Go Back

Kĩambĩrĩria Chapter 11

• 1. Na rĩrĩ, thĩ yothe yarĩ o mwarĩrie ũmwe, na ciugo itiahĩtanĩtie.
• 2. Na gũgĩtuĩka atĩrĩ, atĩ hingo gwathiagwo rũgendo rũa thama o kũu mwena wa irathĩro, athami acio magĩkinya kũndũ kwaraganu bũrũri wa Shinaru, magĩgĩtũũra kuo.
• 3. Nao makĩĩrana atĩrĩ, Nĩtwĩkei atĩrĩ, nĩtũũmbe matubarĩ, na tũmacine wega. Magĩkĩgĩa na matubarĩ ithenya rĩa mahiga, o na rami ithenya rĩa thimiti.
• 4. Magĩcoka makiuga ũũ: Nĩtwĩkei atĩrĩ, nĩtwĩakĩre itũũra, na twake nyũmba mũthiringo, ndaya na igũrũ, gacũmbĩrĩ kayo gakinye o kũu matu-inĩ marĩa mairũ nĩguo twĩgĩĩre igweta; tũtikaharaganĩrio thĩ yothe.
• 5. Na rĩrĩ, Jehova agĩikũrũka one itũũra rĩu ciana cia kĩrĩndĩ ciaakaga, o na mũthiringo ũcio wacio wa nyũmba.
• 6. Nake Jehova akiuga ũũ: Atĩrĩrĩ, andũ aya me rũmwe, na mwarĩrie wao othe no ũmwe; na rĩrĩ, ũndũ ũyũ nĩguo maambĩrĩria gwĩka; na rĩu gũtirĩ ũndũ o na ũrĩkũ ũrĩa macirĩire gwĩka mangĩgirĩka.
• 7. Nĩtwĩkei atĩrĩ, nĩtũikũrũkei tũkamahĩngĩcanĩrie mwarĩrie, nĩ getha mũndũ ndakae kũigua mwarĩrie wa mũndũ ũrĩa ũngĩ.
• 8. Jehova agĩgĩtũma moime kũu, akĩmaharaganĩria thĩ yothe, nao magĩgĩtiga gwaka itũũra rĩu.
• 9. Na tondũ wa ũguo, rĩgĩtuwo Babeli, nĩ ũndũ nĩkuo Jehova aahĩngĩcanĩirie andũ othe a thĩ mwarĩrie wao; Jehova agĩgĩtũma moime kuo, akĩmaharaganĩria thĩ yothe.
• 10. ICI NĨCIO njiaro cia Shemu. Shemu aakinyia mĩaka igana, aaciarire Aripakishadi rĩrĩa gwakorirũo gũthirĩte mĩaka ĩĩrĩ thutha wa mũiyũro ũrĩa mũnene;
• 11. ningĩ Shemu aarĩkia gũciara Aripakishadi, agĩtũũra muoyo mĩaka ĩngĩ magana matano, na nĩaaciarire ihĩĩ ingĩ, o na airĩtu.
• 12. Nake Aripakishadi aakinyia mĩaka mĩrongo ĩtatũ na ĩtano, agĩciara Shela;
• 13. ningĩ Aripakishadi aarĩkia gũciara Shela, agĩtũũra muoyo mĩaka ĩngĩ magana mana na ĩtatũ, na nĩaaciarire ihĩĩ ingĩ, o na airĩtu.
• 14. Nake Shela aakinyia mĩaka mĩrongo ĩtatũ, agĩciara Eberi;
• 15. ningĩ Shela aarĩkia gũciara Eberi, agĩtũũra muoyo mĩaka ĩngĩ magana mana na ĩtatũ, na nĩaaciarire ihĩĩ ingĩ, o na airĩtu.
• 16. Nake Eberi aakinyia mĩaka mĩrongo ĩtatũ na ĩna, agĩciara Pelegu;
• 17. ningĩ Eberi aarĩkia gũciara Pelegu, agĩtũũra muoyo mĩaka ĩngĩ magana mana ma mĩrongo ĩtatũ, na nĩaaciarire ihĩĩ ingĩ, o na airĩtu.
• 18. Nake Pelegu aakinyia mĩaka mĩrongo ĩtatũ, agĩciara Reu;
• 19. ningĩ Pelegu aarĩkia gũciara Reu, agĩtũũra muoyo mĩaka ĩngĩ magana merĩ na kenda, na nĩaaciarire ihĩĩ ingĩ, o na airĩtu.
• 20. Nake Reu aakinyia mĩaka mĩrongo ĩtatũ na ĩĩrĩ, agĩciara Serugu;
• 21. ningĩ Reu aarĩkia gũciara Serugu, agĩtũũra muoyo mĩaka ĩngĩ magana merĩ na mũgwanja, na nĩaaciarire ihĩĩ ingĩ, o na airĩtu.
• 22. Nake Serugu aakinyia mĩaka mĩrongo ĩtatũ, agĩciara Nahoru;
• 23. ningĩ Serugu aarĩkia gũciara Nahoru, agĩtũũra muoyo mĩaka ĩngĩ magana merĩ, na nĩaaciarire ihĩĩ ingĩ, o na airĩtu.
• 24. Nake Nahoru aakinyia mĩaka mĩrongo ĩĩrĩ na kenda, agĩciara Tera;
• 25. ningĩ Nahoru aarĩkia gũciara Tera, agĩtũũra muoyo mĩaka ĩngĩ igana rĩa ikũmi na kenda, na nĩaaciarire ihĩĩ ingĩ, o na airĩtu.
• 26. Nake Tera aakinyia mĩaka mĩrongo mũgwanja, agĩciara Aburamu, na Nahoru, na Harani.
• 27. Na rĩrĩ, ici nĩcio njiaro cia Tera. Tera aaciarire Aburamu, na Nahoru, na Harani; nake Harani agĩciara Loti.
• 28. Ningĩ Harani agĩkuĩra Uru-gwa-Akalidei, o kũu bũrũri ũcio aaciarĩirũo, ithe Tera arĩ o ho.
• 29. Na rĩrĩ, Aburamu nĩaahikanirie, o na Nahoru, nake mũhiki wa Aburamu etagwo Sarai, na wa Nahoru agetwo Milika, mwarĩ wa Harani, o we ũrĩa warĩ ithe wa Milika ũcio na Isika.
• 30. Nake Sarai aarĩ thata; ndaarĩ na mwana.
• 31. Nake Tera akĩoya mũriũ Aburamu, na mũcũkũrũwe Loti, mũrũ wa Harani, na Sarai, mũka wa mũriũ ũcio wetagwo Aburamu, magĩthama kũu Uru-gwa-Akalidei me hamwe, magĩthiĩ merekeire bũrũri wa Kanaani, magĩgĩkinya kũndũ gwetagwo Harani, magĩtũũra kuo.
• 32. Namo matukũ marĩa Tera aatũũrire muoyo nĩ mĩaka magana merĩ na ĩtano, nake Tera agĩkuĩra o kũu Harani.

Home