Go Back

Kĩambĩrĩria Chapter 13

• 1. Nake Aburamu akĩambata, akiuma Misiri, agĩthiĩ bũrũri wa Gũthini, me na mũtumia wake na indo ciake ciothe; ningĩ Loti aarĩ o hamwe nake.
• 2. Na rĩrĩ, Aburamu aarĩ mũtongu mũno na indo cia thakame, na betha, o na thahabu.
• 3. Ningĩ akĩgwata ng’endo icio ciake, akiuma na kũu Gũthini, agĩthiĩ agĩkinya o Beth-eli, kũrĩa aambĩte hema yake rĩa mbere, o gatagatĩ ka Beth-eli na Ai,
• 4. o handũ harĩa haarĩ kĩgongona kĩrĩa aakĩte ho ihinda rĩa mbere, na aakinya ho, Aburamu agĩcoka gũthathaiya Jehova akĩmũgwetaga rĩĩtwa.
• 5. Ningĩ Loti, ũcio watwaranĩte na Aburamu, o nake aarĩ na ndũru cia mbũri na cia ng’ombe, o na akagĩa na mahema.
• 6. Naguo bũrũri ũcio ndũigana kũmaigana atĩ nĩguo matũũranie hamwe, amu ũmathi wao warĩ mũingĩ, ũkĩgiria matũũranie hamwe.
• 7. Na rĩrĩ, arĩithi a ũhiũ wa Aburamu na arĩithi a ũhiũ wa Loti makĩgĩa na ngarari. Na hĩndĩ ĩo nĩ rũruka rũa Kanaani na rũa Perizi ciatũire bũrũri ũcio.
• 8. Nake Aburamu akĩĩra Loti atĩrĩ, Ta nĩhatige kũgĩa njũgitano iitũ nawe, o na kana ya arĩithi akwa na aku, amu tũrĩ o amwe.
• 9. Githĩ bũrũri ũyũ wothe ndũgũkĩwĩonera? Ta gĩĩtĩkĩre tweheranĩre; wenda gũthiĩ mwena wa ũmotho, niĩ ngũthiĩ wa ũrĩo; kana wenda gũthiĩ wa ũrĩo, niĩ ’thiĩ wa ũmotho.
• 10. Nake Loti agĩtiira maitho akĩbara, akĩona Kĩaragana gĩothe kĩa Jorodani, atĩ kĩĩ na maĩ maingĩ ituri ciothe; gĩkahaana o ta mũgũnda wa Jehova, o na ta bũrũri wa Misiri, mũndũ agĩthiĩ Zoari; na hĩndĩ ĩo Jehova ndonũhĩte Sodomu na Gomora.
• 11. Tondũ wa ũguo Loti agĩĩthurĩra Kĩaragana kĩu gĩothe kĩa Jorodani; nake Loti agĩkĩgwata rũgendo akĩerekera mwena ũrĩa riũa rĩrathagĩra, magĩkĩeheranĩra.
• 12. We Aburamu agĩĩtũũrĩra o kũu bũrũri ũcio wa Kanaani, nake Loti agĩtũũra matũũra-inĩ marĩa maarĩ Kĩaragana-inĩ kĩu, agĩthamia hema yake, akĩmĩkinyia Sodomu.
• 13. Na rĩrĩ, andũ a kũu Sodomu maarĩ oru, na magakĩrĩrĩria mũno kwaganĩra Jehova.
• 14. Ningĩ Aburamu na Loti maarĩkia kweheranĩra, Jehova akĩĩra Aburamu atĩrĩ Ta tiira maitho o nawe wĩ hau ũrĩ, ũbare mwena wa gathigathini, na wa gũthini, o na kũrĩa riũa rĩrathagĩra, na kũrĩa rĩthũagĩra,
• 15. amu-rĩ, bũrũri ũcio wothe ũkuona nĩwe ngũhe ũtuĩke waku, na wa mbeũ yaku, tene na tene.
• 16. Na rĩrĩ, mbeũ yaku nĩngatũma ĩingĩhe o ta rũkũngũ rũa thĩ, na nĩgũgatuĩka atĩrĩ, atĩ kũngĩkorũo kwĩ mũndũ ũngĩhota gũtara rũkũngũ rũa thĩ-rĩ, o nayo mbeũ yaku nĩĩgagĩtarĩka.
• 17. Ta ũkĩra, ũtuĩkanie bũrũri ũyũ ũraihu waguo o na wariĩ waguo, amu nĩwe ngũhe.
• 18. Nake Aburamu akĩambũra hema yake, agĩthiĩ gũtũũra hakuhĩ na mĩtĩ ĩrĩa ĩĩtagwo Mĩgandi ya Mamure, ĩrĩa ĩrĩ Hebironi, agĩcoka agĩakĩra Jehova kĩgongona ho.

Home