Go Back

Kĩambĩrĩria Chapter 18

• 1. Ningĩ kwĩ hingo Jehova aamuumĩrĩire arĩ Mĩgandi-inĩ ĩrĩa ya Mamure, hĩndĩ aaikaire mũromo-inĩ wa hema yake mĩaraho.
• 2. Nĩ gũtiira aatiirire maitho, akĩbara, akĩona atĩrĩ, aya nĩ andũ atatũ marũngiĩ mamũng’etheire; nake aamona, akiuma hau aarĩ mũromo-inĩ wa hema, agĩteng’era amathaganie, akĩĩinamĩrĩria na thĩ,
• 3. akiuga atĩrĩ, Mũthuri ũyũ, ingĩkorũo ndĩ mwĩtĩkĩrĩku nĩwe-rĩ, ndagũthaitha tiga gũkĩhĩtũka ndungata yaku;
• 4. ta reka tũĩ tugĩrũo, mwĩthambe magũrũ, na mũhurũke mũtĩ-inĩ ũyũ;
• 5. na niĩ ’thiĩ ngĩre tũirio, nĩguo ngoro cianyu iguamũke, na thutha wa ũguo mũgĩcoke mwĩthiĩre, kuona atĩ nĩ kwa ndungata yanyu mũũkĩte. Nao makiuga atĩrĩ, Nĩ wega, ĩka ũguo woiga.
• 6. Nake Iburahimu akĩhanyũka agĩtonya hema gwĩ Sara, akĩmwĩra atĩrĩ, Ruta narua ibaba ithatũ cia mũtu ũrĩa mũhinyu wega, ũũmande, ũthondeke mĩgate ya hĩhio.
• 7. Nake Iburahimu agĩteng’era ũhiũ-inĩ wake, akĩgĩra gĩcaũ kĩororo kĩrĩ nyama njega, agĩkĩne ndungata yake; ĩgĩitĩka gũgĩthinja.
• 8. Ningĩ agĩcoka akĩrehe ngorono, na iria, na gĩcaũ kĩu aathĩnjithĩtie, agĩciiga mbere yao; agĩkĩrũgama hakuhĩ nao o hau mũtĩ-inĩ, nao makĩrĩa.
• 9. Magĩcoka makĩmũũria atĩrĩ, Sara, mũtumia waku, arĩ ha? Nake akiuga atĩrĩ, He! E gũkũ hema thĩinĩ.
• 10. Nake agĩkiuga atĩrĩ, Ndirĩ hingo itagagũcokerera ihinda rĩa mwaka rĩakomanĩria; na rĩrĩ, Sara, mũtumia waku, nĩakagĩa na kahĩĩ. Nake Sara akĩĩiguĩra ũhoro ũcio e thutha wake mũromo-inĩ wa hema.
• 11. Na rĩrĩ, Iburahimu na Sara maarĩ akũrũ, magatindĩkanga mĩaka ma; ningĩ Sara nĩaaninĩte maũndũ ma andũ-a-nja.
• 12. We Sara agĩgĩtheka na ngoro, akĩĩyũria atĩrĩ, Anga ndagĩcoka kũgĩa na gĩkeno ta kĩu, ndĩkĩtie gũkũra, o na mũthuri wakwa nake agakũra?
• 13. Nake Jehova akĩũria Iburahimu atĩrĩ, Kaĩ Sara aagĩtheka nĩkĩ, eyũria ũũ: Kaĩ ingĩgĩciara na ndĩ kĩheti?
• 14. Anga nĩkũrĩ ũndũ o na ũrĩkũ wa kĩgeganio ũngĩũmĩra Jehova? Ihinda rĩrĩa itue rĩakinya, nĩngagũcokerera, o rĩrĩa ihinda rĩa mwaka rĩgakomanĩria, nake Sara nĩakagĩa na kahĩĩ.
• 15. Hĩndĩ ĩo Sara agĩkaana, akiuga atĩrĩ, Ndinatheka niĩ; amu nĩ gwĩtigĩra etigĩrĩte. Nake akĩmũcokeria atĩrĩ, Aca-ni, nĩwatheka.
• 16. Nao andũ acio magĩũkĩra, makiuma hau, makĩrora na ya Sodomu, nake Iburahimu agĩtwarana nao, amoimagarangie.
• 17. Nake Jehova akĩĩyũria atĩrĩ, Ĩ nĩngũkĩhitha Iburahimu ũndũ ũrĩa ngwĩka,
• 18. na nĩwe ũgatuĩka rũrĩrĩ rũnene na rũĩ hinya, na ningĩ ndũrĩrĩ ciothe cia thĩ ikarathimwo nĩ ũndũ wake?
• 19. Amu nĩ’menyanĩte nake, nĩ getha aathĩrĩre ciana ciake na andũ a gwake, o gwata arĩa magoka thutha wake, atĩ marũmagĩrĩre njĩra ya Jehova, magĩĩkaga maũndũ ma kĩhooto, o magĩtuaga cira o ũrĩa werekereire; nĩguo Jehova akamũkinyithĩria maũndũ marĩa aaririe nĩ ũndũ wake.
• 20. Ningĩ Jehova akiuga atĩrĩ, Mũkayo ũrĩa ũkaithanĩtio nĩ Sodomu na Gomora nĩ mũnene, na ũhĩtia wakuo ũkaritũha mũno;
• 21. rĩu nĩngũgĩikũrũka, ngarore kana nĩgwĩkĩtwo maũndũ maringaine ki na mũkayo ũcio ũkaĩtwo nĩ ũndũ wakuo, o ũcio ũnginyĩire, na akorũo tiguo, ’menye.
• 22. Nao andũ acio makiuma hau, magĩthiĩ marorete na ya Sodomu, nowe Iburahimu agĩtigwo o arũngiĩ mbere ya Jehova.
• 23. Nake Iburahimu akĩmũkuhĩhĩria, akĩmũũria atĩrĩ, Anga ũgũkĩninaniria andũ arĩa athingu o na arĩa aaganu hamwe?
• 24. Hihi to gũkorũo nĩkũrĩ andũ athingu mĩrongo ĩtano itũũra rĩu? Anga wakĩnina kũndũ kuũ, na ndũkũhonokie nĩ ũndũ wa acio athingu mĩrongo ĩtano me kuo?
• 25. Kaĩ gwĩka ũguo gũtikwagĩrĩire-ĩ, atĩ ũũraganĩrie arĩa athingu na arĩa aaganu, arĩa athingu magakĩringanio na arĩa aaganu; kaĩ ũguo ndũkwagĩrĩire-ĩ! Ũrĩa Mũtuanĩri wa thĩ yothe-rĩ, githĩ to atuanagĩre o ũrĩa kwerekereire?
• 26. Nake Jehova akiuga atĩrĩ, Ndona andũ mĩrongo ĩtano itũũra rĩu rĩa Sodomu, nĩngũhonokia kũndũ kũu guothe nĩ ũndũ wao.
• 27. Nake Iburahimu agĩcokia akiuga atĩrĩ, Rĩu-rĩ, o na harĩa ndĩ o rũkũngũ na mũhu-rĩ, nĩngweta kwarĩria Mwathani.
• 28. Atĩrĩrĩ, ĩ hihi hangĩkorũo haagĩte andũ atano thĩinĩ wa acio athingu mĩrongo ĩtano-rĩ, anga wakĩũnũha itũũra rĩothe nĩ ũndũ wa kwaga acio atano? Nake akiuga atĩrĩ, O na ndona andũ mĩrongo ĩna na atano kuo, ndingĩrĩũnũha.
• 29. Ningĩ agĩcoka akĩmwarĩria o rĩngĩ, akĩmũũria atĩrĩ, Ĩ hihi kũngĩkorũo kwĩ mĩrongo ĩna? Nake akiuga atĩrĩ, Ndatiga gwĩka ũndũ ũcio nĩ ũndũ wa acio mĩrongo ĩna.
• 30. Akiuga atĩrĩ, Mwathani ta nĩatige kũrakara-ĩ, njoke njarie. Ĩ hihi kũngĩkorũo kwĩ mĩrongo ĩtatũ? Nake akiuga atĩrĩ, Ndona mĩrongo ĩtatũ kuo-rĩ, ũndũ ũcio ndiwĩka.
• 31. Ningĩ akiuga atĩrĩ, Rĩu-rĩ, no ngweta kwarĩria Mwathani. Atĩrĩrĩ, ĩ hihi kũngĩoneka mĩrongo ĩĩrĩ? Nake akiuga atĩrĩ, Ndatiga kũrĩũnũha nĩ ũndũ wa acio mĩrongo ĩĩrĩ.
• 32. Ningĩ akiuga atĩrĩ, Mwathani ta nĩatige kũrakara-ĩ, njoke njarie o rĩngĩ rĩmwe. Atĩrĩrĩ, ĩ hihi kũngĩoneka ikũmi? Nake akiuga atĩrĩ, Ndatiga kũrĩũnũha nĩ ũndũ wa acio ikũmi.
• 33. Nake Jehova aarĩkia kwaranĩria na Iburahimu, agĩĩthiĩra, nake Iburahimu akĩĩinũkĩra.

Home