Go Back

Kĩambĩrĩria Chapter 12

• 1. NA RĨRĨ, Jehova akĩĩra Aburamu atĩrĩ, Ũkĩra, ũthame bũrũri ũyũ ũtũire, uume kũrĩ andũ anyu, ũkiume nyũmba-inĩ ya thoguo, ũthiĩ ũkinye bũrũri ũrĩa ngakuonia;
• 2. na niĩ nĩngatũma thĩinĩ waku kuume rũrĩrĩ rũnene, na nĩngakũrathima, na ndũme rĩĩtwa rĩaku rĩgĩe igweta; nawe ũrogatuĩka mũrathimithania;
• 3. na rĩrĩ, andũ arĩa marĩkũrathimaga, acio nĩndĩrĩmarathimaga; na ningĩ mũndũ ũrĩa ũngĩkũruma, ũcio nĩndĩrĩmũtũũragia na ndirũ; nayo mĩhĩrĩga yothe ya thĩ ĩkarathimwo nĩ ũndũ waku.
• 4. Nake Aburamu agĩgĩthiĩ o ta ũrĩa erirũo nĩ Jehova, ningĩ Loti agĩthiĩ nake; na Aburamu aarĩ wa mĩaka mĩrongo mũgwanja na ĩtano hĩndĩ ĩo aathamire kũu Harani.
• 5. Ningĩ Aburamu agĩthiĩ na Sarai mũtumia wake, na Loti, mũriu wa mũrũ wa nyina, na indo ciao ciothe iria maarĩmĩte kũu, o na andũ arĩa megĩĩrĩire nao o kũu Harani, magĩgĩthama kũu nĩguo mathiĩ bũrũri wa Kanaani; nao magĩgĩkinya bũrũri ũcio wa Kanaani.
• 6. Nake Aburamu agĩtuĩkanĩria bũrũri ũcio, agĩkinya handũ hetagwo Shekemu, o mũtĩ-inĩ ũrĩa wetagwo Mũgandi wa More. Na hĩndĩ ĩo nĩ rũruka rũrĩa rũa Kanaani rũatũire bũrũri ũcio.
• 7. Nake Jehova akiumĩrĩra Aburamu, akĩmwĩra atĩrĩ, Bũrũri ũyũ nĩguo ngahe mbeũ yaku; nake Aburamu akĩhandĩra Jehova ihiga rĩa kĩgongona hau, o we ũcio wamuumĩrĩire.
• 8. Agĩcoka agĩthama hau, agĩthiĩ kĩrĩma-inĩ kĩĩ mwena ũrĩa riũa rĩrathagĩra wa Beth-eli, akĩamba hema yake, Beth-eli gũkamũgĩa mwena ũrĩa riũa rĩthũagĩra, nakuo Ai gũkamũgĩa mwena ũrĩa riũa rĩrathagĩra; hau o naho agĩakĩra Jehova kĩgongona, agĩthathaiya Jehova, akĩmũgwetaga rĩĩtwa.
• 9. Ningĩ Aburamu agĩcoka agĩthiathia erekeire Gũthini.
• 10. Naguo bũrũri ũcio ũkĩgĩa ng’aragu, nake Aburamu agĩikũrũka agĩthiĩ Misiri agaikare kuo, nĩ ũndũ ng’aragu yarĩ nene mũno bũrũri ũcio aarĩ.
• 11. Na gũgĩkinya atĩrĩ, atĩ rĩrĩa aatigairie hanini akinye Misiri, akĩĩra Sarai mũtumia wake atĩrĩ, Rĩu-rĩ, nĩnjũĩ atĩ wee wĩ kĩĩrorerũa kĩa mũndũ-wa-nja,
• 12. na nĩgũgakinya atĩrĩ, atĩ rĩrĩa andũ a Misiri magakuona, nĩmakoiga atĩrĩ, Ũyũ nĩ mũka wa mũndũ ũyũ; na nĩmakanjũraga, nawe makũhonokie ũtigwo muoyo.
• 13. Ta nĩũkoiga atĩ wĩ mwarĩ witũ, nĩ getha njĩkwo wega nĩ ũndũ waku, o na muoyo wakwa ũhonoke nĩ ũndũ waku.
• 14. Na gũgĩkinya atĩrĩ, atĩ rĩrĩa Aburamu aakinyire Misiri andũ akuo makĩona atĩ mũndũ-wa-nja ũcio nĩ kĩĩrorerũa.
• 15. Nao anene a kwa Firauni makĩmuona, makĩmũgathĩrĩria harĩ Firauni, nake mũndũ-wa-nja ũcio agĩtwarũo nyũmba ya Firauni.
• 16. Nake Firauni agĩĩka Aburamu wega nĩ ũndũ wake, agĩkĩgĩa na mbũri, na ng’ombe, na ndigiri cia njamba, na ndungata cia arũme na cia airĩtu, na ndigiri cia nga, o na ngamĩra.
• 17. Nake Jehova akĩhũra Firauni o na mũciĩ wake na mĩmitũko mĩnene nĩ ũndũ wa Sarai, mũka wa Aburamu.
• 18. Nake Firauni agĩĩta Aburamu, akĩmũũria atĩrĩ, Hĩ! Nĩ atĩa ũũ wanjĩka? Nĩ kĩ kĩagiririe ũnjĩre atĩ nĩ mũkaguo?
• 19. Nĩ kĩ gĩatũmire uuge ũũ: Nĩ mwarĩ witũ; ngĩgĩthiĩ nake, agatuĩke mũka wakwa? Rĩu-rĩ, mũkaguo nĩwe ũyũ; mũiyũkie, wĩthiĩre.
• 20. Nake Firauni agĩatha andũ ake akĩmera ũrĩa megwĩka Aburamu, nao makĩmuumagaria me na mũka ũcio wake, na indo ciothe iria aarĩ nacio.

Home