Go Back

Kĩambĩrĩria Chapter 19

• 1. Nao araika acio erĩ magĩkinya Sodomu kĩhwaĩ-inĩ, nake Loti agĩkorũo aikarĩte kĩhingo-inĩ gĩa kũu Sodomu. Loti agĩkĩmona, agĩũkĩra kũmathagania; agĩkĩinamĩrĩra agĩturumithia ũthiũ thĩ,
• 2. akiuga atĩrĩ, Rĩu-rĩ, athuri aya, ta ambai mũkerũrĩre kwa ndungata yanyu, mũraarĩrĩre kuo, na mwĩthambe magũrũ, na rũcinĩ tene mũroke gũũkĩra, mũgwate rũgendo rũanyu. Nao makiuga atĩrĩ, Aca-ni, tũkũraara kĩaraho inĩ.
• 3. Nake Loti akĩmaringĩrĩria mũno; nao magĩkerũra, magĩgĩtonya gwake nyũmba; nake akĩmarugithĩria iruga, akĩmahĩhithĩria mĩgate ĩtarĩ mĩimbie, nao magĩkĩrĩa.
• 4. No rĩrĩ, matanakoma-rĩ, arũme a itũũra rĩu, o rĩu rĩa Sodomu, arĩa anyinyi o na arĩa akũrũ, a ituri ciothe ciarĩo, magĩthiũrũrũkĩria nyũmba ĩo;
• 5. nao magĩĩta Loti, makĩmũũria atĩrĩ, Andũ arĩa matonyire gũkũ gwaku ũtukũ ũyũ tũrĩ, marĩ ha? Moimie na gũkũ nja tũrĩ, tũmagwate.
• 6. Nake Loti akiuma na nja, agĩkinya harĩ o mũromo inĩ, na agĩtiga aahinga mũrango.
• 7. Akĩmera atĩrĩ, Andũ aitũ, ndamũthaitha tigai gwĩka ũndũ mũũru ũũ.
• 8. Atĩrĩrĩi, rĩu-ĩ, ndĩ na airĩtu akwa erĩ matarĩ monana na mũndũ mũrũme; ta kĩrekei ndĩmarehe gũkũ nja mũrĩ, na inyuĩ mekei o ũrĩa mũrĩona ũmwagĩrĩire; no rĩrĩ, andũ acio-rĩ, menyai mũmeke ũndũ, kuona atĩ mokĩte kwĩgitia gwakwa nyũmba.
• 9. Nao makĩmwĩra atĩrĩ, Thenga! Magĩcoka makiuga atĩrĩ, Hĩ! Kaĩ mũndũ ũyũ arokire arĩ wiki kũrĩangĩra ũgeni gũkũ, atindage agĩtũcirithia? Hĩ-ĩ! Wee nĩwe tũgwĩka ũũru kũrĩ ũrĩa tũgwĩka acio. Nao magĩkĩhatĩka mũndũ ũcio ti Loti mũno, magĩkuhĩhĩria nĩ getha moinange mũrango.
• 10. No andũ acio erĩ magĩtambũrũkia moko na nja, makĩgucia Loti, makĩmũtonyia nyũmba thĩinĩ kũu maarĩ, makĩhinga mũrango.
• 11. Magĩcoka magĩtũma andũ acio maarĩ mũromo-inĩ wa nyũmba maire maitho, gwata arĩa anyinyi o nginya arĩa agima; nao magĩkĩĩnogia magĩcaria mũromo.
• 12. Ningĩ andũ acio erĩ makĩũria Loti atĩrĩ, Wĩ na andũ angĩ aku gũkũ? Mũndũ ũhikĩtie mwarĩguo, na ihĩĩ ciaku, na airĩtu aku, o na mũndũ ũngĩ o wothe ũrĩa mwĩ nake itũũra rĩrĩ-rĩ, moimagarie ũmoimie gũkũ,
• 13. amu kũndũ gũkũ nĩtũgũkũũnũha; nĩ ũndũ mũkayo ũrĩa ũkaĩtwo nĩ ũndũ wa andũ akuo-rĩ, Jehova nĩaũiguĩte ũrĩ mũnene; nake Jehova agagĩtũrekia tũũke tũũũnũhe.
• 14. Nake Loti akiuma, agĩthiĩ kwaria na athoni ake arĩa maatuĩkĩte a kũhikia airĩtu ake, akĩmera atĩrĩ, Ũkĩrai, muume kũndũ gũkũ; amu Jehova nĩekũũnũha itũũra rĩrĩ. No athoni acio ake-rĩ, makĩona ta ekũmaringa itherũ.
• 15. Na ruoro rũgĩtema, araika acio makĩhĩkahĩka Loti, makiuga atĩrĩ, Arahũka woe mũtumia waku, o na airĩtu aya aku erĩ, nĩ getha ndũkaninanĩrio na itũũra rĩrĩ rĩaitĩka kũhũrũo.
• 16. Nowe akĩgondangĩrĩra; nao andũ acio makĩmũnyita guoko, me na mũtumia wake, o na airĩtu acio ake erĩ, amu Jehova nĩaamũiguĩrĩire tha; nao magĩkĩmuumagaria, makĩmũkinyia ngarũko ya itũũra.
• 17. Na gũgĩkinya atĩrĩ, maarĩkia kũmakinyia na kũu nja, agĩcoka akĩĩrũo atĩrĩ, Wĩthare ndũgakĩũrũo nĩ muoyo! Ningĩ ndũkae kwĩhũgũra, o na kana ũikare gũkũ Kĩaragana-inĩ gĩkĩ guothe. Wĩthare ũũrĩre kĩrĩma-inĩ ndũkaninwo.
• 18. Nake Loti akĩmera atĩrĩ, Aca, mũthuri ũyũ, ti ũguo;
• 19. rĩu-rĩ, kuona atĩ ndungata yaku nĩĩĩtĩkĩrĩkĩte nĩwe, na ũgakĩnyonia ũrĩa ũnyingĩhĩirie ũtugi waku nĩ kũ’honokia ndikae kũũrũo nĩ muoyo-rĩ, ningĩ tondũ ndingĩkĩhota gwĩthara nginye kĩrĩma-inĩ itakorereirũo nĩ ũũru ũcio, ngue-rĩ,
• 20. atĩrĩrĩ, itũũra rĩrĩ rĩrĩ o haha hakuhĩ rĩahota kũũrĩrũo, na no kanini; ta kĩreke ndĩĩthare nakuo (anga to gatũũra kanini?), nĩguo muoyo wakwa ũhonoke.
• 21. Nake akĩmwĩra atĩrĩ, Nĩguo, ũhoro ũcio o naguo nĩndagwĩtĩkĩria, atĩ ndige kũng’aũrania itũũra rĩu wagweta.
• 22. Kĩhiũhe wĩthare nakuo; amu ndihota gwĩka ũndũ o na ũmwe ũtanakinya kuo. Na tondũ ũcio itũũra rĩu rĩgĩtuwo Zoari.
• 23. Na rĩrĩ, hĩndĩ ĩrĩa Loti aakinyire Zoari, riũa rĩakorirũo rĩrathĩte, thĩ ĩkagĩa ũtheri.
• 24. Na hĩndĩ o ĩo, Jehova agĩitĩrĩria Sodomu na Gomora ũbiriti o na mwaki ciumĩte igũrũ kũrĩ Jehova,
• 25. agĩkĩng’aũrania matũũra macio o na Kĩaragana kĩu gĩothe, o gwata andũ othe arĩa maatũire matũũra macio, o kinya kĩndũ o gĩothe kĩrĩa kĩamerete tĩri-inĩ.
• 26. No rĩrĩ, mũtumia wa Loti nĩehũgũrire e thutha wake, agĩcũthĩrĩria na kũu moimĩte, agĩgĩtuĩka mũthiringo wa igata.
• 27. Nake Iburahimu akĩroka gũũkĩra rũcinĩ tene, agĩthiĩ handũ harĩa aarũgamĩte mbere ya Jehova,
• 28. agĩikia maitho na kũu mwena wa Sodomu na Gomora, o na mwena ũcio wothe wa Kĩaragana kĩu, akĩbara, na rĩ’, ndogo ĩrĩa yoimaga bũrũri ũcio-rĩ, nĩ gũtoga yatogororokaga na igũrũ ta ya icua.
• 29. Gũgĩgĩtuĩka atĩrĩ, atĩ hĩndĩ ĩo Ngai onũhire matũũra ma Kĩaragana kĩu, Ngai nĩaakĩririkanire Iburahimu, agĩtũma Loti oime kũu gatagatĩ ka mũng’aũranio ũcio, hĩndĩ ĩo aang’aũranagia matũũra macio ma kũu Loti aatũire.
• 30. Nake Loti akĩambata akiuma Zoari, agĩthiĩ gũtũũra kĩrĩma-inĩ kĩu, e hamwe na airĩtu arĩa ake erĩ, nĩ gũkorũo nĩetigagĩra gũtũũra Zoari, na kũrĩa aathiire gũtũũra na airĩtu acio ake erĩ nĩ ngurunga.
• 31. Nake ũcio mũkũrũ akĩĩra mũrunawe atĩrĩ, Ithe witũ nĩ mũkũrũ, na gũkũ thĩ gũtirĩ mũndũ mũrũme wa gũtonya kũrĩ ithuĩ o ta ũrĩa mũtugo wa andũ a thĩ yothe ũtariĩ;
• 32. reka twĩke atĩrĩ, nĩtũhe ithe witũ ndibei amĩnyue, na nĩtũgũcoka gũkomania nake, nĩguo tũtũũrie mbeũ ya ithe witũ.
• 33. Magĩkĩhe ithe wao ndibei ũtukũ o ũcio, nake mũirĩtu ũcio mũkũrũ agĩtonya, agĩkomania na ithe, nake ithe ndaigana kũmenya rĩrĩa okire gũkoma, o na kana rĩrĩa okĩrire.
• 34. Na mũthenya ũyũ ũngĩ gũgĩkinya atĩrĩ, mũirĩtu ũcio mũkũrũ akĩĩra mũrunawe ũũ: Atĩrĩrĩ, hwaĩ nĩ niĩ ndĩrakomanirie na baba; ũtukũ ũyũ o naguo-rĩ, nĩtũmũhe ndibei amĩnyue, ũgĩtonye ũkomanie nake o nawe, nĩguo tũtũũrie mbeũ ya ithe witũ.
• 35. Magĩkĩhe ithe wao ndibei ũtukũ ũcio o naguo, nake mũirĩtu ũcio mũnyinyi agĩũkĩra, agĩthiĩ agĩkomania na ithe, nake ithe ndaigana kũmenya rĩrĩa okire gũkoma, o na kana rĩrĩa okĩrire.
• 36. Nao airĩtu acio a Loti o erĩ magĩkĩgĩa mahu na ithe wao.
• 37. Nake ũcio mũkũrũ agĩciara kahĩĩ, agĩgatua Moabi; ũcio nĩwe ithe wa Amoabi o gwata ũmũthĩ.
• 38. O nake mũrunawe agĩciara kahĩĩ, agĩgatua Bini-ami; o na gwata ũmũthĩ ũcio nĩwe ithe wa arĩa metagwo ciana cia Amoni.

Home