĩkĩroka gũũkĩra rũcinĩ tene, makĩrĩkanĩria na mwĩhĩtwa, ũyũ harĩ ũyũ ũngĩ, nake Isaaka akĩreka methiĩre, nao magĩtigana nake na thayũ.
• 32. Na mũthenya o ro ũcio gũgĩkinya atĩrĩ, atĩ ndungata cia Isaaka igĩũka, ikĩmũhe ũhoro wa gĩthima cienjete, igĩkĩmwĩra atĩrĩ, Nĩtwona maĩ.
• 33. Nake agĩgĩtua Shiba, na tondũ ũcio itũũra rĩu rĩtũire rĩĩtagwo Biri-shiba o na ũmũthĩ.
• 34. Na rĩrĩ, rĩrĩa Esau aakorirũo akinyĩtie mĩaka mĩrongo ĩna, akĩhikia Judithi mwarĩ wa Beeri, ũrĩa Mũhiti, o na Basemathu mwarĩ wa Eloni, ũrĩa Mũhiti o nake;
• 35. nao magĩtuĩka gana ngoro-inĩ cia Isaaka na Rebeka.

Home